പൊന്നാനി താലൂക്ക് ആശുപത്രിയിലെ ഡോക്ടര്‍മാര്‍ക്കും ആരോഗ്യ പ്രവര്‍ത്തകര്‍ക്കും കോവിഡ് കെയര്‍ ആരോഗ്യ പരിശീലന പരിപാടി സംഘടിപ്പിച്ചു. പി.പി.ഇ കിറ്റ് ധരിക്കുന്നതിന്റെയും  നാസോ ഫാരിനജ്യല്‍ സ്വാബ്, ത്രോട്ട് സ്വാബ് എന്നിവ എടുക്കുന്നതിന്റെയും പ്രായോഗിക പരിശീലനമാണ് നല്‍കിയത്. ഡോക്ടര്‍മാര്‍, സ്റ്റാഫ് നഴ്‌സ്,  ആരോഗ്യപ്രവര്‍ത്തകര്‍ തുടങ്ങിയവര്‍ പരിശീലനത്തില്‍ പങ്കെടുത്തു. ആശുപത്രി സൂപ്രണ്ട് ഡോ. ഷാജു, ഇന്‍.ടി സര്‍ജന്‍ ഡോ.യഹ്‌യ, ഡോ. സന്ദീപ്, ഡോ. ഷമീല്‍, ഡോ. ഇര്‍ഷാദ് എന്നിവര്‍ പങ്കെടുത്തു.
 

വളവന്നൂര്‍-കല്പകഞ്ചേരി കുടിവെള്ള പദ്ധതി ഓഗസ്റ്റില്‍ കമ്മീഷന്‍ ചെയ്യുമെന്ന് സി. മമ്മൂട്ടി എം.എല്‍.എ അറിയിച്ചു.  തിരൂര്‍ നിയോജക മണ്ഡലത്തിലെ വിവിധ വികസന പ്രവര്‍ത്തനങ്ങള്‍ അവലോകനം ചെയ്യുന്നതിന് ജില്ലാ കലക്ടറുടെ അധ്യക്ഷതയില്‍ കലക്ടറേറ്റില്‍ ചേര്‍ന്ന യോഗത്തിലാണ് തീരുമാനം. വളവന്നൂര്‍, കല്പകഞ്ചേരി പഞ്ചായത്തുകളിലെ ജനങ്ങള്‍ക്ക് കുടിവെള്ളം ലഭ്യമാക്കുന്നിനുള്ള പദ്ധതിയാണ് ഇത്. പുതിയ ട്രീറ്റ്മെന്റ് പ്ലാന്റും വിതരണ ശൃഖലയും ഉള്‍പ്പെടുന്ന പദ്ധതി കമ്മീഷന്‍ ചെയ്യുന്നതോടെ രണ്ട് പഞ്ചായത്തുകളിലെ കുടിവെള്ള പ്രശ്നത്തിന് പരിഹാരമാകും.

ആര്‍ദ്രം മിഷന്റെ ഭാഗമായി നവീകരിച്ച പുലാമന്തോള്‍ ചെമ്മലശ്ശേരി കുടുംബാരോഗ്യകേന്ദ്രത്തിന്റെ ഉദ്ഘാടനം വീഡിയോ കോണ്‍ഫറന്‍സിങിലൂടെ ആരോഗ്യവകുപ്പ് മന്ത്രി കെ.കെ ശൈലജ ടീച്ചര്‍ നിര്‍വഹിച്ചു. ആര്‍ദ്രം മിഷനിലൂടെ ഗുണപരമായ മാറ്റങ്ങള്‍ സംസ്ഥാനത്ത് ഉണ്ടായെന്നും ഇത് കോവിഡ് പ്രതിരോധത്തിന് സഹായകമായെന്നും മന്ത്രി പറഞ്ഞു.

കൊണ്ടോട്ടി താലൂക്കിലെ സപ്ലൈകോ സൂപ്പര്‍ മാര്‍ക്കറ്റ് ഭക്ഷ്യ പൊതുവിതരണ വകുപ്പ് മന്ത്രി പി.തിലോത്തമന്‍ വീഡിയോ കോണ്‍ഫറന്‍സിങ് വഴി ഇന്ന് (ജൂലൈ മൂന്ന്) രാവിലെ 11ന് ഉദ്ഘാടനം ചെയ്യും. കൊണ്ടോട്ടി മേലങ്ങാടിയില്‍ നടക്കുന്ന പരിപാടിയില്‍ ടി.വി ഇബ്രാഹീം എം.എല്‍.എ ആദ്യ വിതരണോദ്ഘാടനം നിര്‍വഹിക്കും.

മലപ്പുറം ജില്ലയിലെ അക്ഷയ സംരംഭകരുടെ കൂട്ടായ്മ മുഖ്യമന്ത്രിയുടെ ദുരിതാശ്വാസ നിധിയിലേക്ക് 52,835 രൂപ ജില്ലാ കലക്ടര്‍ കെ.ഗോപാലകൃഷ്ണന്  കൈമാറി.