യൂത്ത് ക്ലബ് പുരസ്‌കാരം ഫെയ്മസ് ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബ്ബിന്
സംസ്ഥാനത്തെ മികച്ച യൂത്ത് ക്ലബ്ബിനുള്ള നെഹ്‌റു യുവ കേന്ദ്രയുടെ സംസ്ഥാനതല യൂത്ത് ക്ലബ് പുരസ്‌ക്കാരത്തിന് വേങ്ങര അമ്പലമാട് ഫെയ്മസ് ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബ്ബ് അര്‍ഹമായി. ആരോഗ്യ-രോഗ പ്രതിരോധ ബോധവല്‍ക്കരണം, പരിസ്ഥിതി സംരക്ഷണം, നൈപുണ്യ പരിശീലനം, സാമൂഹിക-സന്നദ്ധ സേവനം, കലാ-കായിക പ്രവര്‍ത്തനം, ദേശീയ-അന്തര്‍ദേശീയ ദിനാചരണങ്ങള്‍, ലഹരി നിര്‍മാര്‍ജ്ജന പ്രവര്‍ത്തനം, തുടങ്ങിയ മേഖലകളില്‍ 2016-17 വര്‍ഷത്തില്‍ നടത്തിയ മികച്ച പ്രവര്‍ത്തനം പരിഗണിച്ചാണ് സംസ്ഥാന കായിക-യുവജനകാര്യ വകുപ്പ് ഡയറക്ടര്‍ ചെയര്‍മാനായ സമിതി ഫെയ്മസ് ക്ലബ്ബിനെ അവാര്‍ഡിന് തിരഞ്ഞെടുത്തത്. 1997-ല്‍ രൂപീകൃതമായ ഫെയ്മസ് ക്ലബ്ബിന്റെ പ്രവര്‍ത്തനത്തിന് പി ഷാജി പ്രസിഡണ്ടും ഇ.കെ റഷീദ് സെക്രട്ടറിയുമായ ഭരണ സമിതിയാണ് നേതൃത്വം നല്‍കുന്നത്.
ഒരു ലക്ഷം രൂപയും പ്രശസ്തി പത്രവുമടങ്ങുന്നതാണ് പുരസ്‌ക്കാരം. മാര്‍ച്ച് 21 -ന് രാവിലെ 10 ന് കനകക്കുന്ന് കൊട്ടാരത്തില്‍ നടക്കുന്ന ചടങ്ങില്‍ ഗവര്‍ണര്‍ ജസ്റ്റിസ് പി സദാശിവം പുരസ്‌കാരം സമ്മാനിക്കും.
- Log in to post comments