വടക്കാഞ്ചേരി ജില്ലാ ആശുപത്രിയിലേക്ക് 2020 ആഗസ്റ്റ് ഒന്നു മുതൽ 2021 ജൂലൈ 31 വരെ കെഎഎസ്പി, ജെഎസ്എകെ, ആരോഗ്യകിരണം, ആർബിഎസ്‌കെ എന്നീ സർക്കാർ പദ്ധതികളിൽ ഉൾപ്പെടുന്ന രോഗികൾക്ക് ഡോക്ടർമാരുടെ കുറുപ്പടി പ്രകാരം ലാബ് ടെസ്റ്റ് ചെയ്യുന്നതിന് ടെണ്ടർ ക്ഷണിച്ചു. ടെണ്ടർ സ്വീകരിക്കുന്ന അവസാന തീയതി ജൂലൈ 22 ഉച്ചയ്ക്ക് 12 മണി. ഫോൺ: 04884 232221.

തൃശൂർ ഗവൺമെന്റ് ലോ കോളേജിൽ പുനഃപ്രവേശനത്തിന് അപേക്ഷ ക്ഷണിച്ചു. പഞ്ചവത്സര ബിബിഎ എൽ എൽ ബി ഓണേഴ്‌സ് കോഴ്‌സിലെ 3, 4, 6, 8, 10 സെമസ്റ്ററുകളിലെയും ത്രിവത്സര എൽഎൽബി യൂണിറ്ററി കോഴ്‌സിലെ 3, 4, 6 സെമസ്റ്ററുകളിലെയും ഒഴിവുള്ള സീറ്റിലേക്ക് ഇടയ്ക്ക് പഠനം നിർത്തിയവർക്ക് പുനഃപ്രവേശനത്തിന് അപേക്ഷിക്കാവുന്നതാണ്. കോഴിക്കോട് ഗവൺമെന്റ് ലോ കോളജിൽ പഠിച്ചുകൊണ്ടിരിക്കുന്നവർക്ക് കോളേജ് മാറ്റത്തിനുവേണ്ടി 13/7/2020ന് ഉച്ചതിരിഞ്ഞ് 3 മണി വരെ അപേക്ഷിക്കാവുന്നതാണ്.

ഭിന്നശേഷിക്കാരായ പെൺകുട്ടികൾക്കും ഭിന്നശേഷിക്കാരായ മാതാപിതാക്കളുടെ പെൺമക്കൾക്കും സാമൂഹ്യ നീതി വകുപ്പ് മുഖേന വിവാഹധനസഹായം അനുവദിക്കുന്നു. ഭിന്നശേഷി തെളിയിക്കുന്ന സർട്ടിഫിക്കറ്റ്‌കോപ്പി, വരുമാന സർട്ടിഫിക്കറ്റ്, പെൺകുട്ടിയുടെ വയസ്സ് തെളിയിക്കുന്ന രേഖ, റേഷൻ കാർഡിന്റെ പകർപ്പ്, ആധാർ കാർഡിന്റെ പകർപ്പ്, ബാങ്ക് പാസ്ബുക്കിന്റെ പകർപ്പ്, എന്നിവ സഹിതം 2020 ജൂലൈ 31നകം ചെമ്പൂക്കാവ് സിവിൽസ്റ്റേഷനിൽ പ്രവർത്തിക്കുന്ന തൃശ്ശൂർ ജില്ലാ സാമൂഹ്യനീതി ഓഫീസിൽ എത്തിക്കണമെന്ന് ജില്ലാ സാമൂഹ്യനീതി ഓഫീസർ അറിയിച്ചു.

തൃശൂർ ഗവ. മെഡിക്കൽ കോളേജിൽ കോവിഡ് രോഗികൾക്കായി പുതിയ പരിശോധന സംവിധാനം നിലവിൽ വന്നു. പ്രോകാൽസിടോണിൻ, ഇന്റർ ലൂകിൻ -6 എന്നീ രണ്ട് ലാബ് പരിശോധനയിലൂടെ കോവിഡ് രോഗികൾക്ക് മുൻകൂട്ടി നിലവിലെ ആരോഗ്യ സ്ഥിതി എന്തെന്ന് അറിയാവുന്നതാണ് പുതിയ സംവിധാനം. കൊറോണാ വൈറസ് രോഗം തീവ്രതയിലായി, രോഗി അപകടത്തിൽ എത്തുന്നതിനു മുമ്പേതന്നെ, രോഗതീവ്രതയെ കുറിച്ച് സൂചന നൽകുന്ന, അത്യാധുനിക പരിശോധനയാണിത്

കോവിഡ് 19 രോഗവ്യാപന സാധ്യതകുറഞ്ഞ സാഹചര്യത്തിൽ തൃശൂർ കോർപ്പറേഷനിലെ 35-ാം ഡിവിഷനെ കണ്ടെയ്ൻമെന്റ് സോണിൽ നിന്ന് ഒഴിവാക്കി. നേരത്തെയുളള ഉത്തരവനുസരിച്ച് പ്രഖ്യാപിച്ച തൃശൂർ കോർപ്പറേഷനിലെ 49, 51 വാർഡുകൾ, ശ്രീനാരായണപുരം ഗ്രാമപഞ്ചായത്തിലെ 11, 12 വാർഡുകൾ കുന്നംകുളം നഗരസഭയിലെ 07, 10, 11, 15, 17, 19, 25, 26 ഡിവിഷനുകൾ എന്നിവ കണ്ടെയ്ൻമെന്റ് സോണുകളായി തുടരും.