കടുത്ത വേനൽ ചൂട്: തിരഞ്ഞെടുപ്പ് പ്രചാരകർക്കും ഉദ്യോഗസ്ഥർക്കും ജാഗ്രതാനിർദേശവുമായി ആരോഗ്യ വകുപ്പ്

തിരഞ്ഞെടുപ്പ് പ്രചാരകർക്കും ഉദ്യോഗസ്ഥർക്കും  വേനൽക്കാല ജാഗ്രതാനിർദേശവുമായി ആരോഗ്യ വകുപ്പ്. കടുത്ത വേനൽ ആയതിനാൽ നിർജലീകരണ സാധ്യത കൂടുതലാണ്. ദാഹം ഇല്ലെങ്കിൽ കൂടി ഇടയ്ക്കിടെ തിളപ്പിച്ചാറിയ വെള്ളം കുടിക്കുക.
 
കരിക്കിൻ വെള്ളം, സംഭാരം, നാരങ്ങാ വെള്ളം, ഒ.ആർ.എസ് തുടങ്ങിയ പാനീയങ്ങൾ ഉപയോഗിക്കുക. പാനീയങ്ങൾ തയ്യാറാക്കുമ്പോൾ ശുദ്ധജലമാണ് ഉപയോഗിക്കുന്നതെന്ന് ഉറപ്പാക്കുക. ചായ, കാപ്പി, കാർബണേറ്റഡ് ലഘു പാനീയങ്ങൾ, കൃത്രിമ പാനീയങ്ങൾ, മദ്യം എന്നിവ ഒഴിവാക്കുക. ഐസിന്റെ ശുദ്ധത, ഗുണനിലവാരം എന്നിവയെക്കുറിച്ച് ഉറപ്പില്ലെങ്കിൽ പാനീയങ്ങളിൽ ഐസ് ചേർക്കുന്നത് ഒഴിവാക്കുക.

കഴിയുന്നതും ഇളം നിറത്തിലുള്ള അയഞ്ഞ കോട്ടൻ വസ്ത്രങ്ങൾ ധരിക്കാൻ ശ്രദ്ധിക്കുക. പകൽ 11 മുതൽ 3 മണി വരെ താപനില ഉയർന്നുനിൽക്കുന്നതിനാൽ നേരിട്ട് വെയിൽ ഏൽക്കാതിരിക്കാൻ ശ്രദ്ധിക്കുക. പുറത്തിറങ്ങുമ്പോൾ കുട /തൊപ്പി, പാദരക്ഷ എന്നിവ ധരിക്കുക. തലകറക്കം, കഠിനമായ ക്ഷീണം,പേശിവലിവ്, ശക്തി കുറഞ്ഞതും വേഗതയേറിയതുമായ നാഡിമിടിപ്പ് തുടങ്ങിയ ലക്ഷണങ്ങൾ ഉണ്ടായാൽ തണലിലേക്ക് മാറുവാനും  ശരീരം തണുപ്പിക്കാനും  തിളപ്പിച്ചാറിയ വെള്ളം ധാരാളം കുടിക്കുവാനും ശ്രദ്ധിക്കുക. അസ്വാസ്ഥ്യങ്ങൾ തുടരുന്നുവെങ്കിൽ വൈദ്യ സഹായം തേടുക.

11 മണിക്കും 3 മണിക്കും ഇടയിലുള്ള പൊതുസമ്മേളനങ്ങൾ ഒഴിവാക്കുക. പൊതുസമ്മേളനങ്ങളുമായി ബന്ധപ്പെട്ട് തണലിടങ്ങളും കുടിക്കാനായി ശുദ്ധജലവും ഉറപ്പാക്കുക.

പഴവർഗങ്ങൾ ശുദ്ധ ജലത്തിൽ നന്നായി കഴുകിയശേഷം ഉപയോഗിക്കുക. തണ്ണിമത്തൻ പോലെ തോടുള്ള പഴങ്ങൾ കഴുകി വൃത്തിയാക്കിയ ശേഷം മാത്രം മുറിച്ചുപയോഗിക്കുക.പ്രായമുള്ളവർ, രക്താതിമർദ്ദം പ്രമേഹം, ഹൃദ്രോഗം തുടങ്ങി  രോഗങ്ങൾക്ക് ചികിത്സയിലിരിക്കുന്നവർ , ഗർഭിണികൾ തുടങ്ങിയവർ പ്രത്യേകം ശ്രദ്ധിക്കുക.
 
തിരഞ്ഞെടുപ്പ് ഡ്യൂട്ടിയിലെ ഉദ്യോഗസ്ഥർക്കുള്ള അധിക നിർദേശങ്ങൾ
 
സ്ഥിരമായി കഴിച്ചു കൊണ്ടിരിക്കുന്ന മരുന്നുകൾ മുടങ്ങരുത്. കൃത്യസമയത്ത് ആഹാരം കഴിക്കുക. നിർജലീകരണം ഒഴിവാക്കാൻ തിളപ്പിച്ചാറിയ വെള്ളം ഇടയ്ക്കിടെ കുടിക്കുക.

രോഗങ്ങൾക്ക് ചികിത്സയിലിരിക്കുന്നവർ ചികിത്സാ വിവരങ്ങൾ, കഴിക്കുന്ന മരുന്നുകളുടെ വിവരങ്ങൾ, ഇൻസുലിൻ ഡോസ് എന്നിവ എഴുതിയത് കയ്യിൽ  കരുതേണ്ടതാണ്. കുഴഞ്ഞുവീഴൽ പോലെയുള്ള ആരോഗ്യ അടിയന്തര ഘട്ടങ്ങളിൽ പരിശീലനം ശാസ്ത്രീയമായി ലഭിച്ചവരുടെ സേവനം പ്രയോജനപ്പെടുത്താവുന്നതാണ്. സമയനഷ്ടം വരുത്താതെ 108 ആംബുലൻസ് വിളിച്ച് വൈദ്യസഹായം ഉറപ്പാക്കുക.

പോളിംഗ് ഡ്യൂട്ടിയിൽ ഏർപ്പെട്ടിട്ടുള്ള രോഗസാധ്യത കൂടുതൽ ഉള്ളവർ ചെറിയ ശാരീരിക അസ്വാസ്ഥ്യങ്ങൾ പോലും അവഗണിക്കരുത്. പെട്ടെന്ന് കിടക്കാൻ ശ്രമിക്കുക .108 ആംബുലൻസ് വിളിച്ച് അടുത്തുള്ള ആരോഗ്യ സ്ഥാപനത്തിൽ ചികിത്സ തേടുക
 മാനസിക സമ്മർദ്ദം ഒഴിവാക്കാൻ ശ്രദ്ധിക്കുക.

അടിയന്തര സാഹചര്യങ്ങളിൽ ബന്ധപ്പെടേണ്ട വ്യക്തിയുടെ ഫോൺ നമ്പർ മറ്റുള്ളവർക്ക് എളുപ്പത്തിൽ ലഭിക്കുന്ന വിധം പോക്കറ്റ്/പേഴ്സിൽ കരുതുക
പാമ്പുകടി, പട്ടി കടി പോലെ ജന്തുക്കളിൽ നിന്ന് ഉണ്ടാകാവുന്ന അപകടങ്ങൾ സമചിത്തതയോടെ കൈകാര്യം ചെയ്യുക . പാമ്പുകടിയേറ്റ വ്യക്തിയെ ഭീതിപ്പെടുത്താതെ പരമാവധി ശരീര ചലനം ഉണ്ടാകാത്ത വിധം  എത്രയും പെട്ടെന്ന്  108 ആംബുലൻസ് വിളിച്ച്  വൈദ്യസഹായം ഉറപ്പാക്കുക.

നായ/പൂച്ചയുടെ കടിയേറ്റാൽ സോപ്പ് ഉപയോഗിച്ച്  15 മിനിറ്റ് പൈപ്പ് വെള്ളത്തിൽ നന്നായി കഴുകിയ ശേഷം വാക്സിൻ ലഭ്യമാക്കുക. പോളിംഗ് സാമഗ്രികളുടെ വിതരണ സ്വീകരണ കേന്ദ്രങ്ങളിൽ മെഡിക്കൽ ടീമിൻ്റെ സേവനം ഉണ്ടായിരിക്കുന്നതാണ്.പോളിംഗ് ദിനങ്ങളിൽ 108 ആംബുലൻസ് സേവനം  ലഭ്യമാണ്.