ധൈര്യമുണ്ടോ ഈ ഗോസ്റ്റ് ഹൗസിൽ കയറാൻ

ഓണാഘോഷങ്ങൾക്ക് മാറ്റുകൂട്ടാൻ കനകക്കുന്നിലെ മേളയിൽ പേടിപ്പിച്ചും രസിപ്പിച്ചും ഗോസ്റ്റ് ഹൗസ് ശ്രദ്ധേയമാകുന്നു. കുട്ടികളെയും മുതിർന്നവരെയും ഒരുപോലെ പേടിപ്പിക്കുകയും അതേസമയം വിസ്മയിപ്പിക്കുകയും ചെയ്യുന്ന രീതിയിലാണ് ഗോസ്റ്റ് ഹൗസ് സജ്ജീകരിച്ചിരിക്കുന്നത്. ഡാർക്ക് വൈബ്സ് എന്റർടെയ്ൻമെന്റാണ് ഈ വിനോദ പരിപാടി സംഘടിപ്പിക്കുന്നത്.

അത്യാധുനിക ശബ്ദ, വെളിച്ച സംവിധാനങ്ങളോടെ നിഗൂഢത നിറഞ്ഞ ഏഴ് വ്യത്യസ്ത മുറികളാണ് ഗോസ്റ്റ് ഹൗസിൽ സന്ദർശകരെ കാത്തിരിക്കുന്നത്. ഓരോ മുറിയിലും അപ്രതീക്ഷിതമായ ഞെട്ടിക്കുന്ന കാഴ്ചകളാണ് ഒരുക്കിയിട്ടുള്ളത്. വൈകിട്ട് 4 മണി മുതൽ രാത്രി 11 മണി വരെയാണ് പ്രവേശനം. 60 രൂപയാണ് ടിക്കറ്റ് നിരക്ക്.

ഗോസ്റ്റ് ഹൗസിന് പുറമെ കുട്ടികൾക്കായി പ്രത്യേക അമ്യൂസ്മെന്റ് പാർക്കും കാർ ഫൺ റൈഡുകളും മേളയിലുണ്ട്. കുടുംബത്തോടെത്തുന്നവർക്ക് പണം സമ്മാനമായി നേടാൻ അവസരമൊരുക്കുന്ന ഫാമിലി ഗെയിമുകളും സജ്ജമാണ്. രുചികരമായ ലഘുഭക്ഷണങ്ങൾ, ശീതളപാനീയങ്ങൾ, ഐസ്ക്രീം സ്റ്റാളുകൾ എന്നിവയും മേളയ്ക്ക് മാറ്റുകൂട്ടുന്നു.