മലയാള ഭാഷാവാരാചരണം ജീവിതത്തിന്റെ അടിസ്ഥാന സാഹിത്യം :
ജീവിതത്തിന്റെ അടിസ്ഥാനം സാഹിത്യമാണെന്നും ജീവിതത്തിന്റെ സമസ്ത മേഖലകളിലും സാഹിത്യം അതിന്റെ സാന്നിദ്ധ്യമറിയിക്കുന്നത് കൊണ്ടാണിങ്ങനെ പറയുന്നതെന്നും എഴുത്തുകാരായ പി.എഫ്.മാത്യുസും സംഗീത ശ്രീനിവാസനും അഭിപ്രായപ്പെട്ടു. മലയാള ഭാഷാ വാരാചരണത്തിന്റെ ഭാഗമായി കുട്ടനെല്ലൂര്‍ ശ്രീ സി അച്യുതമേനോന്‍ ഗവണ്‍മെന്റ് കോളേജില്‍ ജില്ലാ ഇന്‍ഫര്‍മേഷന്‍-പബ്ലിക് റിലേഷന്‍സ് വകുപ്പ് സംഘടിപ്പിച്ച 'നോവല്‍ അനുഭവങ്ങള്‍' എന്ന വിഷയത്തില്‍ സംസാരിക്കുകയായിരുന്നു ഇരുവരും. വെറും അനുഭവങ്ങള്‍ മാത്രമാവണമെന്നില്ല. എഴുത്തിന്റെ അടിസ്ഥാനം.
രചനയില്‍ അനുഭവങ്ങളെന്നത് ഒരു ഘടകം മാത്രമാണ്. യഥാര്‍ത്ഥ അനുഭവങ്ങള്‍. രചനകളായി മാറണമെന്നു പോലും നിര്‍ബന്ധമില്ല. സാങ്കല്‍പ്പിക ചിന്തകളും അവ നിര്‍മ്മിക്കുന്ന ലോകവും എഴുത്തിന് ഊര്‍ജ്ജമാകുന്ന നിരവധി സന്ദര്‍ഭങ്ങള്‍ മലയാള സാഹിത്യ രംഗത്ത് കാണാം. യഥാര്‍ത്ഥ അനുഭവങ്ങളില്‍ നിന്നും കാതലുളള രചനകളും മലയാളത്തില്‍ ഉണ്ടായിട്ടുണ്ട്. ഉള്‍വിളികളും കഥാബീജത്തിന്റെ വികാസത്തിന് സഹായകമാവുന്നുണ്ട്.
ഭാഷയ്ക്ക് മരണമില്ലെന്നും സാങ്കേതികവിദ്യയുടെ അടിത്തറയിലൂന്നി ഭാഷ ശക്തിപ്പെടുകയാണ് ചെയ്യുന്നതെന്നും ഇരുവരും വ്യക്തമാക്കി. എഴുത്ത്-വായന അനുഭവങ്ങളും ഇരുവരും വിദ്യാര്‍ത്ഥികളോട് പങ്ക് വച്ചു. കോളേജ് എഴുത്ത് ക്ലബിന്റെയും ചരിത്രവിഭാഗത്തിന്റെയും സഹകരണത്തോടെയായിരുന്നു സെമിനാര്‍ സംഘടിപ്പിച്ചത്.
കോര്‍പ്പറേഷന്‍ കൗണ്‍സിലര്‍ എം.എന്‍.ശശിധരന്‍ ഉദ്ഘാടനം ചെയ്തു. ജില്ലാ ഇന്‍ഫര്‍മേഷന്‍ ഓഫീസര്‍ വി.ആര്‍.സന്തോഷ് അദ്ധ്യക്ഷത വഹിച്ചു. വൈസ് പ്രിന്‍സിപ്പാള്‍ സി.കെ.തോമസ് മുഖ്യാതിഥിയായി. ചരിത്രവിഭാഗം അസിസ്റ്റന്റ് പ്രൊഫസര്‍ പി.എസ്.മനോജ് കുമാര്‍ മോഡറേറ്ററായി. അസിസ്റ്റന്റ് എഡിറ്റര്‍ എന്‍.സതീഷ് കുമാര്‍ സ്വാഗതവും സംസ്‌കൃതം അസിസ്റ്റന്റ് പ്രൊഫസര്‍ ഡോ.ടി.എസ്.അജിത നന്ദിയും പറഞ്ഞു.
- Log in to post comments