കേരള ലോകായുക്ത കണ്ണൂര്‍, കോഴിക്കോട് ജില്ലകളില്‍ മാർച്ച് 24  മുതൽ 26 വരെ ക്യാമ്പ് സിറ്റിങ് നടത്തുന്നു. മാർച്ച് 24ന് കണ്ണൂര്‍ പി.ഡബ്ല്യൂ.ഡി റസ്റ്റ് ഹൗസ് കോണ്‍ഫറന്‍സ് ഹാളിലും മാർച്ച്  25,26 തിയ്യതികളിൽ കോഴിക്കോട് പി.ഡബ്ല്യൂ.ഡി റസ്റ്റ് ഹൗസ് കോണ്‍ഫറന്‍സ് ഹാളിലും സിറ്റിങ് നടക്കും. സിറ്റിങ്ങില്‍ പുതിയ പരാതികള്‍ സ്വീകരിക്കുമെന്ന് രജിസ്ട്രാര്‍ അറിയിച്ചു. ഫോണ്‍- 0471 2300362.

സാക്ഷരതാമിഷന്റെ ഇതര സംസ്ഥാന തൊഴിലാളി സാക്ഷരതാ പദ്ധതി 'ചങ്ങാതി' യുടെ സംസ്ഥാന തല സര്‍വ്വേ ഉദ്ഘാടനം മാര്‍ച്ച് 15ന് രാവിലെ 11ന് എ.പി. അനില്‍ കുമാര്‍ എം.എല്‍.എ. നിര്‍വഹിക്കും. ഗ്രാമപഞ്ചായത്ത് പ്രസിഡന്റ് കെ.കെ. പുഷ്പവല്ലി അധ്യക്ഷത വഹിക്കും. സംസ്ഥാന സാക്ഷരതാ മിഷന്‍ ഡയറക്ടര്‍ എ.ജി. ഒലീന പദ്ധതി വിശദീകരിക്കും.

കേരള ഖാദിഗ്രാമവ്യവസായ ബോര്‍ഡിന് കീഴിലെ കല്‍പ്പറ്റ, പനമരം, മാനന്തവാടി ഖാദിഗ്രാമസൗഭാഗ്യ ഷോറൂമുകളില്‍ റംസാൻ റിബേറ്റ് മേള ആരംഭിച്ചു. മാർച്ച് 23 വരെ 30 ശതമാനം റിബേറ്റോടെ ഖാദി തുണിത്തരങ്ങള്‍, ബെഡ് ഷീറ്റുകള്‍, ഉന്നക്കിടക്കകള്‍, വിവിധ തരം സില്‍ക്ക് തുണിത്തരങ്ങള്‍, ഗ്രാമവ്യവസായ ഉത്പന്നങ്ങള്‍ എന്നിവ ലഭ്യമാകും. സര്‍ക്കാര്‍, അര്‍ദ്ധ സര്‍ക്കാര്‍ ജീവനക്കാര്‍ക്ക് ക്രെഡിറ്റ് സൗകര്യമുണ്ട്. ഫോണ്‍: 04936 202602 (കല്‍പ്പറ്റ), 04935 294034 (പനമരം) 04935-294233 (മാനന്തവാടി)

പനമരം സാമൂഹിക ആരോഗ്യ കേന്ദ്രത്തിലേക്ക് താത്ക്കാലിക ഇ.സി.ജി ടെക്‌നിഷ്യൻ നിയമനം നടത്തുന്നു. വി.എച്ച്.എസ്.സി ഇ.സി.ജി ടെക്‌നീഷ്യൻ/ ഉപരി യോഗ്യതയുള്ളവർക്ക് അപേക്ഷിക്കാം. കമ്പ്യൂട്ടർ പരിജ്ഞാനം അഭികാമ്യം. ഉദ്യോഗാർത്ഥികൾ യോഗ്യത, പ്രവർത്തി പരിചയ സർട്ടിഫിക്കറ്റ് എന്നിവ സഹിതം മാർച്ച് 13 ന് രാവിലെ 11 ന് സി.എച്ച്.സി കോൺഫെറൻസ് ഹാളിൽ നടക്കുന്ന അഭിമുഖത്തിന് പങ്കെടുക്കണം. ഫോൺ: 04935 221189 

സ്റ്റേറ്റ് ഹെൽത്ത് സിസ്റ്റംസ് റിസോഴ്സ്‌ സെന്റർ കേരളയുടെ ഐ.സി.എം.ആർ പ്രോജെക്ടിലെ പ്രൊജക്റ്റ് റിസർച്ച് സൈയൻറ്റിസ്റ്റ്-2 തസ്തികയിലേക്ക് കരാർ അടിസ്ഥാനത്തിൽ സൈക്യാട്രിസ്റ്റ് നിയമനം നടത്തുന്നു. ഉദ്യോഗാർത്ഥികൾ മാർച്ച് 18 നകം അപേക്ഷ ഗൂഗിൾ ഫോം മുഖേനെ നൽകണം. കൂടുതൽ വിവരങ്ങൾ shsrc.kerala.gov.in ൽ ലഭ്യമാണ്. 

ടെക്നിക്കല്‍ സ്‌കൂള്‍ പ്രവേശനം

സുല്‍ത്താന്‍ ബത്തേരി ഗവ. ടെക്നിക്കല്‍ ഹൈസ്‌കൂളില്‍ 2026-27 വര്‍ഷം എട്ടാം ക്ലാസ് പ്രവേശനത്തിന് (ഇംഗ്ലീഷ് മീഡിയം) അപേക്ഷ ക്ഷണിച്ചു. ഏപ്രിൽ 6 ന് രാവിലെ പത്തിനകം സ്‌കൂളില്‍ നേരിട്ടോ www.polyadmission.org/ths എന്ന വെബ് സൈറ്റ് മുഖേനയോ അപേക്ഷ നല്‍കണം. ഏപ്രിൽ ഒൻപത് രാവിലെ 10 ന് സുല്‍ത്താന്‍ ബത്തേരി ഗവ. ടെക്നിക്കല്‍ ഹൈസ്‌കൂളില്‍ പരീക്ഷ നടക്കും.  ഫോണ്‍: 04936 220147, 9995754134, 9961154878.

സംസ്ഥാന സാമൂഹ്യനീതി വകുപ്പ് ഭിന്നശേഷി വിഭാഗത്തിൽ നടപ്പിലാക്കുന്ന സമഗ്ര ബോധവത്ക്കരണ പരിപാടിയായ അൻപ് 2026 ആദ്യ ഘട്ടം സാമൂഹിക സേവന സംഘടനയായ ശ്രേയസിൻ്റെ ഓഡിറ്റോറിയത്തിൽ സംഘടിപ്പിച്ചു.
സുൽത്താൻ ബത്തേരി ബ്ലോക്ക് പഞ്ചായത്ത് പ്രസിഡൻറ്  പ്രസന്ന ശശിധരൻ പരിപാടി ഉദ്ഘാടനം ചെയ്തു.   
ബൗദ്ധിക - മാനസിക വെല്ലുവിളികൾ നേരിടുന്ന  വ്യക്തികളുടെ സാമൂഹിക ഇടപെടലുകൾ  ശക്തിപ്പെടുത്തുകയും അവരുടെ അവകാശങ്ങളെയും സർക്കാർ ക്ഷേമപദ്ധതികളെയും  സമൂഹത്തിലെ എല്ലാ വിഭാഗങ്ങളിലേക്കും എത്തിക്കുന്നതിനായാണ് അൻപ് ക്യാമ്പയിനിലൂടെ ലക്ഷ്യമിടുന്നത്. 

അരുവിക്കര മണ്ഡലത്തിലെ വിവിധ ബസ് കാത്തിരിപ്പ് കേന്ദ്രങ്ങളുടെ ഉദ്ഘാടനം ജി. സ്റ്റീഫൻ എം.എൽ.എ നിർവഹിച്ചു.  സർക്കാർ ജനങ്ങൾക്ക് വേണ്ടി നിർമിക്കുന്ന കാത്തിരിപ്പ് കേന്ദ്രങ്ങളും വിശ്രമയിടങ്ങളും ഉൾപ്പെടെയുള്ള പൊതുഇടങ്ങൾ സംരക്ഷിക്കേണ്ടത് ഓരോ പൗരന്റെയും കടമയാണെന്നും ഇത്തരം കേന്ദ്രങ്ങളുടെ സംരക്ഷണം ഏറ്റെടുക്കാനായി കുടുംബശ്രീ പ്രവർത്തകരും പുരുഷസഹായ സംഘങ്ങളും മുന്നോട്ട് വരണമെന്നും എം എൽ എ പറഞ്ഞു.

മുണ്ടക്കൈ–ചൂരല്‍മല ദുരന്തത്തില്‍ നാശനഷ്ടം സംഭവിച്ച വാണിജ്യ കെട്ടിടങ്ങള്‍ക്ക് ധനസഹായം അനുവദിക്കുന്നതിനായി കളക്ടറേറ്റ് കോൺഫറൻസ് ഹാളിൽ അദാലത്ത് സംഘടിപ്പിച്ചു. അദാലത്തിൽ ലഭിച്ച  226 അപേക്ഷകയിൽ തുടർനടപടി സ്വീകരിക്കും . ഇതിൽ 70 കെട്ടിട ഉടമകളും 156 സംരംഭകരും ഉൾപ്പെടുന്നു. ദുരന്തബാധിതരായ വാണിജ്യ സ്ഥാപന ഉടമകളുടെ ഗുണഭോക്തൃ പട്ടിക അന്തിമമാക്കുന്നതിന് മുന്നോടിയായാണ് അദാലത്ത് സംഘടിപ്പിച്ചത്. ലഭിച്ച അപേക്ഷകൾ സൂക്ഷ്മ പരിശോധനകൾക്ക് സർക്കാരിലേക്ക് അയക്കും. ദുരന്ത നിവാരണ വകുപ്പ്, മൈക്രോ പ്ലാൻ വിഭാഗം, ഐ. ടി മിഷൻ എന്നിവയുടെ നേതൃത്വത്തിലാണ് അദാലത്ത് സംഘടിപ്പിച്ചത്

നിയമസഭാ മന്ദിരത്തിന് മുന്നിലുള്ള റോഡിൽ സ്ഥാപിച്ച അലങ്കാര തെരുവു വിളക്കുകളുടെയും പിഎംജി ജംഗ്‌ഷനിൽ സ്ഥാപിച്ച ഹൈമാസ്റ്റ് ലൈറ്റിന്റെയും ഉദ്ഘാടനം  വി.കെ പ്രശാന്ത് എംഎൽഎ നിർവഹിച്ചു.

നിയമസഭയ്ക്ക് സമീപപ്രദേശങ്ങളുടെ മുഖഛായ മാറുകയാണെന്ന് എം എൽ എ പറഞ്ഞു. രാജഭരണകാലത്തെ നഗരത്തിൻ്റെ അലങ്കാരമായ രാമരായർ വിളക്കിനു സമാനമായ വിളക്കുകളാണ് സ്ഥാപിച്ചിരിക്കുന്നത്. അൻപതിലധികം ഹൈമാസ്റ്റ്, മിനിമാസ്റ്റ് ലൈറ്റുകളും ആയിരത്തിലധികം സൗരോർജ്ജ തെരുവുവിളക്കുകളും മണ്ഡലത്തിൽ സ്ഥാപിച്ചതായി എംഎൽഎ അറിയിച്ചു.