ഗൃഹാതുരത്വത്തിലേക്കുള്ള സഞ്ചാരമായി ടൂറിസം വകുപ്പ് പ്രദര്‍ശനം

ഗൃഹാതുരത്വം നിറഞ്ഞ ഓര്‍മകള്‍ അടയാളപ്പെടുത്തി വിനോദസഞ്ചാര വകുപ്പിന്റെ സ്റ്റാള്‍ ശ്രദ്ധേയമാവുന്നു. കേരളത്തിന്റെ ഗ്രാമീണതയും പച്ചപുതച്ച മലയോരങ്ങളും കടല്‍ത്തീരത്തെ ഡെസ്റ്റിനേഷന്‍ കല്യാണങ്ങളും ഉള്‍പ്പെടെ വിനോദ സഞ്ചാര മേഖലയുടെ നേര്‍ചിത്രമാണ് 'എന്റെ കേരളം' പ്രദര്‍ശന- വിപണന മേളയിലെ ടൂറിസം വകുപ്പ് സ്റ്റാളില്‍ ഒരുക്കിയിട്ടുള്ളത്. ഉത്തരവാദിത്ത ടൂറിസം മേഖലയിലെ കേരളത്തിന്റെ  സാധ്യതകള്‍ എടുത്തുകാണിക്കുന്ന വിവിധ കാഴ്ചകള്‍ കൊണ്ട് സമ്പന്നമായ സ്റ്റാളില്‍ ഗ്രാമീണ വഴികളിലൂടെയുള്ള സഞ്ചാരത്തിന്റെ നേരനുഭവം പകരാന്‍ വയലും കുളവും തേവ് യന്ത്രവും ഓലക്കുടിലും തത്സമയ മണ്‍പാത്ര നിര്‍മാണവുമെല്ലാമുണ്ട്. ഒപ്പം പുതുതലമുറയുടെ വിവാഹ സ്വപ്നങ്ങള്‍ വര്‍ണാഭമാക്കുന്ന ഡെസ്റ്റിനേഷന്‍ വെഡിങ്ങിന്റെ ആവിഷ്‌കരണം പ്രധാന സെല്‍ഫി പോയിന്റാണ്. സാഹസിക ടൂറിസത്തിന്റെ കാഴ്ചകളും സാധ്യതകളും സ്റ്റാളില്‍ അറിയാം. സംസ്ഥാനത്തെ വിവിധ ടൂറിസം കേന്ദ്രങ്ങളെ കുറിച്ചുള്ള വിവരങ്ങളും സ്റ്റാളില്‍ ലഭ്യമാണ്.