വേങ്ങര ബ്ലോക്ക് പഞ്ചായത്തില്‍ സര്‍ക്കാര്‍ അംഗീകൃത സെക്യുരിറ്റി ജോലികള്‍ ലഭിക്കുന്നതിന് യുവതീയുവാക്കള്‍ക്ക് പ്രീ- റിക്രൂട്ട്‌മെന്റ് പരിശീലനം നല്‍കുന്നു. പട്ടികജാതി വിഭാഗത്തില്‍പ്പെട്ട ദാരിദ്യരേഖക്ക് താഴെയുള്ള യുവതീയുവാക്കള്‍ക്ക് അപേക്ഷിക്കാം . അപേക്ഷകര്‍ 8-ാംക്ലാസ് പാസായതും 17നും 45 നുമിടയില്‍ പ്രായമുള്ളവരും 2 മാസക്കാലം കാമ്പസില്‍ താമസിച്ചു പരിശീലനം നടത്താന്‍ തയ്യാറുള്ളവരുമായിരിക്കണം . ജാതി സര്‍ട്ടിഫിക്കറ്റ് , വരുമാന സര്‍ട്ടിഫിക്കറ്റ് , വിദ്യാഭ്യാസ യോഗ്യത തെളിയിക്കുന്ന സര്‍ട്ടിഫിക്കറ്റ് എന്നിവ സഹിതം 27 നു മുമ്പായി അപേക്ഷ നല്‍കണം .

കേരള കള്ള് വ്യവസായ തൊഴിലാളി ക്ഷേമ നിധി അംഗങ്ങളായ തൊഴിലാളികളുടെ മക്കള്‍ക്ക് ലാപ്‌ടോപ്പ് നല്‍കുന്നതിന് കേന്ദ്ര - സംസ്ഥാന സര്‍ക്കാരുകള്‍ നടത്തിയ എന്‍ട്രന്‍സ് പരീക്ഷയിലൂടെ 2017-18 വര്‍ഷം പ്രവേശനം ലഭിച്ച ഒന്നാം വര്‍ഷ പ്രൊഫഷണല്‍ വിദ്യാര്‍ത്ഥികളില്‍ നിന്ന് അപേക്ഷ ക്ഷണിച്ചു . അപേക്ഷ സ്വീകരിക്കുന്ന അവസാന തിയ്യതി ഡിസംബര്‍ 10. കൂടുതല്‍ വിവരങ്ങള്‍ക്ക് മലപ്പുറം ജില്ലാ ഓഫീസുമായി ബന്ധപ്പെടുക . ഫോണ്‍ - 0483-2734827

ജില്ലാ പട്ടിക ജാതി വികസന വകുപ്പിനു കീഴിലുള്ള 5 ഗവ. പ്രീ- മെട്രിക് ഹോസ്റ്റലുകളിലേക്ക് വിദ്യാര്‍ത്ഥികളുടെ രാത്രി കാല പഠന മേല്‍നോട്ടങ്ങള്‍ക്കായി കരാര്‍ അടിസ്ഥാനത്തില്‍ ട്യൂട്ടര്‍മാരെ നിയമിക്കുന്നു. ബിരുദവും ബിഎഡും ഉള്ളവര്‍ക്ക് അപേക്ഷിക്കാം . നിയമിക്കപ്പെടുന്ന ട്യൂട്ടര്‍മാരുടെ ജോലി സമയം വൈകീട്ട് 4 മുതല്‍ പിറ്റേന്ന് രാവിലെ 8 വരെയായിരിക്കും . പരപ്പനങ്ങാടി , പെരിന്തല്‍മണ്ണ എന്നിവിടങ്ങളിലേക്ക് പുരുഷന്‍മാരും മഞ്ചേരി , വണ്ടൂര്‍ , പെരുമ്പടപ്പ് എന്നിവിടങ്ങളിലേക്ക് സ്ത്രീകളുമാണ് അപേക്ഷിക്കേണ്ടത് .

വേങ്ങര ഗവ. ബോയ്‌സ് ഹയര്‍ സെക്കണ്ടറി സ്‌കൂള്‍ പരീക്ഷാ കേന്ദ്രമായി തിരഞ്ഞെടുത്ത പ്ലസ് വണ്‍ ഓപ്പണ്‍ സ്‌കൂള്‍ വിദ്യാര്‍ത്ഥികള്‍ക്കുള്ള കോണ്‍ടാക്റ്റ് ക്ലാസ് നവംബര്‍ 18 ന് രാവിലെ 9.30 മുതല്‍ നടത്തും .

മണ്ണാര്‍മല വിദ്യാപോഷിണി ഗ്രന്ഥാലയത്തിന്റെ ആഭിമുഖ്യത്തില്‍ വയോജനങ്ങള്‍ക്കായി വിനോദയാത്ര സംഘടിപ്പിക്കുന്നു. 65വയസ്സിന് മുകളിലുള്ള എഴുപത്തിയഞ്ചോളം പേര്‍ ഈ യാത്രയില്‍ പങ്കെടുക്കും. മലമ്പുഴ ഉദ്യാനം, പാലക്കാട് കോട്ട എന്നിവ സന്ദര്‍ശിക്കും. മണ്ണാര്‍മലയിലെ ആദിവാസികുടുംബങ്ങള്‍,  ഭിന്നശേഷിക്കാര്‍ എന്നിവര്‍ നാളെ നടക്കുന്ന വിനോദയാത്രയില്‍ പങ്കാളികളാകും. ഗ്രന്ഥാലയത്തിന്റെ 20 ഓളം വളണ്ടിയര്‍മാര്‍ യാത്രക്ക് നേതൃത്വം നല്‍കും.

സമഗ്ര ആരോഗ്യ ഇന്‍ഷുറന്‍സ് പദ്ധതിയില്‍ ചേരുന്നതിന് നവംബര്‍ 20 വരെ അക്ഷയകേന്ദ്രങ്ങള്‍ വഴിയും കുടുംബശ്രീയുടെ കീഴിലുള്ള ഉന്നതി കേന്ദ്രങ്ങള്‍ വഴിയും അപേക്ഷിക്കാം. 2018 മാര്‍ച്ച് വരെ കാലാവധിയുള്ള സ്മാര്‍ട്ട് കാര്‍ഡ് കൈവശമുള്ളവര്‍ വീണ്ടും അപേക്ഷ നല്‍കേണ്ടതില്ല. മഞ്ഞനിറം(എഎവൈ), പിങ്ക്(മുന്‍ഗണന) വിഭാഗത്തില്‍പെട്ട റേഷന്‍കാര്‍ഡുള്ള   കുടുംബങ്ങള്‍ക്ക് റേഷന്‍ കാര്‍ഡിന്റെ അടിസ്ഥാനത്തില്‍ മാത്രം അപേക്ഷനല്‍കാം. പദ്ധതി പ്രകാരം 30000 രൂപയുടെ സൗജന്യ ചികിത്സയും , അറുപതു വയസ് കഴിഞ്ഞ വര്‍ക്ക് 30000 രൂപയുടെ അധിക ചികിത്സയും മാരകരോഗങ്ങള്‍ക്ക് 70000 രൂപയുടെ അധിക ചികിത്സയും എല്ലാ വര്‍ഷവും ലഭിക്കും .

ഡോ.അംബേദ്കര്‍ ഫൗണ്‍േഷന്‍ ഹയര്‍സെക്കന്ററി വിദ്യര്‍ത്ഥികള്‍ക്ക് നല്‍കുന്ന നാഷണല്‍ മെറിറ്റ് സ്‌കോളര്‍ഷിപ്പ് നേടിയ ജില്ലയിലെ വിദ്യാര്‍ത്ഥികള്‍ക്കുള്ള അവാര്‍ഡ് വിതരണം ഇന്ന് (നവംബര്‍ 15) നടക്കും. വൈകിട്ട് 3.30 ന് ചേംബറില്‍ നടക്കുന്ന പരിപാടിയില്‍ ജില്ലാകലക്ടര്‍ അമിത് മീണ സ്‌കോളര്‍ഷിപ്പ് തുകയുടെ ചെക്കുകള്‍ വിതരണം ചെയ്യും വൂര്‍ ഗവ.വി.എം.സി.ഹയര്‍സെക്കന്ററി സ്‌കൂളിലെ അനഘ ടി. യൂനിവേഴ്‌സിറ്റി കാമ്പസ് സ്‌കൂളിലെ അപര്‍ണ സി.വി. എന്നിവര്‍ക്കാണ് സ്‌കോളര്‍ഷിപ്പ് ലഭിക്കുക.

കേരള സംസ്ഥാന യുവജന കമ്മീഷന്‍ മലപ്പുറം ഗസ്റ്റ് ഹൗസ് കോണ്‍ഫറന്‍സ് ഹാളില്‍ ഇന്ന് (നവംബര്‍ 16) അദാലത്ത് നടത്തും. രാവിലെ 11 മുതല്‍ നടക്കുന്ന സിറ്റിംഗില്‍ ചെയര്‍പേഴ്‌സണ്‍ ചിന്താ ജെറോം പങ്കെടുക്കും. 18 നും 40 നും ഇടയില്‍ പ്രായമുള്ളവര്‍ക്ക് സിറ്റിംഗില്‍ പങ്കെടുത്ത് പരാതികളും നിര്‍ദ്ദേശങ്ങളും  സമര്‍പ്പിക്കാം.

സര്‍ക്കാര്‍ സ്‌കൂളുകളില്‍ 9-ാം തരത്തില്‍ പഠിക്കുന്ന പെണ്‍കുട്ടികള്‍ക്ക് ആര്‍.എം.എസ്.എ സ്വയംപ്രതിരോധ പരിശീലനം നല്‍കുന്നു.പരിപാടിയുടെ ഉദ്ഘാടനം ഇന്ന് (നവംബര്‍ 16)  രാവിലെ 10.00 മണിക്ക് മലപ്പുറം ഗവണ്‍മെന്റ് ഗേള്‍സ് ഹയര്‍ സെക്കന്ററി സ്‌കൂളില്‍ നടക്കും. തദ്ദേശ സ്വയംഭരണ വകുപ്പു മന്ത്രി കെ.ടി ജലീല്‍ ഉദ്ഘാടനം ചെയ്യും. മലപ്പുറം എം.എല്‍.എ പി.ഉബൈദുള്ള ചടങ്ങില്‍ പങ്കെടുക്കും. വിവിധ സ്‌കൂളുകളിലെ വിദ്യാര്‍ത്ഥികള്‍ കായിക പ്രകടനങ്ങള്‍ നടത്തും.