ശുചിപൂർണമാകാൻ തൃശൂർ ജില്ല

സുസ്ഥിര മാലിന്യ സംസ്കരണം: സെമിനാർ, മാതൃകാവതരണങ്ങൾ 12ന്

ശുചിപൂർണ്ണയുടെ ആദ്യഘട്ടമായി ജില്ലയിൽ തൃശൂർ കോർപ്പറേഷനും ഏഴു മുനിസിപ്പാലിറ്റികളും 29 ഗ്രാമപഞ്ചായത്തുകളും ശുചിത്വകേരളത്തിന് മാതൃകയാകാനൊരുങ്ങുന്നു. ഇതിന്റെ ഭാഗമായി ഇൻഫർമേഷൻ - പബ്ലിക് റിലേഷൻസ് വകുപ്പ്, ജില്ലാ ആസൂത്രണ സമിതി, കില, ഗുരുവായൂർ നഗരസഭ എന്നിവയുടെ നേതൃത്വത്തിൽ സുസ്ഥിരമാലിന്യ സംസ്കരണ സെമിനാറും മാതൃകാവതരണങ്ങളും ഗുരുവായൂർ ബായോപാർക്കിൽ മാർച്ച് 12ന് നടക്കും.

ശുചിപൂർണയുടെ ഭാഗമായി നടക്കുന്ന പരിപാടിയുടെ ഉദ്ഘാടനം ഉച്ചയ്ക്ക് 12.30ന് റവന്യു വകുപ്പു മന്ത്രി അഡ്വ.കെ. രാജൻ നിർവ്വഹിക്കും. ഗുരുവായൂർ എം.എൽ.എ എൻ.കെ.അക്ബർ അധ്യക്ഷത വഹിക്കും. ജില്ലാ പഞ്ചായത്ത് പ്രസിഡണ്ട് പി കെ ഡേവിസ് മാസ്റ്റർ മുഖ്യ പ്രഭാഷണം നടത്തും. ടി എൻ പ്രതാപൻ എംപി, കോർപ്പറേഷൻ മേയർ എം.കെ.വർഗീസ്, ജില്ലാ കളക്റ്റർ ഹരിത വി കുമാർ, ഗുരുവായൂർ മുനിസിപ്പൽ ചെയർമാൻ എം കൃഷ്ണദാസ് എന്നിവർ വിശിഷ്ടാതിഥികളാകും. രാവിലെ 9:30 മുതൽ സുസ്ഥിര മാലിന്യ സംസ്കരണത്തെപറ്റി സെമിനാറും മാതൃകാവതരണങ്ങളും വിദഗ്‌ദ്ധർ നടത്തും.

29 പഞ്ചായത്തുകളിൽ ജില്ലാ പഞ്ചായത്തംഗങ്ങളാണ് ശുചിപൂർണ പ്രവർത്തനങ്ങൾക്ക് നേതൃത്വം നല്കുന്നത്. ജില്ലയിലെ എല്ലാ തദ്ദേശ സ്വയംഭരണ സ്ഥാപനങ്ങളിലും അടുത്ത വർഷം പദ്ധതി നടപ്പാക്കും. ഇതോടെ സംസ്ഥാനത്തെ ഖര -ദ്രവ മാലിന്യ സംസ്ക്കരണത്തിന് തൃശൂർ ജില്ല മാതൃകയാകും. സംസ്ഥാന ആസൂത്രണ ബോർഡംഗം ഡോ. ജിജു പി അല്ക്സ്, കെ എസ് ഡബ്ലിയൂ എം പി പ്രോജക്റ്റ് ഡയറക്റ്റർ ഡോ.അദീല അബ്ദുള്ള, അമൃത് മിഷൻ ഡയറക്റ്റർ അരുൺ കെ വിജയൻ, ശുചിത്വമിഷൻ എക്സി. ഡയറക്റ്റർ കെ ടി ബാലഭാസ്ക്കരൻ, തദ്ദേശ സ്വയംഭരണ വകുപ്പ് ജോയിൻ്റ് ഡയറക്റ്റർ അരുൺ രംഗൻ എന്നിവർ വിവിധ സെഷനുകളിൽ പങ്കെടുക്കും.

തൃശൂർ കോർപ്പറേഷൻ, കൊടുങ്ങല്ലൂർ, ചാലക്കുടി, ഇരിങ്ങാലക്കുട, ചാവക്കാട്, ഗുരുവായൂർ, വടക്കാഞ്ചേരി , കുന്നംകുളം മുനിസിപ്പാലിറ്റികൾ, പുന്നയൂർ, കടവല്ലൂർ, വേലൂർ, ദേശമംഗലം, തിരുവില്വാമല, പാഞ്ഞാൾ, മാടക്കത്തറ, അവണൂർ, നടത്തറ, തൃക്കൂർ, നെന്മണിക്കര, കൊടകര, അതിരപ്പിള്ളി, കൊരട്ടി, മാള, പുത്തൻചിറ, മുരിയാട്, എറിയാട്, പെരിഞ്ഞനം, വലപ്പാട്, കാറളം, വല്ലച്ചിറ, പാറളം, മണലൂർ, തളിക്കുളം, കടപ്പുറം, വെങ്കിടങ്ങ്, തോളൂർ, ചൂണ്ടൽ ഗ്രാമപഞ്ചായത്തുകൾ എന്നിവിടങ്ങളിലാണ് പദ്ധതി ആദ്യഘട്ടം നടപ്പാക്കുന്നത്.