എം.ആര്‍ വാക്‌സിനേഷന്‍ കാംപയിന്റെ ഭാഗമായി ജില്ലാ കളക്ടര്‍ അമിത് മീണ ഐ.എ.എസ് മേല്‍മുറി മഅ്ദിന്‍ പബ്ലിക് സ്‌കൂള്‍ സന്ദര്‍ശനം നടത്തി വാക്‌സിനേഷന്‍ സൈറ്റ് നിരീക്ഷിച്ചു. വാക്‌സിന്‍ എടുത്ത കുട്ടികള്‍ വളരെ ആവേശത്തോടു കൂടിയാണ് കളക്ടറെ സ്വീകരിച്ചത്.വാക്‌സിന്‍ എടുക്കാത്ത കുട്ടികളോട് വാക്‌സിന്‍ എടുക്കേണ്ടതിന്റെ ആവശ്യകതയെ കുറിച്ച് കളക്ടര്‍ വിശദീകരിച്ചു. മീസില്‍സ് റുബെല്ല രോഗങ്ങളെ ജില്ലയില്‍ നിന്ന് തുടച്ചു നീക്കാന്‍ ഓരോ ക്ലാസിലെയും എല്ലാ കുട്ടികളും വാക്‌സിന്‍ എടുത്ത് വിജയിപ്പിക്കേണ്‍ണ്ട ആവശ്യകത സ്‌കൂള്‍ അധികൃതരെ മനസിലാക്കി കൊടുത്ത ശേഷമാണ് കളക്ടര്‍ പോയത്.

മലപ്പുറം, വയനാട് ലോക്‌സഭ മണ്ഡല പരിധിയില്‍ ഇ.അഹമ്മദ,് പി.കെ.കുഞ്ഞാലിക്കുട്ടി, എം.ഐ.ഷാനവാസ്, പി.വി.അബ്ദുല്‍ വഹാബ് എന്നീ എം.പി.മാരും മറ്റ് രാജ്യസഭാ  എം.പി.മാരും നിര്‍ദ്ദേശിച്ച പ്രവൃത്തികളുടെ അവലോകനം ഇന്ന്(നവംബര്‍ 3) 2.30 നും പൊന്നാനി ലോക്‌സഭ മണ്ഡല പരിധിയില്‍ ഇ.ടി.മുഹമ്മദ് ബഷീര്‍ എം.പി.യും മറ്റ് രാജ്യസഭാ  എം.പി.മാരും നിര്‍ദ്ദേശിച്ച പ്രവൃത്തികളുടെ അവലോകനം നാളെ (നവംബര്‍ 4)യും നടക്കും

മക്കരപ്പറമ്പ് ഇലക്ട്രിക്കല്‍ സെക്ഷന്‍ പരിധിയിലുള്ള ഹില്‍വുഡ്, കല്‍പക, പോത്തുകുണ്ട്, വടക്കാങ്ങര, കാളാവ്, തടത്തില്‍കുണ്ട് ഭാഗങ്ങളില്‍ ഇന്ന് (നവംബര്‍ മൂന്ന്)  രാവിലെ 08.30 മുതല്‍ വൈകുന്നേരം 5.30  വരെ വൈദ്യുതി വിതരണം തടസ്സപ്പെടുന്നതാണ്

സംസ്ഥാന സിവില്‍ സര്‍വീസ് കായിക മേളയില്‍  ക്രിക്കറ്റ് ടീമില്‍ റണ്ണര്‍ അപ്പായ മലപ്പുറം ജില്ലാ ടീമിന് ലഭിച്ച ട്രോഫി ടീം ക്യാപ്റ്റന്‍ ഹബീബ് റഹ്മാന്‍ ജില്ലാ കളക്ടര്‍ക്ക് കൈമാറി.

ത്രിതല പഞ്ചായത്തുകളിലെ വൈദ്യുതീകരണത്തിനുള്ള എസ്റ്റിമേറ്റ് തയ്യാറാക്കുന്നതിനും മേല്‍നോട്ടം വഹിക്കുന്നതിനും ജില്ലാതല സമിതിയില്‍ പ്രവര്‍ത്തിക്കാന്‍ അര്‍ഹതയുള്ളവരില്‍ നിന്ന് അപേക്ഷ ക്ഷണിച്ചു. കെഎസ്ഇബിയിലെയോ  പിഡബ്‌ളിയുഡിയിലേയോ ഇലക്ട്രിക്കല്‍ വിംഗില്‍ നിന്ന് അസിസ്റ്റന്റ് എഞ്ചിനീയര്‍ തസ്തികയില്‍ കുറയാത്ത റാങ്കില്‍ നിന്ന് വിരമിച്ചവരായിരിക്കണം അപേക്ഷകര്‍. അപേക്ഷകള്‍ നവംബര്‍ 9 ന് മുമ്പ് മലപ്പുറം ജില്ലാ പഞ്ചായത്ത് ഓഫീസില്‍ ലഭിക്കണം. കൂടുതല്‍ വിവരങ്ങള്‍ക്ക് ജില്ലാ പഞ്ചായത്ത് ഓഫീസില്‍ നിന്ന് ലഭ്യമാകും. ഫോണ്‍  9447676366

താനൂര്‍ ദേവധാര്‍ ഗവ. ഹയര്‍ സെക്കന്‍ഡറി സ്‌കൂള്‍ കേന്ദ്രമായി പ്രവര്‍ത്തിക്കുന്ന സ്‌കോള്‍ കേരള ഓപ്പണ്‍ സ്‌കൂളില്‍ രജിസ്റ്റര്‍ ചെയ്തിട്ടുള്ള ഹയര്‍ സെക്കന്‍ഡറി വിദ്യാര്‍ഥികള്‍ക്കുള്ള കോണ്‍ടാക്ട് ക്ലാസുകള്‍ നാളെ (ശനിയാഴ്ച) രാവിലെ 9.30 മുതല്‍ നടക്കും.  അസ്സല്‍ മെമ്മോ കാര്‍ഡും അഡ്മിഷന്‍ ടിക്കറ്റുമായി ഒന്നും രണ്ടും വര്‍ഷ വിദ്യാര്‍ഥികള്‍ ക്ലാസിന് എത്തണമെന്ന്  പ്രിന്‍സിപ്പല്‍ അറിയിച്ചു.
•    പൂക്കോട്ടൂര്‍ ഹയര്‍സെക്കന്ററി സ്‌കൂളില്‍ രജിസ്റ്റര്‍ ചെയ്ത ഓപ്പണ്‍ വിദ്യാര്‍ത്ഥികള്‍ക്കുള്ള കോണ്‍ടാക്ട് ക്ലാസ് നവംബര്‍ നാലിന് രാവിലെ 9.30 ന് സ്‌കൂളില്‍ നടക്കും.

തുടര്‍വിദ്യാഭ്യാസ ജില്ലാ കലോത്സവത്തിന്റെ സംഘാടക സമിതി യോഗം നാളെ (നവംബര്‍ 4)) മൂന്നുമണിക്ക് ജില്ലാപഞ്ചായത്ത് പ്രസിഡണ്ടിന്റെ ചേംബറില്‍ നടക്കും.
സാക്ഷരതാ തുല്യതാ പഠിതാക്കള്‍ക്കും പ്രേരക്മാര്‍ക്കുമായാണ് സംസ്ഥാന സാക്ഷരതാ മിഷന്‍ തുടര്‍ വിദ്യാഭ്യാസ കലോത്സവം സംഘടിപ്പിക്കുന്നത്. മലപ്പുറം ജില്ലാ തുടര്‍വിദ്യാഭ്യാസ കലോത്സവം നവംബറിലാണ് നടത്തുന്നത്. സംസ്ഥാന തല മത്സരം  ഡിസംബറില്‍  കോഴിക്കോട്ട് നടക്കും.

സര്‍ക്കാര്‍ സ്ഥാപനമായ സി-ഡിറ്റ്, സൈബര്‍ശ്രീ സെന്ററില്‍ പട്ടികജാതി വിഭാഗത്തില്‍പ്പെട്ടവര്‍ക്ക് ആനിമേഷന്‍ ഫിലിം നിര്‍മ്മാണത്തിലും വിഷ്വല്‍ ഇഫക്ട്‌സിലും പരിശീലനം നല്‍കുന്നു. 20-നും 26-നും മദ്ധ്യേ പ്രായമുള്ളവര്‍ക്ക് പങ്കെടുക്കാം. പരിശീലന കാലാവധി ആറു മാസമാണ്. ബി.എഫ്.എ/ ഏതെങ്കിലും വിഷയത്തില്‍ ബിരുദം/മൂന്നു വര്‍ഷത്തെ ഡിപ്ലോമ പാസ്സായവര്‍ക്കും എഞ്ചിനീയറിംഗ് കോഴ്‌സ് പൂര്‍ത്തീകരിച്ചവര്‍ക്കും അപേക്ഷിക്കാം. തിരുവനന്തപുരത്ത് നടത്തുന്ന പരിശീലനത്തില്‍ പങ്കെടുക്കുന്നവര്‍ക്ക് പ്രതിമാസം 4000 രൂപ സ്റ്റൈപന്റ് ലഭിക്കും.

ജില്ലാ പഞ്ചായത്ത് ഓഫീസ് കോമ്പൗണ്ടിലും സിവില്‍ സ്റ്റേഷനിലെ ഓഫീസുകളിലും ജൈവപച്ചക്കറി കൃഷിചെയ്യുന്നതിന് ഗ്രോബാഗുകള്‍ നല്‍കിയ ഓഫീസുകള്‍ക്ക് ജലസേചനത്തിനുള്ള ഉപകരണങ്ങളുടെ വിതരണം നവംബര്‍ നാലിന്  രാവിലെ 10 ന് ജില്ലാ പഞ്ചായത്ത് ഓഫീസില്‍ നടക്കും. ജില്ലാ പഞ്ചായത്ത് പ്രസിഡന്റ് എ. പി.  ഉണ്ണികൃഷ്ണന്‍ ഉദ്ഘാടനം നിര്‍വഹിക്കും. പച്ചക്കറി കൃഷി ചെയ്യുന്നതിനാവശ്യമായ സ്‌പ്രെയര്‍, ഗാര്‍ഡന്‍ ഫോര്‍ക്ക്, നനയ്ക്കുന്നതിനുളള റോസ് കാന്‍, ഡ്രിപ്പ്കിറ്റ് എന്നീ ഉപകരണങ്ങളാണ് വിതരണം ചെയ്യുക.  

മിനി പമ്പയില്‍ ശബരിമല സീസണില്‍ തീര്‍ത്ഥാടകര്‍ക്ക് സൗകര്യങ്ങള്‍ ചെയ്യുന്നതുമായി ബന്ധപ്പെട്ട് ഇന്ന് (നവംബര്‍ മൂന്ന്) രാവിലെ 10 ന് തദ്ദേശ സ്വയം ഭരണ വകുപ്പ് മന്ത്രി കെ.ടി. ജലീലിന്റെ അധ്യക്ഷതിയില്‍ കുറ്റിപ്പുറം ആരാമം ഓഡിറ്റേറിയത്തില്‍ യോഗം ചേരും. ജില്ലാ കലക്ടര്‍ അമിത് മീണ, ജില്ലാതല ഉദ്യോഗസ്ഥര്‍, ജനപ്രതിനിധികള്‍ എന്നിവര്‍ യോഗത്തില്‍ പങ്കെടുക്കും.