'തോട്ടങ്ങളിലേക്ക് നീങ്ങാം' ഉറവിട നശീകരണ ക്യാമ്പയിനുകള്‍ ജൂണ്‍ 25 മുതല്‍
ഡെങ്കിപ്പനി കേസുകള്‍ സംസ്ഥാനത്ത് റിപ്പോര്‍ട്ട് ചെയ്യുന്ന സാഹചര്യത്തില്‍ ആരോഗ്യ വകുപ്പ് തദ്ദേശ സ്വയംഭരണ സ്ഥാപനങ്ങളിലൂടെ 'തോട്ടങ്ങളിലേക്ക് നീങ്ങാം' എന്ന പേരില്‍ ഉറവിട നശീകരണ ക്യാമ്പയിനുകള്‍ ജൂണ്‍ 25 മുതല്‍ സംഘടിപ്പിക്കും.
റബ്ബര്‍, കമുക്, പൈനാപ്പിള്‍, കൊക്കോ തോട്ടങ്ങളില്‍ ഈഡിസ് കൊതുകിന്റെ വലിയ തോതിലുള്ള പ്രജനന ഉറവിടങ്ങളാണെന്ന കണ്ടെത്തലിനെ തുടര്‍ന്നാണ് ക്യാമ്പയിന്‍ സംഘടിപ്പിക്കുന്നത്. ഇതിന് മുന്നോടിയായി തദ്ദേശ സ്വയംഭരണ സ്ഥാപനങ്ങള്‍ വഴി നടത്തേണ്ട പ്രവര്‍ത്തനങ്ങളുടെ മാര്‍ഗ നിര്‍ദേശങ്ങള്‍ ആരോഗ്യവകുപ്പ് പുറത്തിറക്കി.
തോട്ടം ഉടമകള്‍, തൊഴിലാളികള്‍ എന്നിവരെ ചേര്‍ത്ത് പ്ലാന്റേഷന്‍ കോര്‍പ്പറേഷന്‍ പ്രതിനിധിയുടെ സാന്നിധ്യത്തില്‍ കോവിഡ് മാനദണ്ഡ പ്രകാരം യോഗം ചേരണം.
റബ്ബര്‍ തോട്ടങ്ങളില്‍ ലാറ്റക്‌സ് കപ്പുകള്‍, ചിരട്ടകള്‍, റെയ്ന്‍ ഗാര്‍ഡ് എന്നിവയില്‍ വെള്ളം കെട്ടിനില്‍ക്കുന്നില്ലെന്ന് ഉറപ്പ് വരുത്തണം. ഉപയോഗ ശൂന്യമായി കിടക്കുന്ന കപ്പുകള്‍/ചിരട്ടകള്‍ മുഴുവനായും നീക്കം ചെയ്യണം.
കവുങ്ങിന്‍ തോട്ടങ്ങളിലെ ഉപയോഗ ശൂന്യമായ പാളകള്‍ നശിപ്പിക്കണം. പൈനാപ്പിള്‍ ചെടികളുടെ ഇലകള്‍ക്കിടയില്‍ മഴവെള്ളം കെട്ടിനിന്ന് കൊതുക് മുട്ടയിടാന്‍ സാധ്യതയുള്ളതിനാല്‍ ടെമിഫോസ്, ബി ടി ഐ, ടെമിഫോസ് ഗ്രാന്യൂളുകള്‍, വേപ്പിന്‍ പിണ്ണാക്ക് എന്നിവ ഉപയോഗിച്ച് കൂത്താടി നശീകരണം നടത്തണം. കൊക്കോ തോട്ടങ്ങളില്‍ കേടായ തോടുകള്‍ ശേഖരിച്ച് നശിപ്പിക്കണം.
പരിശോധനയില്‍ ഉറവിട സാന്നിധ്യം കണ്ടെത്തുന്ന തോട്ടം ഉടമകള്‍ക്ക് നോട്ടീസ് നല്‍കണം. തുടര്‍ച്ചയായി ഉറവിട നശീകരണം നടത്താത്ത തോട്ടം ഉടമകള്‍ക്കെതിരെ തദ്ദേശ സ്വയംഭരണ സ്ഥാപന സെക്രട്ടറിമാര്‍ നിലവിലെ നിയമ പ്രകാരം നടപടി സ്വീകരിക്കണം എന്നിവയാണ് പ്രധാന നിര്‍ദേശങ്ങള്‍.
(പി.ആര്‍.കെ നമ്പര്‍ 1684/2020)
- Log in to post comments