അന്‍പോടെ തൃത്താല മെഗാ മള്‍ട്ടി സ്‌പെഷ്യാലിറ്റി മെഡിയ്ക്കല്‍ ക്യാമ്പ്: നൂറിലധികം ഡോക്ടര്‍മാര്‍ പങ്കെടുക്കും
അന്‍പോടെ തൃത്താല പദ്ധതിയുടെ ഭാഗമായി ഞായറാഴ്ച നടക്കുന്ന മെഗാ മള്‍ട്ടി സ്‌പെഷ്യാലിറ്റി മെഡിക്കല്‍ ക്യാമ്പില്‍ നൂറിലധികം ഡോക്ടര്‍മാര്‍ പരിശോധനയ്‌ക്കെത്തും. വട്ടേനാട് ജി.വി.എച്ച്.എസ് എസില്‍ രാവിലെ എട്ടുമണി മുതല്‍ ഉച്ചയ്ക്ക് ഒരു മണിവരെയാണ് ക്യാമ്പ്. ആരോഗ്യ വനിതാ ശിശുക്ഷേമ വകുപ്പ് മന്ത്രി വീണ ജോര്‍ജ് ക്യാമ്പ് ഉദ്ഘാടനം ചെയ്യും. മന്ത്രി എം.ബി രാജേഷ് അധ്യക്ഷനാവും.
കേരളത്തിലെ സര്‍ക്കാര്‍ മെഡിയ്ക്കല്‍ കോളേജുകളിലെയും സ്വകാര്യ മെഡിയ്ക്കല്‍ കോളേജുകളിലെയും മള്‍ട്ടി - സൂപ്പര്‍ സ്‌പെഷ്യാലിറ്റി ആശുപത്രികളിലെയും പ്രശസ്ത ഡോക്ടര്‍മാര്‍ അടക്കമുള്ളവര്‍ ക്യാമ്പില്‍ പങ്കെടുക്കും. സൂപ്പര്‍ സ്‌പെഷ്യാലിറ്റി വിഭാഗങ്ങളില്‍ നിന്നുള്ള പരിശോധനാ സംവിധാനങ്ങളും ചികിത്സാ സംവിധാനങ്ങളും ക്യാമ്പിലെത്തിക്കും. ആയുര്‍വേദ - ഹോമിയോ വിഭാഗങ്ങളിലെയും വിദഗ്ധ ഡോക്ടര്‍മാര്‍ പങ്കെടുക്കും. നേത്ര പരിശോധനയ്ക്കും ദന്ത പരിശോധനയ്ക്കും ആധുനിക സംവിധാനങ്ങളുള്ള ക്ലിനിക്കുകളുണ്ടാവും. ഇരുവിഭാഗങ്ങളിലും വിവിധ തരം ചികിത്സകളും ക്യാമ്പില്‍ വെച്ചു തന്നെ ചെയ്യാനാവും. ക്യാന്‍സര്‍ പരിശോധനയ്ക്കുള്ള ആധുനിക സൗകര്യങ്ങളുമുണ്ടാവും.
ക്യാമ്പിന്റെ ഭാഗമായി എട്ടു വിഷയങ്ങളില്‍ ആരോഗ്യ ബോധവത്കരണ ക്ലാസുകള്‍ നടത്തും. ക്യാന്‍സര്‍ പ്രതിരോധം, ജീവന്‍ രക്ഷാ പ്രാഥമിക ശുശ്രൂഷാ പരിശീലനം, ലഹരി നിര്‍മാര്‍ജനം - സാമൂഹിക ഉത്തരവാദിത്വം, ഔഷധ സസ്യങ്ങള്‍, ഉത്തരവാദ രക്ഷാകര്‍തൃത്വം, പകര്‍ച്ചേതര രോഗ നിയന്ത്രണം, യോഗ, ജീവിതശൈലീ രോഗ നിയന്ത്രണം എന്നീ വിഷയങ്ങളില്‍ വിദഗ്ധര്‍ ക്ലാസുകള്‍ നയിക്കും.
- Log in to post comments