അരുവിക്കര മണ്ഡലത്തിലെ വിവിധ ബസ് കാത്തിരിപ്പ് കേന്ദ്രങ്ങളുടെ ഉദ്ഘാടനം ജി. സ്റ്റീഫൻ എം.എൽ.എ നിർവഹിച്ചു.  സർക്കാർ ജനങ്ങൾക്ക് വേണ്ടി നിർമിക്കുന്ന കാത്തിരിപ്പ് കേന്ദ്രങ്ങളും വിശ്രമയിടങ്ങളും ഉൾപ്പെടെയുള്ള പൊതുഇടങ്ങൾ സംരക്ഷിക്കേണ്ടത് ഓരോ പൗരന്റെയും കടമയാണെന്നും ഇത്തരം കേന്ദ്രങ്ങളുടെ സംരക്ഷണം ഏറ്റെടുക്കാനായി കുടുംബശ്രീ പ്രവർത്തകരും പുരുഷസഹായ സംഘങ്ങളും മുന്നോട്ട് വരണമെന്നും എം എൽ എ പറഞ്ഞു.

മുണ്ടക്കൈ–ചൂരല്‍മല ദുരന്തത്തില്‍ നാശനഷ്ടം സംഭവിച്ച വാണിജ്യ കെട്ടിടങ്ങള്‍ക്ക് ധനസഹായം അനുവദിക്കുന്നതിനായി കളക്ടറേറ്റ് കോൺഫറൻസ് ഹാളിൽ അദാലത്ത് സംഘടിപ്പിച്ചു. അദാലത്തിൽ ലഭിച്ച  226 അപേക്ഷകയിൽ തുടർനടപടി സ്വീകരിക്കും . ഇതിൽ 70 കെട്ടിട ഉടമകളും 156 സംരംഭകരും ഉൾപ്പെടുന്നു. ദുരന്തബാധിതരായ വാണിജ്യ സ്ഥാപന ഉടമകളുടെ ഗുണഭോക്തൃ പട്ടിക അന്തിമമാക്കുന്നതിന് മുന്നോടിയായാണ് അദാലത്ത് സംഘടിപ്പിച്ചത്. ലഭിച്ച അപേക്ഷകൾ സൂക്ഷ്മ പരിശോധനകൾക്ക് സർക്കാരിലേക്ക് അയക്കും. ദുരന്ത നിവാരണ വകുപ്പ്, മൈക്രോ പ്ലാൻ വിഭാഗം, ഐ. ടി മിഷൻ എന്നിവയുടെ നേതൃത്വത്തിലാണ് അദാലത്ത് സംഘടിപ്പിച്ചത്

നിയമസഭാ മന്ദിരത്തിന് മുന്നിലുള്ള റോഡിൽ സ്ഥാപിച്ച അലങ്കാര തെരുവു വിളക്കുകളുടെയും പിഎംജി ജംഗ്‌ഷനിൽ സ്ഥാപിച്ച ഹൈമാസ്റ്റ് ലൈറ്റിന്റെയും ഉദ്ഘാടനം  വി.കെ പ്രശാന്ത് എംഎൽഎ നിർവഹിച്ചു.

നിയമസഭയ്ക്ക് സമീപപ്രദേശങ്ങളുടെ മുഖഛായ മാറുകയാണെന്ന് എം എൽ എ പറഞ്ഞു. രാജഭരണകാലത്തെ നഗരത്തിൻ്റെ അലങ്കാരമായ രാമരായർ വിളക്കിനു സമാനമായ വിളക്കുകളാണ് സ്ഥാപിച്ചിരിക്കുന്നത്. അൻപതിലധികം ഹൈമാസ്റ്റ്, മിനിമാസ്റ്റ് ലൈറ്റുകളും ആയിരത്തിലധികം സൗരോർജ്ജ തെരുവുവിളക്കുകളും മണ്ഡലത്തിൽ സ്ഥാപിച്ചതായി എംഎൽഎ അറിയിച്ചു.

#16 കോടി രൂപ ചെലവിലാണ് പദ്ധതി നടപ്പാക്കിയത്#

വാമനപുരം മണ്ഡലത്തിലെ ആനാട്, നന്ദിയോട് പഞ്ചായത്തുകളിൽ എ.ആർ.ഡബ്ലിയു.എസ്.എസ്, സ്റ്റേറ്റ് പ്ലാൻ, ജൽ ജീവൻ മിഷൻ പദ്ധതികളിൽ ഉൾപ്പെടുത്തി പൂർത്തിയായ ആനാട്, കുറുപുഴ,പാലോട് വില്ലേജുകൾക്ക് വേണ്ടിയുള്ള കുടിവെള്ള പദ്ധതികളുടെ ഉദ്ഘാടനം ജലവിഭവ വകുപ്പ് മന്ത്രി റോഷി അഗസ്റ്റിൻ  ഓൺലൈനായി നിർവഹിച്ചു.

ആനാട്, നന്ദിയോട് പഞ്ചായത്തുകളിലെ മുഴുവൻ വീടുകളിലും ശുദ്ധമായ കുടിവെള്ളം എത്തിക്കുക എന്ന ലക്ഷ്യത്തോടെയാണ്   പദ്ധതി നടപ്പാക്കുന്നതെന്ന്  മന്ത്രി പറഞ്ഞു.

മഴക്കാല മുന്നൊരുക്കങ്ങളുടെ ഭാഗമായി വിവിധ വകുപ്പുകൾ സുരക്ഷ ഉറപ്പാക്കുന്നതിനുള്ള  നടപടികൾ സ്വീകരിക്കണമെന്ന് ജില്ലാ കളക്ടർ ഡി. ആർ മേഘശ്രീ നിർദേശിച്ചു. മഴക്കാല മുന്നൊരുക്ക പ്രവർത്തനങ്ങൾ അവലോകനം ചെയ്യാൻ ചേർന്ന യോഗത്തിൽ അധ്യക്ഷത വഹിച്ചു സംസാരിക്കുകയായിരുന്നു ജില്ലാ കളക്ടർ.അടിയന്തര സാഹചര്യങ്ങളിൽ ആളുകളെ  സുരക്ഷിതമായി മാറ്റി താമസിപ്പിക്കുന്നതിനായി അനുയോജ്യമായ സ്ഥലങ്ങൾ കണ്ടെത്തി ആവശ്യമായ ക്രമീകരണങ്ങളും അടിസ്ഥാന സൗകര്യങ്ങളും ഒരുക്കണമെന്ന് കളക്ടർ നിർദേശിച്ചു. തദ്ദേശ സ്വയംഭരണ സ്ഥാപനങ്ങളിലെ ഭരണസമിതി-വാർഡ് സഭ യോഗങ്ങൾ ചേർന്ന് മഴക്കാല മുന്നൊരുക്ക പ്രവർത്തനങ്ങൾ ശക്തിപ്പെടുത്തണമെന്നും  പറഞ്ഞു.

#ഗാർഹിക ഗ്യാസ് സിലിണ്ടറുകൾ വാണിജ്യ  ആവശ്യത്തിന് ഉപയോഗിച്ചാൽ കർശന നടപടി#

ജില്ലയിൽ ഗാർഹിക പാചകവാതക സിലിണ്ടറുകളുടെ ലഭ്യതയിൽ യാതൊരു തരത്തിലുള്ള ആശങ്കയും വേണ്ടെന്ന് ജില്ലാ സപ്ലൈ ഓഫീസർ മാത്യു എ ജെ അറിയിച്ചു.
 നിലവിൽ ജില്ലയിൽ പാചകവാതക ദൗർലഭ്യമില്ല.ബുക്ക് ചെയ്തിട്ടുള്ള എല്ലാവർക്കും ഗ്യാസ് സിലിണ്ടറുകൾ ബന്ധപ്പെട്ട ഏജൻസികൾ വഴി വീടുകളിൽ എത്തിച്ച് വിതരണം നടത്തി വരുന്നതായും അദ്ദേഹം അറിയിച്ചു.

വാമനപുരം നിയോജക മണ്ഡലത്തിൽ മനുഷ്യ-വന്യജീവി സംഘർഷം ലഘൂകരിക്കുന്നതിനായി നടപ്പിലാക്കുന്ന ആനകിടങ്ങ് പദ്ധതിയുടെ ഉദ്ഘാടനം കൃഷി വകുപ്പ് മന്ത്രി പി. പ്രസാദ് ഓൺലൈനായി നിർവ്വഹിച്ചു. സംസ്ഥാന കൃഷി വകുപ്പും വനം-വന്യജീവി വകുപ്പും സംയുക്തമായി നടപ്പിലാക്കുന്ന ആർ.കെ.വി.വൈ പദ്ധതിയുടെ ഭാഗമായാണ് കിടങ്ങ് നിർമ്മിക്കുന്നത്.
കർഷകർക്ക് സംരക്ഷണം ഉറപ്പാക്കുക എന്നത് സർക്കാരിന്റെ ഉത്തരവാദിത്തമാണെന്ന് യോഗത്തിൽ മന്ത്രി പറഞ്ഞു.

ജനങ്ങളുടെ പിന്തുണയാണ് സർക്കാരിന് ആവശ്യം. അത്തരത്തിൽ ജനങ്ങൾ ഒപ്പം നിന്നത് കൊണ്ടാണ് നെടുമങ്ങാട് നിയോജക മണ്ഡലത്തിലെ പല പദ്ധതികളും  യാഥാർഥ്യമായതെന്ന് ഭക്ഷ്യ പൊതുവിതരണവകുപ്പ് മന്ത്രി ജി ആർ അനിൽ.
നെടുമങ്ങാട് നിയോജക മണ്ഡലത്തിലെ പഴകുറ്റി -മംഗലപുരം റോഡ് റീച്ച് 1, പഴകുറ്റി -മുക്കംപാലമൂട് റോഡിന്റെ പൂർത്തികരണവും തേക്കട ശീമമുളമുക്ക് റോഡിന്റെ നിർമാണ ഉദ്ഘാടനവും നിർവഹിച്ച് സംസാരിക്കുകയായിരുന്നു മന്ത്രി.  

ജനങ്ങളുടെ ആവശ്യം അറിഞ്ഞ്, നാട് സ്വപ്നം കണ്ട പദ്ധതികൾ ചെറിയ കാലയളവിൽ പൂർത്തിയാക്കാൻ സർക്കാരിന് കഴിഞ്ഞിട്ടുണ്ടെന്ന് മന്ത്രി പറഞ്ഞു.

പ്ലസ് ടു, ബിരുദം യോ​ഗ്യതയുള്ളവർക്ക് കെല്‍ട്രോണിൽ വിവിധ മാധ്യമ കോഴ്‌സുകളിലേക്ക് അപേക്ഷിക്കാം.

പ്രിന്റ് മീഡിയ, ടെലിവിഷന്‍ ജേര്‍ണലിസം, ഡിജിറ്റല്‍ മീഡിയ, വാര്‍ത്താ അവതരണം, ആങ്കറിംഗ്, പബ്ലിക് റിലേഷന്‍സ്, അഡ്വര്‍ടൈസിംങ്, ആര്‍ട്ടിഫിഷ്യല്‍ ഇന്റലിജന്‍സ് അധിഷ്ഠിത കണ്ടന്റ് നിര്‍മ്മാണം, വീഡിയോ ക്യാമറ പരിശീലനം, വീഡിയോ എഡിറ്റിംഗ് തുടങ്ങിയ മേഖലകളില്‍ സമഗ്രമായ പരിശീലനമാണ് നല്‍കുന്നത്.

കെല്‍ട്രോണ്‍ പരിശീലന കേന്ദ്രങ്ങളിലേക്കാണ് അപേക്ഷകള്‍ സമര്‍പ്പിക്കേണ്ടത്. കൂടുതല്‍ വിവരങ്ങള്‍ക്കും അപേക്ഷാഫോമിനുമായി 9544958182 എന്ന നമ്പറിൽ ബന്ധപ്പെടുക.

കഠിനംകുളം ചേരമാന്‍തുരുത്ത് ഗവ. ആയുര്‍വേദ ഡിസ്‌പെന്‍സറിയില്‍ പുതുതായി നിര്‍മിച്ച ഒ.പി ലെവല്‍ ചികിത്സയ്ക്കുള്ള കെട്ടിടം ആരോഗ്യവകുപ്പ് മന്ത്രി വീണാ ജോര്‍ജ് ഓണ്‍ലൈനായി ഉദ്ഘാടനം ചെയ്തു. നാഷണല്‍ ആയുഷ് മിഷന്റെ 30 ലക്ഷം രൂപ വിനിയോഗിച്ചാണ് നിര്‍മാണം പൂര്‍ത്തിയാക്കിയത്.

യോഗത്തില്‍ വി.ശശി എംഎല്‍എ അധ്യക്ഷത വഹിച്ചു. ജില്ലാ പഞ്ചായത്ത് അംഗം മിനി ജയചന്ദ്രന്‍, സീനിയര്‍ മെഡിക്കല്‍ ഓഫീസര്‍ ഡോ. ബിനോ ടി.ജെ തുടങ്ങിയവര്‍ പങ്കെടുത്തു.