ഭാഷയെ മറന്നാല്‍ സംസ്‌കാരത്തെയും മറക്കും - എ. പി ഉണ്ണി കൃഷ്ണന്‍
നമ്മുടെ ഭാഷയെ നാം മറന്നാല്‍ നമ്മുടെ സംസ്‌കാരം നമ്മില്‍ നിന്നും അകന്നു പോവുമെന്ന് ജില്ലാ പഞ്ചായത്ത് പ്രസിഡന്റ് എ. പി ഉണ്ണി കൃഷ്ണന്‍. കൊണ്ടോട്ടിയില്‍ ശ്രേഷ്ഠ ഭാഷ ദിനാഘോഷം ജില്ലാതല ഉദ്ഘാടനം നിര്‍വഹിച്ചു സംസാരിക്കുകയായിരുന്നു അദ്ദേഹം. മാതൃഭാഷയെ ജീവിതത്തോട് ചേര്‍ത്ത് നിര്‍ത്തുമ്പോഴാണ് ശ്രേഷ്ഠ ഭാഷയാവുന്നതെന്നും അദ്ദേഹം പറഞ്ഞു. കൊണ്ടോട്ടി മഹാകവി മോയിന്‍കുട്ടി വൈദ്യര്‍ മാപ്പിള കലാ അക്കാദമിയില്‍ നടന്ന ചടങ്ങില്‍ അക്കാദമി ചെയര്‍മാന്‍ ടി. കെ. ഹംസ അധ്യക്ഷത വഹിച്ചു. കൊണ്ടോട്ടി നഗരസഭ ചെയര്‍പേഴ്‌സണ്‍ കെ. സി. ഷീബ ഭാഷാദിന പ്രതിജഞ ചൊല്ലി കൊടുത്തു. എ. ഡി. എം. എന്‍. എം മെഹറലി മുഖ്യ പ്രഭാഷണം നടത്തി. പ്രമുഖ കഥാപ്രസംഗ കലാകാരനായ തൃക്കുളം കൃഷ്ണന്‍ കുട്ടി, ഗ്രന്ഥശാലാ സംഘം സംസ്ഥാന കൗണ്‍സിലറും സാംസ്‌കാരിക പ്രവര്‍ത്തകനുമായ കെ.മുഹമ്മദാലി (തിരൂരങ്ങാടി), ഗ്രന്ഥശാലാ പ്രവര്‍ത്തകയായ ബാലാമണി (നിലമ്പൂര്‍) എന്നിവരെ എ. ഡി. എം പൊന്നാടയണിയിച്ച് ആദരിച്ചു.
ജില്ലാ ലൈബ്രറി കൗണ്‍സില്‍ സെക്രട്ടറി എന്‍.പ്രമോദ് ദാസ് ആദരിക്കപ്പെടുന്നവരെ പരിചയപ്പെടുത്തി. മാതൃഭാഷാ പഠനത്തിന്റെ പ്രാധാന്യം എന്ന വിഷയത്തില്‍ കോഴിക്കോട് സര്‍വലാശാല സിന്‍ഡിക്കേറ്റ് അംഗം ഡോ.ഷംഷാദ് ഹുസൈന്‍ പ്രഭാഷണം നടത്തി. അക്കാദമി വൈസ് ചെയര്‍മാന്‍ കെ. വി. അബൂട്ടി മലയാള ഭാഷാ വന്ദനഗാനം ആലപിച്ചു. കൊണ്ടോട്ടി നഗരസഭ സ്ഥിര സമിതി ചെയര്‍മാന്‍ യു. കെ. മമ്മദിശ, വൈദ്യര്‍ അക്കാദമി സെക്രട്ടറി റസാഖ് പയമ്പ്രോട്ട്, അംഗങ്ങളായ രാഘവന്‍ മാടമ്പത്ത്, കെ. എ. ജബ്ബാര്‍ എന്നിവര്‍ സംസാരിച്ചു. ജില്ലാ ഇന്‍ഫര്‍മേഷന്‍ ഓഫീസര്‍ സി. അയ്യപ്പന്‍ സ്വാഗതവും കൊണ്ടോട്ടി തഹസില്‍ദാര്‍ പി. എസ്. ഉണ്ണികൃഷ്ണന്‍ നന്ദിയും പറഞ്ഞു.
ഇതോടനുബന്ധിച്ചു നടന്ന ഭാഷയും സംസ്‌കാരവും എന്ന സെമിനാറില്‍ വിദ്യാര്‍ത്ഥികള്‍ പ്രബന്ധം അവതരിപ്പിച്ചു. മലയാളഭാഷാ വന്ദനം, പുസ്തക പ്രദര്‍ശനം, പത്രമാസികാ പ്രദര്‍ശനം, മലയാള കവിതാലാപനം എന്നീ പരിപാടികളും നടന്നു. ജില്ലാ ഭരണകൂടം, ഇന്‍ഫര്‍മേഷന്‍ ആന്‍ഡ് പബ്ലിക് റിലേഷന്‍സ് വകുപ്പ്, ജില്ലാ ലൈബ്രറി കൗണ്‍സില്‍, നാഷണല്‍ സര്‍വീസ് സ്‌കീം, മഹാകവി മോയിന്‍കുട്ടി വൈദ്യര്‍ മാപ്പിളകലാ അക്കാദമി എന്നിവയുടെ ആഭിമുഖ്യത്തിലാണ് പരിപാടി സംഘടിപ്പിച്ചത്.
- Log in to post comments