ദേശീയപാതയിലെ കരാറുകാരനെതിരെ നടപടി

കൊല്ലം മുതൽ ആലപ്പുഴ വരെയുള്ള ദേശീയപാതയുടെ നിർമാണത്തിലെ കാലതാമസവും മോശം അവസ്ഥയും സംബന്ധിച്ച മാധ്യമപ്രവർത്തകരുടെ ചോദ്യത്തിന്, കരാറുകാരന്റെ ഭാഗത്തുനിന്ന് ഗുരുതരമായ വീഴ്ചയുണ്ടായതായി ദേശീയപാത അതോറിറ്റി തന്നെ സമ്മതിച്ചിട്ടുണ്ടെന്ന് കെ.സി. വേണുഗോപാൽ പറഞ്ഞു. കൊറ്റൻകുളങ്ങര മുതൽ കളർകോട് വരെയുള്ള ഭാഗത്ത് നിർമാണ പുരോഗതിയില്ല. കരാർ റദ്ദാക്കുന്നതുൾപ്പെടെയുള്ള ശക്തമായ നടപടികൾ സ്വീകരിക്കേണ്ടിവരുമെന്നാണ് ദേശീയപാത അതോറിറ്റി അറിയിച്ചിട്ടുള്ളത്.

ദേശീയപാതയിലെ സുരക്ഷാ പ്രശ്നങ്ങളിൽ ഏറ്റവും പ്രധാനപ്പെട്ടത് സർവീസ് റോഡുകളുടെ ശോച്യാവസ്ഥയാണ്. വീതിക്കുറവും ഡ്രെയിനേജ് സംവിധാനത്തിന്റെ അഭാവവും യാത്രക്കാർക്ക് വലിയ അപകടസാധ്യത സൃഷ്ടിക്കുന്നു. പ്രധാന ദേശീയപാത ഉദ്ഘാടനം ചെയ്യുന്നതിനൊപ്പം തന്നെ സുരക്ഷിതവും സഞ്ചാരയോഗ്യവുമായ സർവീസ് റോഡുകളും പൊതുജനങ്ങൾക്ക് ലഭ്യമാക്കണമെന്ന് പി.എ.സി കർശന നിർദേശം നൽകിയിട്ടുണ്ട്. അരൂർ-തുറവൂർ എലിവേറ്റഡ് ഹൈവേയുടെ താഴെയുള്ള റോഡ് മാതൃകയിൽ മറ്റ് പ്രദേശങ്ങളിലെയും സർവീസ് റോഡുകൾ സഞ്ചാരയോഗ്യമാക്കണമെന്നും ആവശ്യപ്പെട്ടിട്ടുണ്ട്.