പ്രദേശത്ത് നിരോധനാജ്ഞ 

കോവിഡ് രോഗവ്യാപന സാഹചര്യം നിലനില്‍ക്കവേ പേരാമ്പ്ര മത്സ്യ മാര്‍ക്കറ്റിലുണ്ടായ  സംഘര്‍ഷത്തെ തുടര്‍ന്ന് ഇനിയൊരുത്തരവ് ഉണ്ടാകുന്നത് വരെ  മത്സ്യമാര്‍ക്കറ്റ് അടച്ചിടാൻ ജില്ലാ കലക്ടര്‍ സാംബശിവ റാവു ഉത്തരവായി. പഞ്ചായത്തിലെ  15,5 വാര്‍ഡുകളിലും മത്സ്യമാര്‍ക്കറ്റിലും നാലോ അതിലധികമോ ആളുകള്‍   ഒത്തുചേരുന്നത്  സി ആർ പി.സി 144 പ്രകാരം നിരോധിച്ചു.

സംഘര്‍ഷത്തില്‍ ഏര്‍പ്പെട്ട മുഴുവന്‍ ആളുകളുടെയും പട്ടിക തയ്യാറാക്കാന്‍ റൂറല്‍ പോലിസ് മേധാവിക്ക്  നിര്‍ദേശം നല്‍കി. 

കോ വിഡ് രോഗവ്യാപനത്തിന്റെ സാഹചരും നിലനിൽക്കവെ പേരാമ്പ്രയിൽ സംഘർഷത്തിൽ ഏർപ്പെട്ടവർക്കെതിരെ കർശന നിയമ നടപടി സ്വീകരിക്കുമെന്ന് ജില്ലാ കലക്ടർ അറിയിച്ചു. സംഭവത്തെ അതീവ ഗൗരവത്തോടെയാണ് ജില്ലാ ഭരണകൂടം കാണുന്നത്. സംഘർഷ പ്രദേശത്ത്  ഉണ്ടായിരുന മുഴുവൻ ആളുകളും  റൂം ക്വാറന്റീനിൽ പ്രവേശിക്കേണ്ടതാണ്. ഇവർ അതാത് പ്രദേശത്തെ പ്രാഥമികാരോഗ്യ കേന്ദ്രവുമായി ബന്ധം പുലർത്തേണ്ടതും ഏഴ് ദിവസത്തിന് ശേഷം കോവിഡ് ടെസ്റ്റിന് വിധേയരാകേണ്ടതുമാണെന്ന് ജില്ലാ കലക്ടർ അറിയിച്ചു.

കോഴിക്കോട് എഫ്.എല്‍.ടി.സി, മെഡിക്കല്‍ കോളേജ്, എന്‍.ഐ.ടി. എഫ്.എല്‍.ടി.സികളില്‍ ചികിത്സയിലായിരുന്ന 257 പേര്‍ രോഗമുക്തിനേടി.

ജില്ലയില്‍ ഇന്ന് (ഓഗസ്റ്റ് 20) 130 പേര്‍ക്ക് കൂടി കോവിഡ് സ്ഥിരീകരിച്ചതായി ജില്ലാ മെഡിക്കല്‍ ഓഫീസര്‍ അറിയിച്ചു. വിദേശത്ത് നിന്ന് എത്തിയ ഒന്‍പത് പേര്‍ക്കും ഇതരസംസ്ഥാനങ്ങളില്‍നിന്ന് എത്തിയവരില്‍ നാലുപേര്‍ക്കുമാണ് പോസിറ്റീവ് ആയത്. സമ്പര്‍ക്കം വഴി 107 പേര്‍ക്ക് രോഗം ബാധിച്ചു. 10 പേരുടെ ഉറവിടം വ്യക്തമല്ല. കോഴിക്കോട് കോര്‍പ്പറേഷന്‍ പരിധിയില്‍ സമ്പര്‍ക്കം വഴി വഴി 48 പേര്‍ക്കും താമരശ്ശേരിയില്‍ 13 പേര്‍ക്കും ഉണ്ണികുളത്ത് 10 പേര്‍ക്കും രോഗം ബാധിച്ചു.നാല് ആരോഗ്യപ്രവര്‍ത്തകര്‍ക്കും പോസിറ്റീവായി. ഇതോടെ ചികിത്സയിലുള്ള കോഴിക്കോട് സ്വദേശികളുടെ എണ്ണം 1122 ആയി. 257 പേര്‍ രോഗമുക്തി നേടി.

ജില്ലാ ശുചിത്വമിഷന്റെ നേതൃത്വത്തില്‍ ഗന്ധകി മുക്ത് ഭാരത് 2020 കാമ്പയിന്റെ ഭാഗമായി ചിത്രരചനാ മത്സരം സംഘടിപ്പിച്ചു.  മത്സരത്തില്‍ 137 വിദ്യാർത്ഥികൾ പങ്കെടുത്തു. ആറ് മുതൽ എട്ടാംതരം വരെയും ഒൻപത് മുതൽ 12ആം തരം വരെയുമുള്ള കുട്ടികള്‍ക്കാണ് രണ്ട് വിഭാഗങ്ങളിലായി  മത്സരം സംഘടിപ്പിച്ചത്.

ആദ്യ വിഭാഗത്തിലെ മത്സരത്തില്‍ വിജയികളായവര്‍. ഉള്ള്യേരി എ.യു.പി.എസ് വിദ്യാർത്ഥിനി വേദിക.ജെ.എസ് ഒന്നാം സ്ഥാനം നേടി. രണ്ടാം സ്ഥാനം- മസിന്‍രാജാ (ജി.യു.പി.എസ് ഉണ്ണികുളം), മൂന്നാം സ്ഥാനം  അഗസ്ത്യ അജയ് (ജിയുപിഎസ് മണാശ്ശേരി).

വില്ല്യാപ്പള്ളി ഗ്രാമപഞ്ചായത്ത് സമ്പൂർണ്ണ ശുചിത്വ പഞ്ചായത്ത് പദവി നേടി. സംസ്ഥാന സര്‍ക്കാരിന്റെ നിര്‍ദേശപ്രകാരമുള്ള വിവിധ പ്രവര്‍ത്തനങ്ങളുടെ ഫലമായി നൂറില്‍ 78 പോയിന്റ് നേടിയാണ് പഞ്ചായത്തിന്റെ ശുചിത്വ പദവി നേട്ടം.

വിവിധ തരത്തിലുള്ള മാലിന്യങ്ങൾ ശേഖരിച്ച് അവ വേർതിരിക്കുന്ന പ്രവർത്തനം വളരെ മികച്ച രീതിയിലാണ് പഞ്ചായത്ത് നടത്തിവരുന്നത്. ജൈവമാലിന്യങ്ങൾ കൃഷിയിടങ്ങളിലേക്കും അജൈവ മാലിന്യങ്ങൾ വേർതിരിച്ച് സൂക്ഷിച്ച് റീസൈക്ലിങ് കേന്ദ്രങ്ങളിലേക്കും അയക്കുന്നുണ്ട്.

കെ.എസ്.ആർ.ടി.സി ജീവനക്കാർക്ക് ആഗസ്ത് മാസത്തെ ശമ്പളവും വേതനവും നൽകുന്നതിന് 65.50 കോടി രൂപ അനുവദിച്ചതായി ഗതാഗത വകുപ്പ് മന്ത്രിയുടെ  ഓഫീസ്  അറിയിച്ചു. കോവിഡ് 19 ന്റെ പശ്ചാത്തലത്തിൽ താൽക്കാലിക ജീവനക്കാർക്ക് എക്സ് ഗ്രേഷ്യ തുക നൽകുന്നതിനുളള 1.50 കോടി രൂപ ഉൾപ്പെടെയാണ് തുക അനുവദിച്ചിട്ടുള്ളത്.

മാവൂര്‍ ഗവ. ഹയര്‍സെക്കന്ററി സ്കൂളിന് വേണ്ടി നിര്‍മ്മിക്കുന്ന പുതിയ കെട്ടിടത്തിന്‍റെ ശിലാസ്ഥാപനം (ആഗസ്ത് 22ന് ) രാവിലെ 10 മണിക്ക് പി.ടി.എ റഹീം എം.എല്‍.എ നിര്‍വ്വഹിക്കും. പൊതു വിദ്യാഭ്യാസ സംരക്ഷണ യജ്ഞത്തിന്‍റെ ഭാഗമായി അനുവദിച്ച 1.35 കോടി രൂപ ചെലവിലാണ് പുതിയ കെട്ടിടം നിര്‍മ്മിക്കുന്നത്. മൂന്ന് നിലകളിലായി നിര്‍മ്മിക്കുന്ന കെട്ടിടത്തില്‍ ആറ് ക്ലാസ് റൂമുകളും എല്ലാ നിലകളിലും ടോയ്ലറ്റുകളും ഉണ്ടാവും.

കുന്ദമംഗലം ബ്ലോക്ക് പട്ടികജാതി വികസന ഓഫീസിന് കീഴിലെ മാവൂര്‍, പെരുമണ്ണ   ഗ്രാമപഞ്ചായത്തുകളിലെയും മുക്കം മുനിസിപ്പാലിറ്റിയിലെയും പട്ടികജാതി  വിഭാഗത്തില്‍പ്പെട്ട എട്ടാം ക്ലാസ്സ് മുതല്‍ പ്ലസ് ടു വരെയുളള വിദ്യാര്‍ത്ഥികള്‍ക്കായി   പഠനമുറി അനുവദിക്കുന്നതിനായി അപേക്ഷ ക്ഷണിച്ചു. അപേക്ഷ  ആഗസ്റ്റ് 27 ന് വൈകീട്ട് അഞ്ചിനകം കുന്ദമംഗലം ബ്ലോക്ക് പട്ടികജാതി വികസന ആഫീസില്‍ എത്തിക്കണം.    കൂടുതല്‍ വിവരങ്ങള്‍ക്ക്  കുന്ദമംഗലം ബ്ലോക്ക് പട്ടികജാതി വികസന ഓഫീസുമായി ബന്ധപ്പെടുക. ഫോൺ ; 9745316892.

ശുചിത്വ മേഖലയിൽ സുസ്ഥിര വികസം നടത്തിയ തദ്ദേശ സ്വയംഭരണ സ്ഥാപനങ്ങൾക്ക് സംസ്ഥാന സർക്കാർ നൽകുന്ന ശുചിത്വ പദവിക്ക് പനങ്ങാട്  പഞ്ചായത്ത് അർഹത നേടി. ഗ്രാമപഞ്ചായത്ത് പ്രസിഡണ്ട് വി.എം കമലാക്ഷി ശുചിത്വ പദവി പ്രഖ്യാപനം നടത്തി.  ഗ്രാമപഞ്ചായത്ത് വൈസ് പ്രസിഡണ്ട് പി.ഉസ്മാൻ അധ്യക്ഷത വഹിച്ചു.  ഹരിത കേരളം ജില്ലാ മിഷൻ കോ-ഓർഡിനേറ്റർ പി.പ്രകാശ് മുഖ്യപ്രഭാഷണം നടത്തി.