പെരുമാട്ടിയില്‍ ഹൈടെക് മാര്‍ക്കറ്റ് യാഥാര്‍ത്ഥ്യമാകുന്നു; ആദ്യഘട്ട നിര്‍മാണോദ്ഘാടനം നാളെ

പ്രാദേശിക കാര്‍ഷികോല്‍പ്പന്നങ്ങള്‍ക്ക് പുതിയ വിപണി സാധ്യതകളും കര്‍ഷകര്‍ക്ക് മികച്ച വരുമാനവും ലക്ഷ്യമിട്ട് പെരുമാട്ടി ഗ്രാമപഞ്ചായത്ത് ആരംഭിക്കുന്ന ഹൈടെക് മാര്‍ക്കറ്റ് ആന്‍ഡ് അഗ്രോ പ്രോസസിങ് യൂണിറ്റിന്റെ ഒന്നാംഘട്ട നിര്‍മ്മാണോദ്ഘാടനം നാളെ (ജൂലൈ ഏഴ്) നടക്കും. പ്ലാച്ചിമടയില്‍ രാവിലെ 10:30-ന് നടക്കുന്ന പരിപാടിയില്‍ തദ്ദേശ സ്വയംഭരണ വകുപ്പ് മന്ത്രി എം.ബി. രാജേഷ് ഉദ്ഘാടനം നിര്‍വഹിക്കും. വൈദ്യുതി വകുപ്പ് മന്ത്രി കെ. കൃഷ്ണന്‍കുട്ടി അധ്യക്ഷനാവും.കെ. രാധാകൃഷ്ണന്‍ എം.പി, കെ. ബാബു എം.എല്‍.എ, ജില്ലാ പഞ്ചായത്ത് പ്രസിഡന്റ് കെ. ബിനുമോള്‍, ജില്ലാ കളക്ടര്‍ ജി. പ്രിയങ്ക, ചിറ്റൂര്‍ ബ്ലോക്ക് പഞ്ചായത്ത് പ്രസിഡന്റ് എ. സുജാത എന്നിവര്‍ പങ്കെടുക്കും.
2022-23 സാമ്പത്തിക വര്‍ഷത്തെ ബജറ്റില്‍ ഉള്‍പ്പെടുത്തി 10 കോടി രൂപ വിനിയോഗിച്ചാണ് ഒന്നാം ഘട്ട നിര്‍മാണ പ്രവര്‍ത്തനം നടത്തുന്നത്. കര്‍ഷകര്‍ക്ക് ന്യായവില ഉറപ്പാക്കാനും കാര്‍ഷിക മേഖലയ്ക്ക് ഉണര്‍വേകാനുമാണ് പദ്ധതി ലക്ഷ്യമിടുന്നത്.  2014-15 സാമ്പത്തിക വര്‍ഷത്തില്‍ 1.15 കോടി രൂപ മുടക്കി മൂലത്തറ വില്ലേജിലെ കമ്പാലത്തറയില്‍ അഞ്ച് ഏക്കര്‍ സ്ഥലം ഗ്രാമപഞ്ചായത്ത് ഇതിനായി വാങ്ങിയിരുന്നു. ഈ സ്ഥലത്ത് വൈദ്യുതി, റോഡ് തുടങ്ങിയ അടിസ്ഥാന സൗകര്യങ്ങള്‍ നിലവില്‍ ലഭ്യമാണ്. പ്രാദേശിക കര്‍ഷകരുടെ ഉന്നമനം, ഗുണമേന്മയുള്ള കാര്‍ഷിക ഉല്‍പ്പന്നങ്ങളുടെ ഉത്പാദനം, കര്‍ഷകരുടെ ജീവിതനിലവാരം മെച്ചപ്പെടുത്തല്‍, കാര്‍ഷിക വിഭവങ്ങള്‍ അന്താരാഷ്ട്ര നിലവാരത്തില്‍ കയറ്റുമതി ചെയ്യാനുള്ള സാധ്യതകള്‍ എന്നിവയെല്ലാം ഈ മാര്‍ക്കറ്റിലൂടെ ലക്ഷ്യമിടുന്നു. ഊരാളുങ്കല്‍ ലേബര്‍ കോണ്‍ട്രാക്ട് കോ-ഓപ്പറേറ്റീവ് സൊസൈറ്റിക്കാണ് (ഡഘഇഇട) നിര്‍മാണ ചുമതല.