പുന്നപ്ര ചന്ത- വിയാനിപ്പള്ളി റോഡ് ഉദ്ഘാടനം ചെയ്തു

ആലപ്പുഴ: സംസ്ഥാനത്താകെയുള്ള 34000 കിലോമീറ്റര്‍ പിഡബ്ല്യൂഡി റോഡില്‍ 800 കിലോ മീറ്റര്‍ മാത്രമാണ് നിര്‍മ്മാണ പ്രവര്‍ത്തനങ്ങള്‍ക്കായി അവശേഷിക്കുന്നതെന്ന് പൊതുമരാമത്ത് രജിസ്‌ട്രേഷന്‍ വകുപ്പ് മന്ത്രി ജി സുധാകരന്‍ പറഞ്ഞു. പുന്നപ്ര ചന്ത- വിയാനിപ്പള്ളി റോഡിന്റെ ഉദ്ഘാടനം നിര്‍വഹിക്കുകയായിരുന്നു മന്ത്രി. അന്തര്‍ദേശീയ നിലവാരത്തില്‍ എല്ലാ റോഡുകളും നിര്‍മിക്കാന്‍ സാധിച്ചത് പിഡബ്ല്യൂഡിയുടെ ചരിത്ര നേട്ടമാണ്. 70 കോടി രൂപ മുടക്കില്‍ ജില്ലയിലെ 51 റോഡുകളുടെ പണികളാണ് നടന്നു വരുന്നത്. ഫെബ്രുവരി അവസാനത്തോടെ എല്ലാ റോഡുകളും ജനങ്ങള്‍ക്കായി സമര്‍പ്പിക്കുമെന്നും മന്ത്രി പറഞ്ഞു.

അമ്പലപ്പുഴ കണക്ടിവിറ്റി റോഡ് പദ്ധതിയില്‍ ഉള്‍പ്പെടുത്തി 1 കോടി 22ലക്ഷം രൂപ ചെലവില്‍ പുന്നപ്ര ചന്ത ജംഗ്ഷന്‍ മുതല്‍ ബീച്ച് വരെ 1250 മീറ്റര്‍ നീളത്തിലും 5 മീറ്റര്‍ വീതിയിലും ആധുനിക രീതിയില്‍ ബിഎം & ബിസി നിലവാരത്തിലാണ് റോഡിന്റെ നിര്‍മാണം. പുന്നപ്ര തെക്ക് ഗ്രാമപഞ്ചായത്ത് പ്രസിഡന്റ് സുധര്‍മ ഭുവനചന്ദ്രന്‍ അധ്യക്ഷത വഹിച്ചു. പിഡബ്ല്യൂഡി എക്‌സിക്യൂട്ടീവ് എഞ്ചിനീയര്‍ ബി വിനു റിപ്പോര്‍ട്ട് അവതരിപ്പിച്ചു. ജില്ല പഞ്ചായത്ത് പ്രസിഡന്റ് ജി. വേണുഗോപാല്‍, ബ്ലോക്ക് പഞ്ചായത്ത് പ്രസിഡന്റ് കെ.എം ജുനൈദ്, സംഘാടക സമിതി കണ്‍വീനര്‍ ഇ.കെ ജയന്‍ എന്നിവര്‍ പ്രസംഗിച്ചു