മഞ്ചേരി മെഡിക്കല്‍ കോളേജില്‍ ചികില്‍സയിലിരിക്കെ ജൂലൈ നാലിന് മരിച്ച വണ്ടൂര്‍ കൂരാട് സ്വദേശിക്ക്  കോവിഡ് 19 സ്ഥിരീകരിച്ചതായി ജില്ലാ മെഡിക്കല്‍ ഓഫീസര്‍ ഡോ. കെ. സക്കീന അറിയിച്ചു.

  കോവിഡ് 19 സ്ഥിരീകരിച്ച് മലപ്പുറം ജില്ലയില്‍ ഐസൊലേഷന്‍ കേന്ദ്രങ്ങളില്‍ ചികിത്സയിലായിരുന്ന 28 പേര്‍ കൂടി ഇന്നലെ (ജൂലൈ അഞ്ച്) രോഗമുക്തരായി. രോഗബാധിതരായി 281 പേര്‍ ചികിത്സയില്‍ കഴിയുന്നു. ജില്ലയില്‍ ഇതുവരെ 667 പേര്‍ക്കാണ് വൈറസ് ബാധ സ്ഥിരീകരിച്ചത്. രോഗ വ്യാപനം തടയുന്നതിന്റെ ഭാഗമായി ഇന്നലെ (ജൂലൈ അഞ്ച്) 1,729 പേര്‍ക്ക് കൂടി പ്രത്യേക നിരീക്ഷണം ഏര്‍പ്പെടുത്തിയതായി ജില്ലാ മെഡിക്കല്‍ ഓഫീസര്‍ ഡോ. കെ. സക്കീന അറിയിച്ചു.

ജില്ലയില്‍ 34 പേര്‍ക്ക് കൂടി ഇന്നലെ (ജൂലൈ അഞ്ച്) കോവിഡ് 19 സ്ഥിരീകരിച്ചു. രണ്ട് പേര്‍ക്കാണ് ഇന്നലെ സമ്പര്‍ക്കത്തിലൂടെ രോഗബാധ സ്ഥിരീകരിച്ചത്. ഒരാള്‍ ഇതര സംസ്ഥാനങ്ങളില്‍ നിന്നും 23 പേര്‍ വിവിധ വിദേശ രാജ്യങ്ങളില്‍ നിന്നും എത്തിയവരാണെന്ന് ജില്ലാ കലക്ടര്‍ കെ. ഗോപാലകൃഷ്ണന്‍ അറിയിച്ചു. ഇവരില്‍ ഒരാള്‍ എറണാകുളം ജില്ലയിലും നാല് പേര്‍ കണ്ണൂര്‍ ജില്ലയിലും ശേഷിക്കുന്നവര്‍ മഞ്ചേരി ഗവ. മെഡിക്കല്‍ കോളജ് ആശുപത്രിയിലുമാണ് ചികിത്സയിലുള്ളത്.

കോവിഡ് 19 പ്രതിരോധ പ്രചരണാര്‍ത്ഥം ബ്രേക്ക് ദ ചെയിന്‍ ഡയറിയുമായി കൊയിലാണ്ടി വൊക്കേഷണല്‍ ഹയര്‍ സെക്കന്‍ഡറി സ്‌കൂളിലെ എന്‍എസ്എസ് വളണ്ടിയര്‍മാര്‍. വിദ്യാര്‍ത്ഥികള്‍ തയ്യാറാക്കിയ ഡയറി പ്രകാശനവും വിതരണവും കെ.ദാസന്‍ എംഎല്‍എ നിര്‍വഹിച്ചു. പി.ടി.എ പ്രസിഡന്റ്  അഡ്വ. പി.പ്രശാന്ത് അദ്ധ്യക്ഷത വഹിച്ചു.

സംസ്ഥാന സര്‍ക്കാര്‍ പ്രഖ്യാപിച്ച ഡയറി സംവിധാനം കൊയിലാണ്ടി നിയോജക മണ്ഡലത്തില്‍ ആദ്യമായാണ് നടപ്പിലാക്കുന്നത്. കോടതി, ആരോഗ്യ വകുപ്പ്, അഗ്‌നിശമന രക്ഷാസേന, പോലീസ് ജീവനക്കാര്‍, പത്രപ്രവര്‍ത്തകര്‍, വ്യാപാരികള്‍, ആശാ പ്രവര്‍ത്തകര്‍ തുടങ്ങിയവര്‍ക്ക് ഡയറി വിതരണം ചെയ്തു.

07/07/2020 രാത്രി 11.30 വരെയുള്ള സമയത്ത് പൊഴിയൂർ മുതൽ കാസർഗോഡ് വരെയുള്ള കേരള  തീരത്ത് 4  മുതൽ 4.2 മീറ്റർ വരെ ഉയരത്തിൽ തിരമാലക്ക് സാധ്യതയുണ്ടെന്ന് ദേശീയ സമുദ്ര സ്ഥിതി പഠന കേന്ദ്രം (INCOIS) അറിയിച്ചു. തീരദേശവാസികൾ ജാഗ്രത പാലിക്കണം.

മൽസ്യബന്ധന ഉപകരണങ്ങളുടെ സുരക്ഷ ഉറപ്പാക്കണം. മൽസ്യബന്ധന യാനങ്ങൾ (ബോട്ട്, വള്ളം etc) ഹാർബറിൽ സുരക്ഷിതമായി കെട്ടിയിട്ട് സൂക്ഷിക്കുക.

*INCOIS_IMD_KSDMA*
*പുറപ്പെടുവിച്ച സമയം: 06/07/2020,1 pm*

കോഴിക്കോട് ജില്ലയിലെ എക്സൈസ് വകുപ്പില്‍ സിവില്‍ എക്സൈസ് ഓഫീസര്‍ എന്‍സിഎ-എസ്.സി.സി.സി (കാറ്റഗറി നം 308/2016) തസ്തികയ്ക്ക് 2019 ഫെബ്രുവരി 13 ന് നിലവില്‍ വന്ന എന്‍സിഎ റാങ്ക് പട്ടിക, മാതൃ റാങ്ക് പട്ടികയില്‍ (കാറ്റഗറി നം 534/2013 പ്രകാരം 2015 ആഗസ്റ്റ് മൂന്നിന് നിലവില്‍ വന്നത്) നിന്നും ഉദ്ഭവിച്ച എസ്‌സിസിസി വിഭാഗത്തിന്റെ എന്‍സിഎ ഊഴങ്ങളെല്ലാം നികത്തപ്പെട്ടതിനാല്‍ റദ്ദായതായി ജില്ലാ ഓഫീസര്‍ അറിയിച്ചു.