സപ്ലൈകോ ഡിപ്പോയുടെ കീഴിൽ മാനന്തവാടിയിൽ ആരംഭിക്കുന്ന ബിപിസിഎൽ പെട്രോൾ പമ്പിന്റെ ഉദ്ഘാടനം 29 ന് വൈകുന്നേരം നാലിന് ഭക്ഷ്യ പൊതു വിതരണ ഉപഭോക്‌തൃ കാര്യ ലീഗൽ മെട്രോളജി വകുപ്പ് മന്ത്രി ജി. ആർ. അനിൽ നിർവഹിക്കും. പട്ടികജാതി പട്ടികവര്‍ഗ്ഗ പിന്നാക്ക ക്ഷേമ വകുപ്പ് മന്ത്രി ഒ.ആര്‍. കേളു അധ്യക്ഷനാകും.

വായന പക്ഷാചരണത്തിൻ്റെ ഭാഗമായി ദ്വാരക സേക്രട്ട് ഹാർട്ട് സ്കൂളിലെ വിദ്യാർത്ഥികൾ പഴശ്ശി ഗ്രന്ഥാലയം സന്ദർശിച്ചു. വായനയുടെ വളർച്ചയും വ്യാപ്തിയും മനസ്സിലാക്കുന്നതിനും സാംസ്കാരിക സ്ഥാപനമെന്ന നിലയിൽ ലൈബ്രറിയുടെ പ്രവർത്തനങ്ങൾ മനസിലാക്കുന്നതിനുമായിരുന്നു ലൈബ്രറി സന്ദർശനം. പഴശ്ശി ഗ്രന്ഥാലയം സെക്രട്ടറി തോമസ് സേവ്യർ, ലൈബ്രേറിയൻമാരായ ഷിനോജ് വി.പി. ജിതിൻ എം സി എന്നിവർ പുസ്തക വിതരണം, പുസ്തകങ്ങളിലെ വൈവിധ്യങ്ങൾ എന്നിവ സംബന്ധിച്ച് വിദ്യാർത്ഥികളോട് സംവദിച്ചു. അധ്യാപകരായ ജോബിൻ മാസ്റ്റർ, ജിഷ്ണു കെ തുടങ്ങിയവർ പരിപാടിക്ക് നേതൃത്വം നൽകി.

കേരള മീഡിയ അക്കാദമി പോസ്റ്റ് ഗ്രാജുവേറ്റ് ഡിപ്ലോമ കോഴ്‌സ് 2024-25 ബാച്ച് പൊതുപ്രവേശന പരീക്ഷാഫലം പ്രഖ്യാപിച്ചു. പരീക്ഷാഫലം www.keralamediaacademy.org ല്‍ പ്രസിദ്ധീകരിച്ചിട്ടുണ്ട്. ലിസ്റ്റില്‍ ഉള്‍പ്പെട്ടിട്ടുള്ള വിദ്യാര്‍ത്ഥികളെ ഇന്റര്‍വ്യൂ സംബന്ധിച്ച വിവരങ്ങള്‍ ഇ-മെയിലിലൂടെ അറിയിക്കും.

വെള്ളമുണ്ട ഇലക്ട്രിക്കല്‍ സെക്ഷനില്‍ ലൈനില്‍ സ്‌പേസര്‍ വര്‍ക്ക് നടക്കുന്നതിനാല്‍ അഞ്ചാംപീടിക ട്രാന്‍സ്‌ഫോമറിന്റെ പരിധിയിലുള്ള പ്രദേശങ്ങളില്‍ ഇന്ന്(ജൂണ്‍ 26) രാവിലെ 8.30 മുതല്‍ വൈകിട്ട് 5.30 വരെ വൈദ്യുതി വിതരണം പൂര്‍ണ്ണമായോ ഭാഗികമായോ തടസ്സപ്പെടുമെന്ന് അസിസ്റ്റന്റ് എന്‍ജിനീയര്‍ അറിയിച്ചു.

കോട്ടയം: ഓഗസ്റ്റ് 10ന് പുന്നമട കായലിൽ നടക്കുന്ന 70-ാമത് നെഹ്റു ട്രോഫി ജലമേളയുടെ ഭാഗ്യചിഹ്നം നിശ്ചയിക്കാനുള്ള  മത്സരത്തിലേക്കുള്ള എൻട്രികൾ ജൂലൈ രണ്ട് വൈകിട്ട് അഞ്ച് വരെ നൽകാം. എ-4 സൈസ് ഡ്രോയിംഗ് പേപ്പറിൽ മൾട്ടി കളറിലാണ് ഭാഗ്യചിഹ്നം തയ്യാറാക്കേണ്ടത്.സൃഷ്ടികൾ മൗലികമായിരിക്കണം. എൻട്രികൾ അയക്കുന്ന കവറിൽ '70-ാമത് നെഹ്റു ട്രോഫി ജലമേള- ഭാഗ്യചിഹ്നമത്സരം' എന്നു രേഖപ്പെടുത്തിയിരിക്കണം. ഒരാൾക്ക് ഒരു എൻട്രിയേ നൽകാനാകൂ. പേര്, മേൽവിലാസം, ഫോൺ നമ്പർ, ഇ-മെയിൽ എന്നിവ പ്രത്യേകം പേപ്പറിൽ എഴുതി എൻട്രിക്കൊപ്പം സമർപ്പിക്കണം. 

 
കോട്ടയം: ജില്ലാ കളക്ടർ വി. വിഗ്‌നേശ്വരി  ഉദയനാപുരം ഗ്രാമപഞ്ചായത്തിൽ എത്തി പൊതുജനങ്ങളിൽ നിന്നും പരാതികൾ സ്വീകരിച്ചു. 
25 പരാതികളാണ് ജില്ലാ കളക്ടർക്ക് പഞ്ചായത്ത് നിവാസികൾ സമർപ്പിച്ചത്. ഉദയനാപുരം ഗ്രാമ പഞ്ചായത്ത് പ്രസിഡന്റ് പി. കെ.ആനന്ദവല്ലി , വൈസ് പ്രസിഡന്റ് സി.പി. അനൂപ്  എന്നിവർ അദാലത്തിൽ പങ്കെടുത്തു.പള്ളിക്കത്തോട്, കുറവിലങ്ങാട്, നെടുംകുന്നം ഗ്രാമ പഞ്ചായത്തുകളിലെത്തി ജില്ലാ കളക്ടർ പൊതുജനങ്ങളിൽ നിന്ന് പരാതികൾ സ്വീകരിച്ചിരുന്നു.

കോട്ടയം: വിനോദ സഞ്ചാരവകുപ്പിനു കീഴിലുള്ള കോട്ടയം സർക്കാർ അതിഥിമന്ദിരം കോൺഫറൻസ് ഹാളിനോടു ചേർന്ന് നിൽക്കുന്ന പൂവാക, പ്ലാവ്, ചൂള മുതലായ മരങ്ങളും ഇലക്ട്രിക് റൂമിനോടു ചേർന്നുനിൽക്കുന്ന മരങ്ങളും കോമ്പൗണ്ടിനോടു ചേർന്ന് വീടുകൾക്ക് ഭീഷണിയായി നിൽക്കുന്ന മാവിലെ ശിഖരങ്ങളും മുറിച്ചുമാറ്റി അട്ടി ഇടുന്നതിന് ക്വട്ടേഷൻ ക്ഷണിച്ചു. ക്വട്ടേഷനുകൾ ജൂലൈ നാലിന് ഉച്ചകഴിഞ്ഞ് മൂന്നുമണിവരെ സമർപ്പിക്കാം. അന്നേ ദിവസം 3.30 ന് തുറക്കും