ദീർഘനാളായുള്ള സ്വപ്നം യാഥാർത്ഥ്യത്തിലേക്ക്: കുണ്ടറ താലൂക്ക് ആശുപത്രിയിൽ 76.13 കോടിയുടെ ബഹുനില മന്ദിരം

* തിങ്കളാഴ്ച മുഖ്യമന്ത്രി ഉദ്ഘാടനം നിർവഹിക്കും

കൊല്ലം കുണ്ടറ താലൂക്ക് ആശുപത്രിയിൽ നിർമ്മാണം പൂർത്തിയാക്കിയ 7 നില കെട്ടിടത്തിന്റെ ഉദ്ഘാടനം ജനുവരി 19 തിങ്കളാഴ്ച രാവിലെ 10.30ന് മുഖ്യമന്ത്രി പിണറായി വിജയൻ നിർവഹിക്കും. ആരോഗ്യ വകുപ്പ് മന്ത്രി വീണാ ജോർജ് അധ്യക്ഷത വഹിക്കും.

കുണ്ടറ താലൂക്ക് ആശുപത്രിയിൽ വലിയ വികസനമാണ് നടന്നു വരുന്നതെന്ന് മന്ത്രി വീണാ ജോർജ് പറഞ്ഞു. പതിറ്റാണ്ടുകൾക്ക് മുമ്പ് ഓടിട്ട കെട്ടിടത്തിൽ പ്രവർത്തനം ആരംഭിച്ച ആശുപത്രിയാണ് ഈ നിലയിൽ വികസിച്ചത്. കിഫ്ബി ഫണ്ടിൽ നിന്നും 76.13 കോടി രൂപ വിനിയോഗിച്ചാണ് കെട്ടിടം യാഥാർത്ഥ്യമാക്കിയത്. ബേസ്മെന്റ് ഉൾപ്പെടെ 7 നിലയുള്ള കെട്ടിടത്തിൽ 130 ഓളം കിടക്കകളാണ് സജ്ജമാക്കുന്നത്. സ്ഥലപരിമിതി മൂലം ബുദ്ധിമുട്ടുന്ന ആശുപത്രിയുടെ ദീർഘകാലമായുള്ള ആവശ്യമാണ് ഇതിലൂടെ യാഥാർത്ഥ്യമാകുന്നത്. കുണ്ടറയിലേയും സമീപ പ്രദേശങ്ങളിലേയും ജനങ്ങൾക്ക് ഇതേറെ സഹായകരമാകും.

ഇലക്ട്രിക്കൽ റൂം, ഗ്യാസ് മാനിഫോൾഡ്, ലോൺഡ്രി, എസ്.ടി.പി. മോർച്ചറി എന്നിവ ഉൾപ്പെടുന്നതാണ് ബേസ്മെന്റ് ഏരിയ. ബേസ്മെന്റ് ഫ്ലോറിൽ പോസ്റ്റ് മോർട്ടം, ഫ്രീസർ മോർച്ചറി (2), എസ്ടിപി, ഓക്സിജൻ പ്ലാന്റ്, ഫയർ റൂം, ഇലക്ട്രിക്കൽ റൂം, ബയോ മെഡിക്കൽ വേസ്റ്റ് റൂം എന്നിവയുണ്ടാകും. ഗ്രൗണ്ട് ഫ്ലോറിൽ അത്യാഹിത വിഭാഗം, 7 കിടക്കകൾ (ഒബ്സെർവഷൻ), എക്സ് റേ, അൾട്രാസൗണ്ട്, ഒന്നാമത്തെ നിലയിൽ മെയിൽ വാർഡ്, ഫീമെയിൽ വാർഡ്, മെയിൽ സർജിക്കൽ വാർഡ്, ഫീമെയിൽ സർജിക്കൽ വാർഡ്, രണ്ടാമത്തെ നിലയിൽ ഒപി, ലബോറട്ടറി, ബ്ലഡ് സ്റ്റോറേജ് യൂണിറ്റ്, സിഎസ്എസ്ഡി, മൂന്നാമത്തെ നിലയിൽ ഓപ്പറേഷൻ തിയറ്റർ, പോസ്റ്റ് ഓപ്പറേറ്റീവ് വാർഡ്, നാലാമത്തെ നിലയിൽ മെയിൽ വാർഡ്, ഫീമെയിൽ വാർഡ്, ഡെന്റൽ യൂണിറ്റ്, അഞ്ചാമത്തെ നിലയിൽ മെയിൽ വാർഡ്, ഫീമെയിൽ വാർഡ്, പീഡിയാട്രിക് വാർഡ്, ആറാമത്തെ നിലയിൽ പേ വാർഡ് എന്നിവയാണുള്ളത്.

1920 കളിൽ കുണ്ടറ സിറാമിക്സിലെ ജീവനക്കാർക്കും പ്രദേശവാസികൾക്കും വേണ്ടി ഡിസ്പെൻസറിയായി തുടങ്ങിയ ആശുപത്രിയാണ് ഇപ്പോൾ വികസന കുതിപ്പിന്റെ നെറുകയിലെത്തിയിരിക്കുന്നത്. കൊല്ലം ജില്ലയിലെ 4 താലൂക്ക് ആശുപത്രികളിൽ ഒന്നായ കുണ്ടറ താലൂക്ക് ആശുപത്രി അടിസ്ഥാന സൗകര്യങ്ങൾ വിപുലപ്പെടുത്തിയും ആധുനിക ചികിത്സാ സജ്ജീകരണങ്ങൾ സാധ്യമാക്കിയും ആതുര ശുശ്രൂഷ രംഗത്ത് പുതിയ ചുവടുവയ്പ്പിന് ഒരുങ്ങുകയാണ്.

പി.എൻ.എക്സ്. 231/2026