കുടുംബശ്രീ രജതജൂബിലി 'മുദ്രഗീതം' ഒരുക്കാന്‍ രചനാമത്സരം

രജതജൂബിലി ആഘോഷങ്ങളോടനുബന്ധിച്ച് കുടുംബശ്രീ 'മുദ്രഗീതം' (തീം സോംഗ്) തയ്യാറാക്കുന്നതിന് കുടുംബശ്രീ അംഗങ്ങൾക്ക് അവസരം. അയല്‍ക്കൂട്ട വനിതകള്‍ക്കായി സംഘടിപ്പിക്കുന്ന 'മുദ്രഗീതം' രചനാ മത്സരത്തിൽ തെരഞ്ഞെടുക്കുന്ന മികച്ച രചനയ്ക്ക് പതിനായിരം രൂപയും ഫലകവും സമ്മാനം ലഭിക്കും. വിദഗ്ധര്‍ ഉള്‍പ്പെടുന്ന ജൂറിയാണ് മികച്ച രചന തെരഞ്ഞെടുക്കുക. മെയ് 17ന് നടക്കുന്ന കുടുംബശ്രീ വാര്‍ഷിക ദിനാഘോഷ പരിപാടിയില്‍ സമ്മാനം വിതരണം ചെയ്യും.  

കാല്‍ നൂറ്റാണ്ടിനിടയില്‍ കുടുംബശ്രീയുടെ സമഗ്രസംഭാവനകളുടെ സംക്ഷിപ്തമാണ് ഗാനത്തില്‍ പ്രതിഫലിക്കേണ്ടത്. ലിംഗാധിഷ്ഠിതമല്ലാത്ത പ്രമേയമായിരിക്കണം ഗാനത്തിന്‍റെ ഉള്ളടക്കം. മതനിരപേക്ഷ ജീവിത വീക്ഷണത്തിന് ഇണങ്ങുന്നതും ആത്മവിശ്വാസം, സ്നേഹം, സഹകരണ മനോഭാവം എന്നിവ ആര്‍ജിക്കാന്‍ പ്രചോദനം നല്‍കുന്നതുമായിരിക്കണം. പതിനാറ് വരിയില്‍ കൂടാന്‍ പാടില്ല. രചനകള്‍ മലയാളത്തിലായിരിക്കണം. തെരഞ്ഞെടുക്കുന്ന രചന സംഗീതം നല്‍കി കുടുംബശ്രീയുടെ തീം സോങ്ങായി ഉപയോഗിക്കും.

രചനകള്‍ ഏപ്രില്‍ 15നകം എക്സിക്യൂട്ടീവ് ഡയറക്ടര്‍, കുടുംബശ്രീ സംസ്ഥാന ദാരിദ്ര്യ നിര്‍മാര്‍ജന മിഷന്‍, ട്രിഡ ബില്‍ഡിങ്ങ്, മെഡിക്കല്‍ കോളേജ് പിഓ, തിരുവനന്തപുരം 695011 എന്ന വിലാസത്തില്‍ ലഭിക്കണം.