കോവിഡ് 19: മലപ്പുറം ജില്ലയില്‍ നിന്ന് പശ്ചിമ ബംഗാളിലേക്കുള്ള അതിഥി തൊഴിലാളികളുടെ ആദ്യ സംഘം ഇന്ന് (മെയ് 21) നാട്ടിലേയ്ക്ക് മടങ്ങും
പശ്ചിമ ബംഗാളിലേക്കുള്ള അതിഥി തൊഴിലാളികളുമായി മലപ്പുറം ജില്ലയില്‍ നിന്നുള്ള പ്രത്യേക തീവണ്ടി ഇന്ന് (മെയ് 21) രാത്രി ഒമ്പത് മണിക്ക് തിരൂരില്‍ നിന്ന് പുറപ്പെടും. അഞ്ച് താലൂക്കുകളില്‍ നിന്നായി 1,480 യാത്രക്കാരാണ് മടങ്ങുന്നത്. നേരത്തെ തയ്യാറാക്കിയ പട്ടിക പ്രകാരം യാത്രാ അനുമതി ലഭിച്ചവരെ മാത്രമാണ് സ്വന്തം നാടുകളിലേക്ക് അയക്കുന്നതെന്നും അതിഥി തൊഴിലാളികള്‍ ഒരു കാരണവശാലും നേരിട്ട് റെയില്‍വെ സ്റ്റേഷനില്‍ എത്തരുതെന്നും ജില്ലാ കലക്ടറുടെ ചുമതലയിലുള്ള എ.ഡി.എം. എന്‍.എം. മെഹറലി അറിയിച്ചു.
വിവിധ താലൂക്കുകളില്‍ പ്രത്യേകം ഏര്‍പ്പെടുത്തിയ കേന്ദ്രങ്ങളില്‍ അതിഥി തൊഴിലാളികളുടെ ആരോഗ്യ പരിശോധന നടക്കും. ഇതിനു ശേഷം പ്രത്യേകമേര്‍പ്പെടുത്തിയ കെ.എസ്.ആര്‍.ടി.സി ബസുകളില്‍ ആരോഗ്യ ജാഗ്രത ഉറപ്പാക്കി റെയില്‍വെ സ്റ്റേഷനില്‍ എത്തിക്കും. ഇതിനുള്ള ക്രമീകരണങ്ങള്‍ പൂര്‍ത്തിയായിട്ടുണ്ട്. ഉംപുന്‍ ചുഴലിക്കാറ്റിന്റെ പശ്ചാത്തലത്തില്‍ കാലാവസ്ഥ പരിഗണിച്ചാകും പ്രത്യേക തീവണ്ടി പുറപ്പെടുന്നതില്‍ അന്തിമ തീരുമാനമുണ്ടാവുക.
- Log in to post comments