കാലവർഷം: ജില്ലയിൽ നിലവിൽ 13  ക്യാമ്പുകളിലായി 433 പേർ

ജില്ലയിൽ നിലവിൽ 13 ക്യാമ്പുകളിൽ 156 കുടുംബങ്ങളിലെ 433 പേർ തുടരുന്നതായി ജില്ലാ ദുരന്തനിവാരണ അതോറിറ്റി അധികൃതർ അറിയിച്ചു. മണ്ണാർക്കാട് താലൂക്കിൽ ഒമ്പതും ചിറ്റൂർ താലൂക്കിൽ രണ്ടും ആലത്തൂരിലും ഒറ്റപ്പാലത്തും ഒന്ന് വീതം ക്യാമ്പുകളുമാണ് തുറന്നത്. ഇതിൽ 153 സ്ത്രീകളും 145 പുരുഷന്മാരും 135 കുട്ടികളും ഉൾപ്പെടുന്നു.

മണ്ണാർക്കാട് താലൂക്കിൽ ഷോളയൂർ  ഗവ. ട്രൈബൽ ഹയർ സെക്കൻഡറി സ്കൂൾ, പാലക്കയം ദാറുൽ ഫർഖാൻ ഗേൾസ് ഹോം, ഗവ പുളിക്കൽ സ്കൂൾ
മരുതംകാട് ജി എൽ പി എസ്, കോട്ടോപ്പാടം ഗവ. യു.പി.എസ് ഭീമനാട്, മുക്കാലി എംആർഎസ്, അലനല്ലൂർ ഹോളി ഫാമിലി കോൺവെന്റ് യുപി സ്കൂൾ, മേപ്പാടം അംഗനവാടി, ഇറിഗേഷൻ വകുപ്പിന്റെ ക്വാർട്ടേഴ്സ് എന്നീ ക്യാമ്പുകളിലായി 111 കുടുംബങ്ങളിലെ 321 പേരാണ് താമസിക്കുന്നത്.

ചിറ്റൂർ താലൂക്കിൽ നെല്ലിയാമ്പതി വില്ലേജിലെ അയിലൂർ ഗവ. ട്രൈബൽ ഹോസ്റ്റലിലും മുതലമട വില്ലേജിലെ പറമ്പിക്കുളം വയർലെസ് സ്റ്റേഷനിലുമായി 35 കുടുംബങ്ങളിലെ 82 പേരും താമസിക്കുന്നു.

ആലത്തൂർ താലൂക്കിൽ കിഴക്കഞ്ചേരി  പാറശ്ശേരി അങ്കണവാടിയിലും ഒറ്റപ്പാലം താലൂക്കിൽ പൂക്കോട്ടുകാവ് സൗമ്യ കല്യാണമണ്ഡപം എന്നിവിടങ്ങളിൽ യഥാക്രമം ഒരു കുടുംബത്തിലെ മൂന്ന് പേരും 9 കുടുംബത്തിലെ 27 പേരും താമസിക്കുന്നു. 

പാലക്കാട്‌ ജില്ലയിലെ മറ്റ് നാശനഷ്ടങ്ങൾ

 പാലക്കാട്‌ ജില്ലയിൽ കഴിഞ്ഞദിവസം ഭാഗികമായി 18 വീടുകളും പൂർണമായി മൂന്ന് വീടുകളുമാണ് തകർന്നത്. ഇതോടെ ഭാഗികമായി 498 വീടുകൾക്കാണ് കേടുപാടുകൾ സംഭവിച്ചത്. 19 വീടുകൾ പൂർണമായും തകർന്നു.

കഴിഞ്ഞ ദിവസം ഉണ്ടായ മഴയിൽ
7.47 കിലോമീറ്റർ കെഎസ്ഇബി കണക്ഷനുകൾക്കും 54 പോസ്റ്റുകൾക്കും  കേടുപാട് സംഭവിച്ചു. ഇതുവരെ ജില്ലയിലെ  210.494 കിലോമീറ്റർ കെ.എസ്.ഇ.ബി കണക്ഷനുകൾക്കാണ് കേടുപാട് സംഭവിച്ചത്. കൂടാതെ 1879 പോസ്റ്റുകളും 18 ട്രാൻസ്ഫോർമറുകളും തകർന്നു. 

കഴിഞ്ഞ 24 മണിക്കൂറിനിടെ 12.06 ഹെക്ടർ കൃഷിനാശവും ഉണ്ടായി. ജൂൺ ഒന്നുമുതൽ  ജില്ലയിൽ 874.89 ഹെക്ടർ കൃഷി നാശമാണ് ഉണ്ടായിരിക്കുന്നത്. ആകെ 3156 കർഷകരാണ് ഇതുമൂലം ബാധിതരായത്.