വോട്ടർപട്ടിക തീവ്രപരിഷ്കരണ പ്രവര്‍ത്തനങ്ങളോട് എല്ലാവരും സഹകരിക്കണം: ഡോ. എ. അബ്ദുൽ ഹക്കീം

വോട്ടർ പട്ടിക പുതുക്കുന്നതിനുള്ള പ്രത്യേക തീവ്ര പരിഷ്കരണ പ്രവർത്തനങ്ങളോട് എല്ലാവരും സഹകരിക്കണമെന്ന് മുൻ സംസ്ഥാന വിവരാവകാശ കമ്മിഷണർ ഡോ.എ. അബ്ദുൽ ഹക്കീം പറഞ്ഞു. കാർത്തികപ്പള്ളി താലൂക്കുതല എസ് ഐ.ആര്‍ പരിഷ്കരണത്തിൽ ആദ്യ അംഗമായി ചേർന്ന ശേഷം സംസാരിക്കുകയായിരുന്നു അദ്ദേഹം. പട്ടികയിൽ രണ്ടാം അംഗമായി ഭാര്യ സഫറുന്നിസയും ചേർന്നു. തിരഞ്ഞെടുപ്പ് വിഭാഗത്തിലെ ജില്ലാ ഉദ്യോഗസ്ഥർ കാർത്തികപ്പള്ളി പത്തിയൂർ വില്ലേജിലുള്ള ഡോ. ഹക്കീമിന്റെ കുടുംബവീടായ കൊച്ചുപറമ്പിൽ എത്തിയാണ് അംഗത്വ ഫോം നല്കിയത്.
ഇന്ത്യൻ ജനാധിപത്യത്തിൽ ജനങ്ങളാണ് പരമാധികാരികൾ. ജനങ്ങളെ തിരിച്ചറിയുന്നതിനുള്ള ആധികാരിക രേഖയാണ് വോട്ടർ പട്ടിക. വോട്ടർ പട്ടികയിൽ ഉൾപ്പെടുകയും ജനാധിപത്യത്തെ ശക്തിപ്പെടുത്താൻ പങ്കാളികളാവുകയും ചെയ്യേണ്ടത് നമ്മുടെ കടമയാണ്. വോട്ടർ പട്ടിക പരിഷ്കരണം പരമാവധി ഫലവത്താക്കാനും വിജയിപ്പിക്കാനും രാഷ്ട്രീയ പാർട്ടികളും പൊതുപ്രവർത്തകരും സാമൂഹിക പ്രവർത്തകരും റസിഡൻസ് അസോസിയേഷനുകളും സന്നദ്ധ സംഘടനകളും പരമാവധി സഹകരിക്കണം. വോട്ടർ പട്ടികയിൽ ഉൾപ്പെടാൻ അർഹതയുള്ളവരും 18 വയസ്സ് പൂർത്തിയായവരുമായ എല്ലാവരും പട്ടികയിൽ ഉൾപ്പെട്ടിട്ടുണ്ടെന്ന് ഉറപ്പുവരുത്തണം. നിശ്ചിത രേഖകളും സമയക്രമങ്ങളും പാലിച്ച് എല്ലാവരെയും വോട്ടർ പട്ടികയിൽ ഉൾപ്പെടുത്താൻ ശ്രമിക്കുമ്പോഴും സാങ്കേതിക കാരണങ്ങളാൽ നാട്ടിലെ ഒരാളും പട്ടികയിൽ നിന്ന് പുറത്താകുന്നില്ല എന്ന് ഉറപ്പുവരുത്താൻ ഉദ്യോഗസ്ഥർ പ്രത്യേകം ശ്രദ്ധിക്കണമെന്നും ഡോ. ഹക്കീം പറഞ്ഞു.

ചടങ്ങിൽ ഡെപ്യൂട്ടി കലക്ടർ ആർ. സുധീഷ്, വില്ലേജ് ഓഫീസർമാരായ എ.സഹീർ, പത്‌മകുമാർ, ബി.എൽ.ഒ മാരായ ഐ.റിയാസ്, ഹന്നത്ത് എന്നിവരും റെസിഡൻറ്സ് അസോസിയേഷൻ ഭാരവാഹികളായ നസീബ് ഖാൻ, റിയാസ് പുലരി, ഷറഫ് കളത്തിൽ, അബ്ദുൽ മനാഫ്, സലാഹുദ്ദീൻ ഇശൽ, നിസാർ ഇദ്രീസ്, സലീം കടയിൽ, മുഹമ്മദ് ഹനീഫ, ബഷീർ ഫൗസി എന്നിവരും പങ്കെടുത്തു.