**അനധികൃത ഉപയോഗം; ഗ്യാസ് സിലിണ്ടറുകളും കൺസ്യൂമർ കാർഡുകളും പിടിച്ചെടുത്തു**

നടവയലിലെ സ്വകാര്യ സ്ഥാപനത്തിൽ അനധികൃതമായി ഉപയോഗിച്ചിരുന്ന ഗ്യാസ് സിലിണ്ടറുകൾ പിടിച്ചെടുത്തു. വീട്ടാവശ്യത്തിന് മാത്രം ഉപയോഗിക്കേണ്ടുന്ന വിവിധ കമ്പനികളുടെ 12 ഗ്യാസ് സിലിണ്ടറുകളാണ് ഈ സ്ഥാപനത്തിൽ നിന്ന് സുൽത്താൻ ബത്തേരി താലൂക്ക് സപ്ലൈ ഓഫീസർ പി.എസ് പ്രവീണിന്റെ നേതൃത്വത്തിൽ നടത്തിയ പരിശോധനയിൽ കണ്ടെത്തിയത്. 11 കൺസ്യൂമർ കാർഡുകളും ഈ സ്ഥാപനത്തിൽ സൂക്ഷിച്ചിരുന്നു. ഇവയും പിടിച്ചെടുത്തിട്ടുണ്ട്. റേഷനിങ് ഇൻസ്പെക്ടർ കെ.ബി പ്രസാദ്, എം അനൂപ് എന്നിവരും പരിശോധനയിൽ പങ്കെടുത്തു. പാചക വാതക സിലിണ്ടറുകൾ അനധികൃതമായി സംഭരിക്കുകയും ഉപയോഗിക്കുകയും ചെയ്യുന്നവർക്കെതിരെ അവശ്യസാധന നിയമപ്രകാരവും കർശന നടപടികൾ സ്വീകരിക്കുമെന്ന് ജില്ലാ സപ്ലൈ ഓഫീസർ അറിയിച്ചു. ഗ്യാസ് സിലിണ്ടറുകളുടെ അനധികൃത ഉപയോഗം കണ്ടെത്താൻ പരിശോധനകൾ തുടരുകയാണ്.