ഭവന നിര്‍മ്മാണം: ധനസഹായത്തിന് അപേക്ഷിക്കാം
ജില്ലയിലെ പട്ടികജാതി വിഭാഗക്കാര്‍ക്ക് ഭവന നിര്‍മ്മാണം പൂര്‍ത്തിയാക്കാനുള്ള പ്രത്യേക ധനസഹായത്തിന് അപേക്ഷിക്കാം. കഴിഞ്ഞ 10 വര്‍ഷത്തില്‍ ഭവന നിര്‍മ്മാണത്തിന് വിവിധ വകുപ്പുകളുടെ ധനസഹായം ലഭിച്ചിട്ടും നിര്‍മ്മാണം പൂര്‍ത്തീകരിക്കാത്തവര്‍, നിര്‍ദ്ദിഷ്ട രീതിയിലുള്ള മേല്‍ക്കൂര നിര്‍മ്മിക്കാത്തതുമൂലം അവസാന ഗഡു കൈപ്പറ്റാത്തവര്‍, സ്വന്തമായി വീട് നിര്‍മ്മാണം ആരംഭിച്ച് പണിപൂര്‍ത്തിയാക്കാത്തവര്‍ക്ക് ഒന്നരലക്ഷം രൂപ വരെയാണ് ധനസഹായം നല്‍കുക. അപേക്ഷകരുടെ കുടുംബ വാര്‍ഷിക വരുമാനം ഒരുലക്ഷമോ അതില്‍ താഴെയോ ആയിരിക്കണം. നിശ്ചിത മാതൃകയിലുള്ള അപേക്ഷയോടൊപ്പം ജാതി, വരുമാനം, ഭൂമിയുടെ കൈവശാവകാശം അല്ലെങ്കില്‍ വീടിന്റെ ഉടമസ്ഥാവകാശ സാക്ഷ്യപത്രവും പട്ടികജാതി വികസന വകുപ്പ്/ തദ്ദേശസ്വയംഭരണ സ്ഥാപനം/ മറ്റ് ഭവന നിര്‍മ്മാണ ഏജന്‍സികള്‍ എന്നിവയില്‍ നിന്ന് ധനസഹായം കൈപ്പറ്റിയിട്ടുള്ളവര്‍ അവസാന ഗഡു കൈപ്പറ്റിയ തിയ്യതി സംബന്ധിച്ച സാക്ഷ്യപത്രവും നല്‍കണം.
നിശ്ചിത മാതൃകയിലുള്ള മേല്‍ക്കൂര നിര്‍മ്മിക്കാത്തതിനാല്‍ അവസാന ഗഡു ധനസഹായം കൈപ്പറ്റാത്തവര്‍ അതുസംബന്ധിച്ച് ബന്ധപ്പെട്ട ഏജന്‍സി/ പട്ടികജാതി വികസന വകുപ്പിലെ ഉദ്യോഗസ്ഥരില്‍ നിന്നുള്ള സാക്ഷ്യപത്രവും സ്വന്തമായി വീട് നിര്‍മ്മിച്ച് പൂര്‍ത്തയാക്കാത്തവര്‍ വീടിന്റെ കാലപ്പഴക്കം സംബന്ധിച്ച് തദ്ദേശ സ്വയംഭരണ സ്ഥാപന സെക്രട്ടറി, എന്‍ജിനീയര്‍ നല്‍കുന്ന സാക്ഷ്യപത്രവും ഹാജരാക്കണം. ഭവന പൂര്‍ത്തീകരണത്തിന് ആവശ്യമായ പ്രവൃത്തികള്‍ സംബന്ധിച്ച് തദ്ദേശ സ്വയംഭരണ സ്ഥാപനത്തിലെ എഞ്ചിനീയര്‍, ഓവര്‍സിയര്‍ അല്ലെങ്കില്‍ അംഗീകൃത ബില്‍ഡിംഗ് സൂപ്പര്‍വൈസര്‍ തയ്യാറാക്കിയ വിശദമായ എസ്റ്റിമേറ്റ് അപേക്ഷയോടൊപ്പം നല്‍കണം. നിശ്ചിത മാതൃകയിലുള്ള മേല്‍ക്കൂര നിര്‍മ്മിക്കാത്തവര്‍ തുക വകയിരുത്തിയശേഷം മറ്റ് പ്രവൃത്തികള്‍ക്ക് തുക എസ്റ്റിമേറ്റില്‍ ഉള്‍ക്കൊള്ളിക്കാവൂ. ലൈഫ് മിഷന്‍ പദ്ധതിയില്‍ ധനസഹായം കൈപ്പറ്റിയവര്‍ക്ക് അര്‍ഹതയില്ല. കൂടുതല്‍ വിവരങ്ങളും അപേക്ഷാഫോമിന്റെ മാതൃകയും ബ്ലോക്ക് / മുനിസിപ്പാലിറ്റി പട്ടികജാതി വികസന ഓഫീസുകളില്‍ ലഭിക്കും. അര്‍ഹരായവര്‍ ജൂലൈ 30 നകം ബന്ധപ്പെട്ട പട്ടികജാതി വികസന ഓഫീസര്‍ക്ക് അപേക്ഷ നല്‍ക്കണമെന്ന് ജില്ലാ പട്ടികജാതി വികസന ഓഫീസര്‍ അറിയിച്ചു. ഫോണ്‍: 0491-2505005
- Log in to post comments