ലൈഫ് മിഷൻ : മികച്ച പ്രകടനം കാഴ്ചവെച്ച് മാള ബ്ലോക്ക് പഞ്ചായത്ത്

ലൈഫ് സമ്പൂർണ ഭവന പദ്ധതിയിൽ വീടില്ലാത്തവർക്ക് വീടൊരുക്കി മാതൃകയാവുകയാണ് മാള ബ്ലോക്ക് പഞ്ചായത്ത്. 257 വീടുകളാണ് ബ്ലോക്ക് പരിധിയിൽ മാള, ആളൂർ, അന്നമനട, കുഴൂർ, പൊയ്യ എന്നീ പഞ്ചായത്തുകളിലായി പൂർത്തിയാക്കിയത്. രണ്ട് ഘട്ടങ്ങളിലായി അനുവദിച്ച വീടുകളെല്ലാം പണി കഴിപ്പിച്ചാണ് മാള ബ്ലോക്ക് പഞ്ചായത്ത് വിജയം കൈവരിച്ചിരിക്കുന്നത്. ലൈഫ് ഒന്നാം ഘട്ടത്തിൽ പണിതീരാത്ത ഭവനങ്ങളുടെ പൂർത്തീകരണം എന്ന ലക്ഷ്യമാണ് വിഭാവനം ചെയ്തത്. ഒന്നാം ഘട്ടത്തിൽ അനുവദിച്ച 94 വീടുകളിൽ 93 വീടുകളും പൂർത്തികരിച്ച് മികച്ച പ്രകടനമാണ് മാള കാഴ്ചവെച്ചിരിക്കുന്നത്. ആളൂർ ഗ്രാമപഞ്ചായത്ത് 21, അന്നമനട 25, പൊയ്യ ഗ്രാമപഞ്ചായത്ത് 10, മാള ഗ്രാമപഞ്ചായത്ത് 15, കുഴൂർ ഗ്രാമ പഞ്ചായത്ത് 22 എന്നിങ്ങനെയാണ് വീടുകളുടെ നിർമ്മാണം പൂർത്തിയാക്കിയിരിക്കുന്നത്. മിക്കയിടത്തും 100 ശതമാനവും വീടുകളുടെ നിർമ്മാണം പൂർത്തിയാക്കിയാണ് മാള ബ്ലോക്ക് ശ്രദ്ധേയമാകുന്നത്.
രണ്ടാം ഘട്ടത്തിൽ 5 പഞ്ചായത്തുകളിലായി എഗ്രിമെന്റ് വച്ച 156 ഗുണഭോക്താക്കളിൽ 138 എണ്ണം പണിപൂർത്തീകരിച്ചിട്ടുണ്ട്. ആളൂർ ഗ്രാമപഞ്ചായത്തിൽ എഗ്രിമെന്റ് വച്ച 27 വീടുകളിൽ 24 എണ്ണം, അന്നമനട ഗ്രാമപഞ്ചായത്തിൽ 40 വീടുകളിൽ 35 എണ്ണം, മാള ഗ്രാമ പഞ്ചായത്ത് 27 ൽ 23 എണ്ണം, പൊയ്യ ഗ്രാമ പഞ്ചായത്തിൽ 38 വീടുകൾ പൂർണമായും, കൂഴുർ ഗ്രാമപഞ്ചായത്തിൽ 24 ൽ 18 എണ്ണം എന്നിങ്ങനെയാണ് പൂർത്തീകരിച്ചത്.
ലൈഫ് ഒന്നാം ഘട്ടത്തിൽ മാള ബ്ലോക്ക് പഞ്ചായത്തിന്റെ കീഴിലുള്ള പട്ടികജാതി വികസന വകുപ്പിന്റെ 27 പേരിൽ 26 പേരുടെ വീടുപണിയും പൂർത്തീകരിച്ചു. ബ്ലോക്ക് പഞ്ചായത്ത് തലത്തിൽ ഒന്നും രണ്ടും ഘട്ടങ്ങളിലായി 257 കുടുംബങ്ങളെ ലൈഫ് പദ്ധതി വഴി ഭവനമുളളവരാക്കി മാറ്റി. അനുവദിച്ച വീടുകൾ എല്ലാംതന്നെ പൂർത്തീകരിച്ചു ലൈഫ് മിഷനെ ശരിയായ ദിശയിൽ നടപ്പിലാക്കി കൊണ്ടുവരികയാണ് മാള ബ്ലോക്ക് പഞ്ചായത്ത്.