പമ്പയെ പരിശുദ്ധമായി കാത്തു സൂക്ഷിക്കേണ്ട ഉത്തരവാദിത്വം എല്ലാവര്‍ക്കും: മന്ത്രി മേഴ്സിക്കുട്ടിയമ്മ
പമ്പാ നദിയെ പരിശുദ്ധമായി കാത്തു സൂക്ഷിക്കേണ്ട ഉത്തരവാദിത്വം എല്ലാവര്‍ക്കും ഉണ്ടെന്ന് ഫിഷറീസ് വകുപ്പ് മന്ത്രി ജെ. മേഴ്സിക്കുട്ടിയമ്മ പറഞ്ഞു. ഹരിത കേരള മിഷന്റെ നേതൃത്വത്തില്‍ ജലസ്രോതസുകളുടെ പുനരുജ്ജീവനവും സംരക്ഷണവും ലക്ഷ്യമാക്കി നടപ്പാക്കിയ ഇനി ഞാന്‍ ഒഴുകട്ടെ ക്യാമ്പയിന്റെ ജില്ലാ തല സമാപനവും ചേന്നങ്കര-കരിമാളന്‍തോട് മാലിന്യമുക്തമാക്കുന്നതും കൊടുമണ്ണില്‍ ഉദ്ഘാടനം ചെയ്തു സംസാരിക്കുകയായിരുന്നു മന്ത്രി.
ഇന്ന് ഏറ്റവും കൂടുതല്‍ മലിനമാകുന്ന നമ്മുടെ പുണ്യ നദിയായ പമ്പയുടെ ശുദ്ധീകരണം ഏറ്റവും പ്രാധാന്യത്തോടെ നോക്കിക്കാണേണ്ടതുണ്ട്. തോടുകളും നദികളും ശുദ്ധീകരിക്കുന്നതിനൊപ്പം അതിന്റെ ഇരുവശവും തിട്ട കെട്ടി സംരക്ഷിക്കാനുള്ള പദ്ധതികളും നടപ്പാക്കണം. ഇത് തൊഴിലുറപ്പ് പദ്ധതിയുമായി സംയുക്തമായി നടപ്പാക്കാന്‍ കഴിയണം. നാടിന്റെ ഹരിതാഭ സംരക്ഷിക്കുന്നതിലും മാലിന്യ മുക്തമാക്കുന്നതിലും ജില്ലയിലെ പ്രവര്‍ത്തനം കേരളത്തിന് തന്നെ മാതൃകയാണെന്നും മന്ത്രി പറഞ്ഞു.
തൊഴിലുറപ്പ് പദ്ധതിയിലുടെ നാടിന്റെ എല്ലാ മേഖലകളിലും വികസനം എത്തിക്കാന്‍ നമുക്ക് കഴിയണം. ഇതിനായി കേരള സര്‍ക്കാര്‍ മുറ്റത്തെ മുല്ല പോലുള്ള പദ്ധതികള്‍ അവതരിപ്പിച്ചിട്ടുണ്ട്. ഇവ ജനങ്ങളില്‍ എത്തിക്കാന്‍ ജനപ്രതിനിധികളും അധികൃതരും നടപടിയെടുക്കണമെന്നും മന്ത്രി പറഞ്ഞു.
ചിറ്റയം ഗോപകുമാര്‍ എം.എല്‍.എ അധ്യക്ഷത വഹിച്ച ചടങ്ങില്‍ ഹരിത കേരളം ജില്ല കോ-ഓര്‍ഡിനേറ്റര്‍ ആര്‍. രാജേഷ് പദ്ധതി വിശദീകരിച്ചു. കൊടുമണ്‍ ഗ്രാമപഞ്ചായത്ത് പ്രസിഡന്റ് കുഞ്ഞന്നാമ്മ കുഞ്ഞ് ജലപ്രതിജ്ഞ ചൊല്ലി. കൊടുമണ്‍ ഗ്രാമപഞ്ചായത്ത് വൈസ് പ്രസിഡന്റ് എം.ആര്‍.എസ് ഉണ്ണിത്താന്‍, ജില്ലാ പഞ്ചായത്ത് അംഗങ്ങളായ ആര്‍.ബി രാജീവ് കുമാര്‍, ബി. സതികുമാരി, പറക്കോട് ബ്ലോക്ക് പഞ്ചായത്ത് പ്രസിഡന്റ് ബീനാപ്രഭ, പറക്കോട് ബ്ലോക്ക് വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ സി. പ്രകാശ്, ഗ്രാമപഞ്ചായത്ത് വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ ശാരദ, ഗ്രാമപഞ്ചായത്ത് ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ എന്‍.കെ ഉദയകുമാര്‍, ഗ്രാമ പഞ്ചായത്ത് വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ ലളിതാ രവീന്ദ്രന്‍, വാര്‍ഡ് മെമ്പര്‍മാരായ ആരതി, ലീലാമണി വാസുദേവന്‍, ജ്യോതിലക്ഷ്മി, ചിരണിക്കല്‍ ശ്രീകുമാര്‍, കെ. ഓമനയമ്മ, പുഷ്പലത, എ.ജി ശ്രീകുമാര്‍, കൃഷി ഓഫീസര്‍ എസ്. ആദില, കൊടുമണ്‍ ഫാര്‍മേഴ്സ് സൊസൈറ്റി പ്രസിഡന്റ് എ.എന്‍ സലീം, എം.ജി.എന്‍.ആര്‍.ഇ.ജി.എസ് എ.ഇ ബിന്ദു എസ്.പിള്ള, സി.ഡി.എസ് ചെയര്‍പേഴ്സണ്‍ സുമതി ഗോപിനാഥ്, ഗ്രാമപഞ്ചായത്ത് സെക്രട്ടറി ജോഷ്വാ ജേക്കബ് എന്നിവര്‍ പങ്കെടുത്തു.
- Log in to post comments