ജില്ലയിലെ കോവിഡ് 19 പ്രതിരോധത്തിന്റെ ഭാഗമായി ഓള്‍ കേരള ടെയ്ലേഴ്സ് അസോസിയേഷന്‍ പത്തനംതിട്ട ജില്ലാ ഘടകം ഫസ്റ്റ് ലൈന്‍ ട്രീറ്റ്മെന്റ് സെന്ററുകളിലേക്ക് ആവശ്യമായ വസ്തുക്കള്‍ ജില്ലാ ഭരണകൂടത്തിനു കൈമാറി.  240 പുതപ്പ്, 3000 മാസ്‌ക്, 20 പിപിഇ കിറ്റ്, 200 ബോട്ടില്‍ സാനിറ്റൈസര്‍, 20 പായ്ക്കറ്റ് ബ്ലീച്ചിംഗ് പൗഡര്‍ എന്നിവ അടങ്ങുന്ന വസ്തുക്കളാണു കൈമാറിയത്. 

റീബില്‍ഡ് കേരള പദ്ധതി പ്രകാരം പശു, കിടാരി, ആട്, കോഴി, താറാവ് വളര്‍ത്തല്‍, തൊഴുത്ത് പുനരുദ്ധാരണം, യന്ത്രവത്ക്കരണം, തീറ്റപ്പുല്‍കൃഷി, കാലീത്തീറ്റ എന്നിവയ്ക്ക് ധനസഹായം ആവശ്യമുള്ള പത്തനംതിട്ട നഗരപരിധിയിലുള്ള കര്‍ഷകര്‍ ഈ മാസം 24ന് വൈകീട്ട് മൂന്നിനകം ജില്ലാ വെറ്ററിനറി കേന്ദ്രത്തില്‍ അപേക്ഷ നല്‍കണം. 2018ലെ പ്രളയത്തില്‍ നഷ്ടമുണ്ടായവര്‍ക്ക് മുന്‍ഗണനയുണ്ട്. അപേക്ഷാഫോറം ജില്ലാ വെറ്ററിനറി      കേന്ദ്രത്തില്‍ ലഭിക്കും. ഫോണ്‍: 0468 2270908.                      

അത്യുത്പാദന ശേഷിയുള്ള മികച്ചയിനം തെങ്ങിന്‍ തൈകള്‍ ആവശ്യമുള്ളവര്‍ പത്തനംതിട്ട കൃഷിഭവനില്‍ ബന്ധപ്പെടണമെന്ന് കൃഷി ഫീല്‍ഡ് ഓഫീസര്‍ അറിയിച്ചു. ഫോണ്‍: 9745523550.                    

 കടമ്പനാട് പഞ്ചായത്തിലെ പാണ്ടിമലപ്പുറം വാര്‍ഡ് കണ്ടെയ്ന്‍മെന്റ് സോണാക്കിയ പശ്ചാത്തലത്തില്‍ ജോലിക്കു പോകാന്‍ കഴിയാതെ ബുദ്ധിമുട്ടുന്ന കുടുംബങ്ങള്‍ക്ക് സൗജന്യ റേഷന്‍ അനുവദിക്കുകയും ഓണക്കിറ്റ് എത്തിക്കുന്നതിനുള്ള നടപടി സ്വീകരിക്കണമെന്നും ചിറ്റയം ഗോപകുമാര്‍ എംഎല്‍എ ആവശ്യപ്പെട്ടു. ഇതു സംബന്ധിച്ച് എംഎല്‍എ കളക്ടര്‍ക്ക് കത്ത് നല്‍കി. 

സ്വകാര്യ മോട്ടോര്‍ മേഖലയില്‍ ജോലി ചെയ്യുന്നതും നിലവില്‍ മോട്ടോര്‍ തൊഴിലാളി ക്ഷേമനിധിയില്‍ രജിസ്റ്റര്‍ ചെയ്തിട്ടില്ലാത്തതുമായ സ്‌കാറ്റേഡ് വര്‍ക്കേഴ്‌സ്, പാസഞ്ചര്‍ ഗൈഡുകള്‍, ഡ്രൈവിംഗ് സ്‌കൂള്‍ ജീവനക്കാര്‍ എന്നീ വിഭാഗങ്ങളിലെ തൊഴിലാളികള്‍ക്ക് കോവിഡ്-19ന്റെ ഭാഗമായി 1000 രൂപ സൗജന്യ ധനസഹായം അനുവദിക്കും. അപേക്ഷ അനുബന്ധ രേഖകള്‍ സഹിതം മോട്ടോര്‍ തൊഴിലാളി ക്ഷേമനിധി ജില്ലാ ഓഫീസില്‍ എത്തിക്കണം. അപേക്ഷാഫോറം kmtwwfb.org എന്ന വെബ്‌സൈറ്റില്‍ ലഭ്യമാണ്. ഫോണ്‍: 0468 2320158, 9188519853.