പരാതികൾക്ക് അതിവേഗ പരിഹാരം കോതമംഗലത്ത് ജനസമ്പർക്ക പരിപാടിക്ക് തുടക്കം

 ജനങ്ങളുടെ പ്രശ്നങ്ങൾക്ക് അടിയന്തര പരിഹാരം ഉറപ്പാക്കുന്നതിനായി കോതമംഗലം നിയോജകമണ്ഡലത്തിൽ ഷിബു തെക്കുംപുറം എം എൽ എ യുടെ നേതൃത്വത്തിൽ ജനസമ്പർക്ക പരിപാടിക്ക് തുടക്കമായി. കോട്ടപ്പടി പഞ്ചായത്തിൽ നടന്ന മണ്ഡലതല ഉദ്ഘാടനം മന്ത്രി വി. ഇ. അബ്ദുൽ ഗഫൂർ നിർവഹിച്ചു.

കോട്ടപ്പടി പഞ്ചായത്തിൽ നടന്ന ആദ്യ പരിപാടിയിൽ പൊതുജനങ്ങളിൽ നിന്നും മുന്നൂറോളം അപേക്ഷകളാണ് ലഭിച്ചത്. ഇതിൽ നൂറിലേറെ പരാതികൾക്ക് വേദിയിൽത്തന്നെ പരിഹാരം കണ്ടെത്താൻ സാധിച്ചു. വിവിധ സർക്കാർ വകുപ്പുകളിലെ ഉദ്യോഗസ്ഥരെ ഒരേ വേദിയിൽ എത്തിച്ചതുകൊണ്ടാണ് ഒട്ടേറെ പരാതികളിൽ അടിയന്തര ഇടപെടൽ സാധ്യമായത് . ശേഷിക്കുന്ന അപേക്ഷകൾ തുടർനടപടികൾക്കായി ബന്ധപ്പെട്ട വകുപ്പുകൾക്ക് കൈമാറി.

ജനങ്ങൾ സർക്കാർ ഓഫീസുകൾ കയറിയിറങ്ങാതെ ബന്ധപ്പെട്ട ഉദ്യോഗസ്ഥരുമായി നേരിട്ട് സംവദിക്കാനും പരാതികളിൽ പരിഹാരസാധ്യതകൾ തേടാനുമുള്ള  അവസരമാണ് ഈ പരിപാടിയിലൂടെ ലഭിക്കുന്നത്. കോട്ടപ്പടിയിലെ തുടക്കത്തിന് ശേഷം മണ്ഡലത്തിലെ ബാക്കി ഏഴ് പഞ്ചായത്തുകളിലും നഗരസഭയിലും ജനസമ്പർക്ക പരിപാടികൾ സംഘടിപ്പിക്കുമെന്ന് അധികൃതർ അറിയിച്ചു.

ചടങ്ങിൽ ഷിബു തെക്കുംപുറം എംഎൽഎ അധ്യക്ഷനായി. ഡീൻ കുര്യാക്കോസ് എംപി, നഗരസഭ അധ്യക്ഷ ഭാനുമതി രാജു, ബ്ലോക്ക് പഞ്ചായത്ത് പ്രസിഡന്റ് ജെസി സാജു, പഞ്ചായത്ത് വൈസ് പ്രസിഡന്റ് വിജോയ് പി ജോസഫ്, പഞ്ചായത്ത് പ്രസിഡന്റുമാരായ ഉമേഷ് ശിവകുമാർ, പി കെ മൊയ്‌ദു, ബിന്ദു ജോർജ്, ജില്ലാ പഞ്ചായത്ത് അംഗങ്ങളായ പി എ എം ബഷീർ, ജോമി തെക്കേക്കര, ബ്ലോക്ക് പഞ്ചായത്ത് ക്ഷേമകാര്യ സ്ഥിരസമിതി അധ്യക്ഷൻ സി എം ബേബി എന്നിവർ പങ്കെടുത്തു