അറിയിപ്പുകൾ

ഫെയർ മീറ്ററുകളുടെ  മുദ്രവയ്ക്കൽ: സംസ്ഥാനതല ക്യാമ്പുകൾക്ക് ഇന്ന് (ജൂലൈ 11) തുടക്കം

​  ഓട്ടോറിക്ഷാ തൊഴിലാളികൾക്ക് ആശ്വാസമായി ഫെയർ മീറ്ററുകളുടെ പുനഃപരിശോധനയ്ക്കും മുദ്രവയ്ക്കലിനുമായി ലീഗൽ മെട്രോളജി വകുപ്പ് പ്രത്യേക ക്യാമ്പുകൾ സംഘടിപ്പിക്കുന്നു. സർക്കാരിന്റെ നൂറുദിന കർമപരിപാടിയുടെ ഭാഗമായി നടത്തുന്ന ഈ പദ്ധതിയുടെ സംസ്ഥാനതല ഉദ്ഘാടനം ഇന്ന് (ജൂലൈ 11) രാവിലെ ഒൻപതിന് കൂത്താട്ടുകുളം മുനിസിപ്പൽ ടൗൺ ഹാളിൽ ഭക്ഷ്യ-പൊതുവിതരണ വകുപ്പ് മന്ത്രി  അനൂപ് ജേക്കബ് നിർവഹിക്കും.

​നിലവിൽ ഫെയർ മീറ്ററുകൾ മുദ്രവയ്ക്കുന്നതിനായി നാൽപ്പതും അൻപതും കിലോമീറ്റർ സഞ്ചരിച്ച് ജില്ലാ കേന്ദ്രങ്ങളിൽ എത്തേണ്ടി വരുന്ന ബുദ്ധിമുട്ട് പരിഹരിക്കാനാണ് പ്രാദേശികമായി ക്യാമ്പുകൾ ഒരുക്കുന്നത്. 

 15 കിലോമീറ്റർ ചുറ്റളവിൽ ഈ സേവനം ലഭ്യമാക്കുമെന്ന് അധികൃതർ അറിയിച്ചു.

സ്വയംതൊഴിൽ പദ്ധതി: പട്ടികജാതി വിഭാഗങ്ങളിൽനിന്ന് അപേക്ഷ ക്ഷണിച്ചു
​പട്ടികജാതി വിഭാഗ പുനരധിവാസ പദ്ധതിയുടെ ഭാഗമായി 2026-27 വർഷത്തെ സ്വയംതൊഴിൽ പദ്ധതിയിലേക്ക് എറണാകുളം ജില്ലയിൽനിന്ന് അപേക്ഷ ക്ഷണിച്ചു. അരുന്ധതിയാർ, ചക്ലിയൻ, വേടൻ, നായാടി, കള്ളാടി വിഭാഗങ്ങളിൽപെട്ടവർക്കാണ് അവസരം.
​കൃഷി, മൃഗസംരക്ഷണം, ക്ഷീരവികസനം, വ്യവസായം എന്നീ വകുപ്പുകളിലെ വിദഗ്ധർ സാക്ഷ്യപ്പെടുത്തിയ പ്രൊജക്റ്റ് റിപ്പോർട്ടിന്റെ അടിസ്ഥാനത്തിൽ മൂന്ന് ലക്ഷം രൂപ വരെ ഗ്രാന്റായി ലഭിക്കും. അപേക്ഷകർ 18–50 പ്രായപരിധിയിലുള്ളവരും നിലവിൽ സ്ഥിര വരുമാനമില്ലാത്തവരുമാകണം.

​

ബന്ധപ്പെട്ട മേഖലയിലെ പ്രായോഗിക പരിചയവും കുടുംബ വാർഷിക വരുമാനം ഒരു ലക്ഷം രൂപയിൽ താഴെയുമുള്ളവർക്ക് അപേക്ഷിക്കാം. 

അപേക്ഷ സമർപ്പിക്കേണ്ട അവസാന തീയതി ജൂലൈ 25. കൂടുതൽ വിവരങ്ങൾക്ക് ബ്ലോക്ക്/മുനിസിപ്പാലിറ്റി/കോർപ്പറേഷൻ പട്ടികജാതി വികസന ഓഫീസുമായി ബന്ധപ്പെടണം.