യുവ പ്രതിഭ പുരസ്‌കാരത്തിനും യുവജന ക്ലബ്ബുകള്‍ക്കുള്ള  അവാര്‍ഡിനും അപേക്ഷിക്കാം

             സംസ്ഥാന യുവജനക്ഷേമ ബോര്‍ഡ് 2018-ലെ സ്വാമി വിവേകാനന്ദന്‍ യുവപ്രതിഭാ പുരസ്‌കാരത്തിനും, മികച്ച യുവജനക്ലബ്ബിനുള്ള  അവാര്‍ഡിനും അപേക്ഷ ക്ഷണിച്ചു. വ്യക്തിഗത അവാര്‍ഡിനായി 18നും 40നും മധ്യേ പ്രായമുള്ളവര്‍ക്ക് അപേക്ഷിക്കാം. സാമൂഹ്യപ്രവര്‍ത്തനം, മാധ്യമപ്രവര്‍ത്തകന്‍(പ്രിന്റ് മീഡിയ), മാധ്യമ പ്രവര്‍ത്തക (പ്രിന്റ് മീഡിയ), മാധ്യമ പ്രവര്‍ത്തകന്‍ (ദ്യശ്യമാധ്യമം), മാധ്യമ പ്രവര്‍ത്തക(ദ്യശ്യമാധ്യമം), കല, സാഹിത്യം(വനിത), സാഹിത്യം(പുരുഷന്‍), ഫൈന്‍ ആര്‍ട്‌സ്, കായികം(വനിത), കായികം(പുരുഷന്‍), ശാസ്ത്രം(പുരുഷന്‍), ശാസ്ത്രം(വനിത), സംരംഭകത്വം, ക്യഷി, എന്നീ മേഖലകളില്‍ നിന്നും മികച്ച ഓരോ വ്യക്തിക്കു വീതം ആകെ 15 പേര്‍ക്കാണ് അവാര്‍ഡ് നല്‍കുന്നത്. അവാര്‍ഡിനായി സ്വയം അപേക്ഷ സമര്‍പ്പിക്കുകയോ മറ്റൊരു വ്യക്തിയെ നാമനിര്‍ദ്ദേശം ചെയ്യുകയോ ചെയ്യാവുന്നതാണ്. ഈ വര്‍ഷം മുതല്‍ കേരള സംസ്ഥാന യുവജനക്ഷേമ ബോര്‍ഡിലെ മികച്ച യൂത്ത് കോ-ഓര്‍ഡിനേറ്റര്‍ക്ക് സംസ്ഥാനതലത്തില്‍ അവാര്‍ഡ് ഏര്‍പ്പെടുത്തിയിട്ടുണ്ട്. അതാത് മേഖലയില്‍ വിദഗ്ദ്ധരുള്‍പ്പെടുന്ന ജൂറി അപേക്ഷകരുടെ പ്രവര്‍ത്തനങ്ങളെ വിലയിരുത്തിയാണ് ജേതാക്കളെ തെരെഞ്ഞെടുക്കുന്നത്. അവാര്‍ഡിന് അര്‍ഹരാകുന്നവര്‍ക്ക് 50,000 രൂപയും പ്രശസ്തിപത്രവും പുരസ്‌കാരവും നല്‍കുന്നു.

        കൂടാതെ കേരള സംസ്ഥാന യുവജനക്ഷേമ ബോര്‍ഡില്‍ അഫിലിയേറ്റ് ചെയ്തിട്ടുള്ള  യൂത്ത്/യുവ ക്ലബ്ബുകളില്‍ നിന്നും അപേക്ഷ ക്ഷണിച്ചു. ജില്ലാതലത്തില്‍ തെരഞ്ഞെടുക്കുന്ന മികച്ച ക്ലബ്ബിന് 30,000 രൂപയും പ്രശസ്തി പത്രവും പുരസ്‌കാരവും നല്‍കുന്നു. ജില്ലാതലത്തില്‍ അവാര്‍ഡിനര്‍ഹത നേടിയ ക്ലബുകളെയാണ് സംസ്ഥാന തലത്തിലെ അവാര്‍ഡിനായി പരിഗണിക്കുന്നത്. സംസ്ഥാന അവാര്‍ഡ് നേടുന്ന ക്ലബ്ബിന് 50,000രൂപയും, പ്രശസ്തിപത്രവും, പുരസ്‌കാരവും നല്‍കുന്നതാണ്. ഇതിനായുള്ള അപേക്ഷകള്‍ ഈ മാസം 15നുള്ളില്‍ അതത് ജില്ലാ യുവജനകേന്ദ്രത്തില്‍ ലഭിക്കേണ്ടതാണ്. മാര്‍ഗനിര്‍ദ്ദേശങ്ങളും അപേക്ഷഫോറവും കേരള സംസ്ഥാന യുവജനക്ഷേമ ബോര്‍ഡ് പത്തനംതിട്ട ജില്ലാ യുവജനകേന്ദ്രത്തിലും കേരള സംസ്ഥാന യുവജനക്ഷേമ ബോര്‍ഡിന്റെ വെബ് സൈറ്റിലും ലഭ്യമാണ്. (www.ksywb.kerala.gov.in) ഹെല്‍പ് ലൈന്‍ നമ്പര്‍ - 0471 2733139, 0468 2231938.                                                                  (പിഎന്‍പി 29/19)