അധികൃതരുടെ നിര്ദേശം പാലിക്കണം
ഉരുള്പൊട്ടല് സാധ്യതയുള്ള പ്രദേശങ്ങളില് താമസിക്കുന്നവരും ജിയോളജിക്കല് സര്വേ ഓഫ് ഇന്ത്യ വാസയോഗ്യമല്ലാത്തതെന്ന് കണ്ടെത്തിയ പ്രദേശങ്ങളില് താമസിക്കുന്നവരും പ്രളയത്തിലും ഉരുള്പൊട്ടലിലുമായി പൂര്ണമായി വീട് നഷ്ടപ്പെടുകയും ഇതുവരെ നിര്മാണം കഴിയാത്ത വീടുകളില് താമസിക്കുന്നവരും പ്രളയത്തില് ഭാഗികമായി കേടുപാടുകള് സംഭവിക്കുകയും അറ്റകുറ്റപ്പണികള് തീര്ക്കാത്ത വീടുകളില് താമസിക്കുന്നവരും എമെര്ജന്സി കിറ്റ് തയ്യാറാക്കി വെയ്ക്കണം. മാറി താമസിക്കേണ്ട സാഹചര്യം വരികയാണെങ്കില് അധികൃതര് നിര്ദേശിക്കുന്ന സുരക്ഷിത സ്ഥാനത്തേക്ക് മാറിത്താമസിക്കാന് തയ്യാറാവണം.
ഓറഞ്ച്, യെല്ലോ അലര്ട്ടുകള് പ്രഖ്യാപിച്ച പ്രളയ സാധ്യതയുള്ള പ്രദേശങ്ങളില് താമസിക്കുന്നവരും 2018 ലെ പ്രളയത്തില് വെള്ളം കയറിയ പ്രദേശങ്ങളില് താമസിക്കുന്നവരും അടച്ചുറപ്പില്ലാത്ത വീടുകളില് താമസിക്കുന്നവരും പ്രധാനപ്പെട്ട രേഖകളും വിലപ്പെട്ട വസ്തുക്കളും ഉള്പ്പെടുന്ന ഒരു എമെര്ജന്സി കിറ്റ് തയ്യാറാക്കി വെയ്ക്കണം.
എമെര്ജന്സി കിറ്റില് സൂക്ഷിക്കേണ്ട വസ്തുക്കള്
- ടോര്ച്ച്
- റേഡിയോ
- 500 മില്ലിലിറ്റര് വെള്ളം
- ഓ.ആര്.എസ് പാക്കറ്റ്
- അത്യാവശ്യം വേണ്ട മരുന്ന്
- മുറിവിന് പുരട്ടുന്ന മരുന്ന്
- ഒരു ചെറിയ കുപ്പി ആന്റി സെപ്ടിക് ലോഷന്
- 100 ഗ്രാം കപ്പലണ്ടി
- 100 ഗ്രാം ഉണക്ക മുന്തിരി അല്ലെങ്കില് ഈന്തപ്പഴം
- ചെറിയ ഒരു കത്തി
- 10 ക്ലോറിന് ടാബ്ലെറ്റ്
- ഒരു ബാറ്ററി ബാങ്ക് അല്ലെങ്കില് ടോര്ച്ചില് ഇടാവുന്ന ബാറ്ററി
- ബാറ്ററിയും, കോള് പ്ലാനും ചാര്ജ് ചെയ്ത ഒരു സാധാരണ മൊബൈല് ഫോണ്
- അത്യാവശ്യം കുറച്ച് പണം, എ.ടി.എം കാര്ഡ്
എമെര്ജന്സി കിറ്റ് തയ്യാറാക്കി വീട്ടില് എല്ലാവര്ക്കും എടുക്കാന് പറ്റുന്ന തരത്തില് സുരക്ഷിതമായ ഒരിടത്ത് വെക്കുകയും വീട്ടിലെ സ്ത്രീകളും കുട്ടികളും മുതിര്ന്നവരുമുള്പ്പെടെ അടിയന്തര സാഹചര്യത്തില് ആരെയും കാത്ത് നില്ക്കാതെ എമെര്ജന്സി കിറ്റുമായി സുരക്ഷിത ഇടത്തേക്ക് മാറുന്ന തരത്തിലേക്ക് വീട്ടിലുള്ള എല്ലാവരെയും പ്രാപ്തരാക്കുകയും ചെയ്യണം.
അലര്ട്ട് പ്രഖ്യാപിച്ച ദിവസങ്ങളില് പാലിക്കേണ്ട പൊതു നിര്ദേശങ്ങള്
- ഉരുള്പൊട്ടല് സാധ്യത ഉള്ളതിനാല് രാത്രി സമയത്ത് മലയോരമേഖലയിലേക്കുള്ള യാത്ര ഒഴിവാക്കുക
- മലയോര മേഖലയിലെ റോഡുകള്ക്ക് കുറുകെ ഉള്ള ചെറിയ ചാലുകളിലൂടെ മലവെള്ള പാച്ചിലും ഉരുള്പൊട്ടലും ഉണ്ടാവാന് സാധ്യതയുള്ളതിനാല് ഇത്തരം ചാലുകളുടെ അരികില് വാഹനങ്ങള് നിര്ത്തരുത്.
- മലയോര മേഖലയിലും ബീച്ചുകളിലും വിനോദ സഞ്ചാരത്തിന് പോവരുത്.
- സമൂഹ മാധ്യമങ്ങളിലൂടെ തെറ്റായ വിവരങ്ങള് പ്രചരിപ്പിക്കരുത്
- ഒരു കാരണവശാലും നദി മുറിച്ചു കടക്കരുത്.
- പാലങ്ങളിലും നദിക്കരയിലും മറ്റും കയറി സെല്ഫി എടുക്കരുത്.
- പുഴകളിലും തോടുകളിലും ജലനിരപ്പ് ഉയരാന് സാധ്യതയുള്ളതിനാല് ചാലുകളിലും, വെള്ളകെട്ടിലും മഴയത്ത് ഇറങ്ങാതിരിക്കണം. കുട്ടികള് ഇറങ്ങുന്നില്ലെന്ന് മുതിര്ന്നവര് ഉറപ്പുവരുത്തണം. നദിയില് കുളിക്കുന്നതും തുണി നനയ്ക്കുന്നതും കളിക്കുന്നതും ഒഴിവാക്കുക.
- ദൃശ്യ-ശ്രവ്യ മാധ്യമങ്ങളില് വരുന്ന മുന്നറിയിപ്പുകള് ശ്രദ്ധിക്കുക.
- ആകാശവാണിയുടെ തൃശൂര്, കോഴിക്കോട് നിലയങ്ങള് ശ്രദ്ധിക്കുക
- തൊട്ടടുത്ത ക്യാമ്പുകളിലേക്ക് ആവശ്യമെങ്കില് മാറി താമസിക്കുക. ഓരോ വില്ലേജിലെയും ആളുകള്ക്ക് സുരക്ഷിതമായ സ്ഥാനങ്ങള് അതാതു പ്രാദേശിക ഭരണകൂടങ്ങള് നിങ്ങളെ അറിയിച്ചാല് ഉടനെ സ്വമേധയാ മാറാന് ശ്രമിക്കുക.
- ജലം കെട്ടിടത്തിനുള്ളില് പ്രവേശിച്ചാല് വൈദ്യുത ആഘാതം ഒഴിവാക്കുവാനായി മെയിന് സ്വിച്ച് ഓഫാക്കുക.
- ജില്ലാ എമെര്ജന്സി ഓപ്പറേഷന് സെന്റര് നമ്പരുകള് 1077, ജില്ലയ്ക്ക് പുറത്തുനിന്നാണ് വിളിക്കുന്നതെങ്കില് എസ്.ടി.ഡി കോഡ് ചേര്ക്കുക
- പഞ്ചായത്ത് അധികൃതരുടെ ഫോണ് നമ്പര് കൈയില്് സൂക്ഷിക്കുക.
- വീട്ടില് അസുഖമുള്ളവരെയും അംഗപരിമിതരെയും ഭിന്നശേഷിക്കാരെയും പ്രായമായവരെയും കുട്ടികളെയും പ്രത്യേകം ശ്രദ്ധിക്കുക.
- വെള്ളം വീട്ടില് കയറിയാലും വൈദ്യുതോപകരണങ്ങള് നശിക്കാത്ത തരത്തില് ഉയരത്തില് വെക്കുക.
- വളര്ത്തു മൃഗങ്ങളെ സുരക്ഷിത സ്ഥാനത്തേക്ക് മാറ്റുകയോ അതിനു പറ്റാത്ത അവസ്ഥയില് കെട്ടഴിച്ചു വിടുകയോ ചെയ്യുക.
- വാഹനങ്ങള് ഉയര്ന്ന പ്രദേശങ്ങളിലേക്ക് മാറ്റി പാര്ക്ക് ചെയ്യുക.
- താഴ്ന്ന പ്രദേശത്തെ ഫ്ളാറ്റുകളില് ഉള്ളവര് ഫ്ളാറ്റിന്റെ സെല്ലാറില് കാര് പാര്ക്ക് ചെയ്യാതെ കൂടുതല് ഉയര്ന്ന സ്ഥലങ്ങളില് പാര്ക്ക് ചെയ്യുക.
- രക്ഷാപ്രവര്ത്തനങ്ങളില് പരിശീലനം ലഭിച്ചവര് മാത്രം ദുരിതാശ്വാസ സഹായം നല്കുക. മറ്റുള്ളവര് അവര്ക്ക് പിന്തുണ കൊടുക്കുക.
- Log in to post comments