ലൈഫ് കുടുംബ സംഗമത്തിന് വന്‍ ജനപങ്കാളിത്തം
അടിമാലിയില്‍ നടന്ന ബ്ലോക്ക് തല ലൈഫ് മിഷന്‍ കുടുംബ സംഗമം ജനപങ്കാളിത്തം കൊണ്ട് ശ്രദ്ധേയമായി. അടിമാലി,വെള്ളത്തൂവല്‍,ബൈസണ്‍വാലി,കൊന്നത്തടി,പള്ളിവാസല്‍ തുടങ്ങി അടിമാലി ബ്ലോക്ക് പഞ്ചായത്തിന് കീഴില്‍ വരുന്ന 5 പഞ്ചായത്തുകളിലെ ലൈഫ് മിഷന്‍ ഗുണഭോക്താക്കളുടെ കുടുംബസംഗമവും അദാലത്തുമാണ് അടിമാലി പഞ്ചായത്ത് ടൗണ്‍ ഹാളില്‍ സംഘടിപ്പിച്ചത്. ലൈഫ് ഗുണഭോക്താക്കള്‍ക്ക് സംസ്ഥാന കേന്ദ്ര സര്‍ക്കാരുകളുടെ വിവിധ ക്ഷേമ പദ്ധതികളും സേവനങ്ങളും നേരിട്ട് ലഭ്യമാക്കുന്നതിനായി സംഗമത്തോടൊപ്പം 20ഓളം വകുപ്പുകളുടെ പങ്കാളിത്തവും ഉറപ്പു വരുത്തിയിരുന്നു. എസ് രാജേന്ദ്രന്‍ എംഎല്‍എ പരിപാടി ഉദ്ഘാടനം ചെയ്തു. കിടപ്പാടമില്ലാത്ത എല്ലാവര്‍ക്കും വീടൊരുക്കുകയെന്നത് സര്‍ക്കാര്‍ നയമാണെന്ന് എംഎല്‍എ പറഞ്ഞു. അടിമാലി ബ്ലോക്ക് പഞ്ചായത്തിന്റെ പരിധിയില്‍ വരുന്ന 5 പഞ്ചായത്തുകളിലായി 1165 വീടുകളാണ് ലൈഫുള്‍പ്പെടെയുള്ള ഭവനപദ്ധതികളില്‍പ്പെടുത്തി നിര്‍മ്മിച്ച് നല്‍കിയിട്ടുള്ളത്. സംഗമത്തില്‍ പങ്കെടുക്കുന്ന ഗുണഭോക്താക്കള്‍ക്ക് റേഷന്‍കാര്‍ഡ് തിരുത്തല്‍, ആദാര്‍ പുതുക്കല്‍, കര്‍ഷക പെന്‍ഷന്‍ അപേക്ഷ സ്വീകരിക്കല്‍, വനിതകള്‍ക്കുള്ള സ്വയം തൊഴില്‍ പദ്ധതികള്‍, സൗജന്യ വൈദ്യപരിശോധന തുടങ്ങി വിവിധ സേവനങ്ങള്‍ ലഭ്യമാക്കി. അടിമാലി ബ്ലോക്ക് പഞ്ചായത്ത് പ്രസിഡന്റ് ആര്‍ മുരുകേശന്‍ അധ്യക്ഷത വഹിച്ച പരിപാടിയില്‍ ലൈഫ് മിഷന്‍ ജില്ലാ കോഡിനേറ്റര്‍ പ്രവീണ്‍ കെ വിഷയാവതരണം നടത്തി. ബ്ലോക്ക് പഞ്ചായത്ത് വൈസ് പ്രസിഡന്റ് മോളിപീറ്റര്‍, ഗ്രാമപഞ്ചായത്തു പ്രസിഡന്റുമാരായ ദീപാ രാജീവ്,ജോര്‍ജ്ജ് ജോസഫ്,റ്റി ആര്‍ ബിജി, തുളസീഭായ് കൃഷ്ണന്‍, മേഴ്‌സി തോമസ്, പി.എ.യു.പ്രോജക്ട് ഡയറക്ടര്‍ സാജു സെബാസ്റ്റ്യന്‍, ബി.ഡി ഒ പ്രവീണ്‍ വാസു, മുഹമ്മദ് സബീര്‍, ത്രിതല പഞ്ചായത്ത് പ്രതിനിധികള്‍,വിവിധ വകുപ്പ് പ്രതിനിധികള്‍ തുടങ്ങിയവര്‍ സംസാരിച്ചു.
- Log in to post comments