നവകേരള കാർഷിക കാഴ്ചകളുമായി കൃഷിവകുപ്പ് പ്രദർശനസ്റ്റാൾ

രണ്ടാം പിണറായി സർക്കാരിന്റെ നാലാം വാർഷിക ആഘോഷങ്ങളോട് അനുബന്ധിച്ച് എറണാകുളം മറൈൻ ഡ്രൈവിൽ ആരംഭിച്ച എന്റെ കേരളം 2025 പ്രദർശന മേളയിൽ കൃഷിവകുപ്പ് ഒരുക്കിയ സ്റ്റാളുകൾ ശ്രദ്ധേയമായി. 

 തീം പവലിയനിൽ ഒരുക്കിയിരിക്കുന്ന കൃഷി വകുപ്പ് സ്റ്റാളിൽ ഡിജിറ്റൽ അഗ്രികൾച്ചർ മേഖലയിലെ പ്രവർത്തനങ്ങൾ പൊതുജനങ്ങൾക്ക് അനുഭവഭേദ്യമാകുന്ന തരത്തിലാണ് സജ്ജീകരിച്ചിരിക്കുന്നത്.

 ഡ്രോൺ സംവിധാനത്തിന്റെ കൃഷിയിടത്തിലെ സാധ്യതകളെക്കുറിച്ച് കർഷകർക്കും പൊതുജനങ്ങൾക്കും അവബോധം സൃഷ്‌ടിക്കുന്നതിനും ഡ്രോണുളുടെ പ്രവർത്തനം അടുത്തറിയുന്നതിനുമായി ലൈവ് പ്രദർശനവും സ്റ്റാളിൽ ഒരുക്കിയിട്ടുണ്ട്.  

കൃഷി വകുപ്പിന്റെ സ്വന്തം ബ്രാൻഡായ കേരളഗ്രോ ഉൽപ്പന്നങ്ങളുടെയും മില്ലറ്റ് ഉൽപ്പന്നങ്ങളുടെയും പ്രദർശനവും സ്റ്റാളിലുണ്ട്. 

കാർഷിക സേവനങ്ങൾ ലഭിമാക്കുന്ന കതിർ ആപ്പ് , രജിസ്ട്രേഷൻ ഹെൽപ് ഡെസ്ക്, കൃഷി വകുപ്പ് നടപ്പിലാക്കുന്ന വിവിധ ഫ്ലാഗ്ഷിപ്പ് പദ്ധതികളെ സംബന്ധിച്ച വിവരങ്ങൾ ലഭ്യമാക്കുന്ന ഹെൽപ്പ് ഡെസ്ക് എന്നിവയും തീം പവലിയനിൽ സജ്ജീകരിച്ചിട്ടുണ്ട്. 

വിളകളിലെ രോഗ കീട നിയന്ത്രണം സംബന്ധിച്ച് സമഗ്രമായ വിവരങ്ങൾ ലഭ്യമാക്കുന്ന പ്ലാന്റ് ഹെൽത്ത് ക്ലിനിക്കും പ്ലാന്റ് ഡോക്ടർ സേവനവും സ്റ്റാളിൽ ഒരുക്കിയിട്ടുണ്ട്. 

 ഇതിന് പുറമെ 1500 സ്ക്വയർ ഫീറ്റിൽ ജില്ലാ കൃഷിവകുപ്പ് ഒരുക്കിയിരിക്കുന്ന നടീൽ വസ്തുക്കളുടെയും, കാർഷിക മൂല്യ വർദ്ധിത ഉത്പന്നങ്ങളുടെയും പ്രദർശന വിപണന മേളയും ഒരുക്കിയിട്ടുണ്ട്. പ്രദർശന വിപണനമേള മേയ് 23ന് സമാപിക്കും.