വിവരാവകാശ സൗഹൃദ കലക്ടറേറ്റ്: ക്യാമ്പയിന് സംഘാടക സമിതി രൂപീകരിച്ചു
സെമിനാര്‍ 14ന്
കോഴിക്കോട് കലക്ടറേറ്റിലെ എല്ലാ ഓഫീസുകളെയും വിവരാവകാശ സൗഹൃദമാക്കി മാറ്റുന്ന ക്യാമ്പയിന് പ്രവര്‍ത്തനങ്ങള്‍ക്ക് സംഘാടക സമിതി രൂപീകരിച്ചു. സംസ്ഥാന വിവരാവകാശ കമീഷണര്‍ അഡ്വ. ടി കെ രാമകൃഷ്ണന്‍ രക്ഷാധികാരിയും ജില്ലാ കലക്ടര്‍ സ്നേഹില്‍ കുമാര്‍ സിങ് ചെയര്‍മാനും എഡിഎം പി സുരേഷ് നോഡല്‍ ഓഫീസറുമായാണ് സംഘാടക സമിതി.
വിവരാവകാശ നിയമം പാര്‍ലമെന്റ് പാസാക്കിയ ജൂണ്‍ 15 മുതല്‍ നിയമം പൂര്‍ണമായി നിലവില്‍വന്ന ഒക്ടോബര്‍ 12 വരെയുള്ള ക്യാമ്പയിന് കാലയളവില്‍, വിവരാവകാശ നിയമത്തെ കുറിച്ച് ഉദ്യോഗസ്ഥര്‍ക്കും പൊതുജനങ്ങള്‍ക്കും അവബോധമുണ്ടാക്കുകയും സിവില്‍ സ്റ്റേഷനിലെ മുഴുവന്‍ ഓഫീസുകളെയും വിവരാവകാശ സൗഹൃദ ഓഫീസാക്കി മാറ്റുകയുമാണ് ലക്ഷ്യമെന്ന് സംസ്ഥാന വിവരാവകാശ കമീഷണര്‍ അഡ്വ. ടി കെ രാമകൃഷ്ണന്‍ പറഞ്ഞു.
ക്യാമ്പയിന്റെ ഭാഗമായി ജൂലൈ 14ന് കലക്ടറേറ്റ് കോണ്‍ഫറന്‍സ് ഹാളില്‍ വിവരാവകാശ നിയമവുമായി ബന്ധപ്പെട്ട്
സെമിനാര്‍ സംഘടിപ്പിക്കും. രാവിലെ വകുപ്പ് മേധാവികള്‍ക്കും ഉച്ചക്ക് ശേഷം പബ്ലിക് ഇന്‍ഫര്‍മേഷന്‍ ഓഫീസര്‍മാര്‍, അപ്പീല്‍ അധികാരികള്‍ എന്നിവര്‍ക്കുമായാണ് സെമിനാര്‍ നടത്തുക. ഒക്ടോബര്‍ 12ന് വിവരാവകാശ സൗഹൃദ കലക്ടറേറ്റ് പ്രഖ്യാപനവും നടത്തും.
വിവരാവകാശ നിയമപ്രകാരം എല്ലാ ഓഫീസുകളിലെയും വിവരങ്ങള്‍ ക്രോഡീകരിച്ച് കാറ്റലോഗ് ചെയ്ത് കമ്പ്യൂട്ടറിലൂടെ ലഭ്യമാക്കാനുള്ള നടപടികള്‍, എല്ലാ ഓഫീസുകളിലും വിവരാവകാശവുമായി ബന്ധപ്പെട്ട ബോര്‍ഡുകള്‍ സ്ഥാപിച്ചിട്ടുണ്ടെന്ന പരിശോധന, ഓഫീസ് വെബ്‌സൈറ്റിലെ വിവരങ്ങള്‍ കാലികമാക്കുന്നത് ഉള്‍പ്പടെയുള്ള പ്രവര്‍ത്തനങ്ങള്‍ ക്യാമ്പയിന് കാലയളവില്‍ നടത്തും.
കലക്ടറുടെ ചേംബറില്‍ ചേര്‍ന്ന യോഗത്തില്‍ സംസ്ഥാന വിവരാവകാശ കമീഷണര്‍ അഡ്വ. ടി കെ രാമകൃഷ്ണന്‍, ജില്ലാ കലക്ടര്‍ സ്നേഹില്‍ കുമാര്‍ സിങ്, എഡിഎം പി സുരേഷ്, സബ് കലക്ടര്‍ ഹര്‍ഷില്‍ ആര്‍ മീണ, ജില്ല ഇന്‍ഫര്‍മേഷന്‍ ഓഫീസര്‍ സി പി അബ്ദുല്‍ കരീം, ജില്ല ലോ ഓഫീസര്‍ സി കെ ഫൈസല്‍, വിവിധ വകുപ്പ് മേധാവികള്‍ എന്നിവര്‍ പങ്കെടുത്തു.
- Log in to post comments