പ്രമുഖ പരിസ്ഥിതി പ്രവര്‍ത്തകയും തൃശൂരിലെ നദീ ഗവേഷണ കേന്ദ്രത്തിന്റെ ഡയറക്ടറുമായ ഡോ. എ. ലതയുടെ നിര്യാണത്തില്‍ ജലവിഭവ വകുപ്പുമന്ത്രി മാത്യു ടി തോമസ് അനുശോചനം രേഖപ്പെടുത്തി. പുഴയെ പഠിച്ച ഡോ.  ലതയുടെ ശൈലി കേരളത്തില്‍ ഇപ്പോള്‍ നടന്നു വരുന്ന നദീ പുനഃരുദ്ധാരണ പ്രവര്‍ത്തനങ്ങള്‍ക്ക് ഏറെ പ്രചോദനമായിട്ടുണ്ട്. ചാലക്കുടി റിവര്‍ ഡൈവര്‍ഷന്‍ പദ്ധതിയിലെ ജലവിനിയോഗത്തിലെ മാറ്റങ്ങളും കാര്‍ഷിക രീതികളും സംബന്ധിച്ച് ഡോ. ലതയുടെ നേതൃത്വത്തില്‍ നടന്ന പഠനവും ഏറെ ശ്രദ്ധേയവും ജനോപകാരപ്രദവുമായിരുന്നുവെന്നും മന്ത്രി അനുശോചന സന്ദേശത്തില്‍ പറഞ്ഞു.

പി.എന്‍.എക്‌സ്.4892/17

ശബരിമല സന്നിധാനം ശുചീകരിക്കുന്നതിനുള്ള പുണ്യം പൂങ്കാവനം പ്രവര്‍ത്തനത്തില്‍ റാപ്പിഡ് ആക്ഷന്‍ ഫോഴ്‌സ്(ആര്‍എഎഫ്) സേനാംഗങ്ങള്‍ പങ്കാളികളായി. സന്നിധാനത്ത് സേവനം അനുഷ്ഠിക്കുന്ന 105-ാം ബറ്റാലിയന്‍ അംഗങ്ങളാണ് ഡെപ്യുട്ടി കമാന്‍ഡന്റ് ജി. ദിനേശ്, അസിസ്റ്റന്റ് കമാന്‍ഡന്റ് ഇളങ്കോവന്‍ എന്നിവരുടെ നേതൃത്വത്തില്‍ ശുചീകരണ പ്രവര്‍ത്തനം നടത്തിയത്. അറുപത് ആര്‍എഎഫ് അംഗങ്ങള്‍ ശുചീകരണത്തില്‍ പങ്കെടുത്തു. പതിനെട്ടാം പടിക്കു താഴെയുള്ള സ്ഥലം, അരവണ കൗണ്ടര്‍, സന്നിധാനം, വലിയ നടപ്പന്തല്‍ എന്നിവിടങ്ങളിലെ മാലിന്യങ്ങള്‍ നീക്കി. 

ശബരിമല സന്നിധാനത്തെ പൊടി വെള്ളമൊഴിച്ച് നീക്കുന്ന ഫയര്‍ഫോഴ്‌സിന്റെ പ്രവര്‍ത്തനം ശ്രദ്ധേയമാകുന്നു. സന്നിധാനത്ത് ചേര്‍ന്ന വകുപ്പുകളുടെ അവലോകന യോഗത്തില്‍ പൊടി നീക്കം ചെയ്യുന്നതിന് നടപടി സ്വീകരിക്കണമെന്ന് ദേവസ്വം മന്ത്രി കടകംപള്ളി സുരേന്ദ്രന്‍ ഫയര്‍ഫോഴ്‌സിന് നിര്‍ദേശം നല്‍കിയിരുന്നു.

വിവിധ പോയിന്റുകളിലെ ഹൈഡ്രന്റുകളില്‍ നിന്നുള്ള ജലമാണ് ഹോസ് മുഖേന പൊടി നീക്കി കഴുകി വൃത്തിയാക്കുന്നതിന് ഫയര്‍ഫോഴ്‌സ് ഉപയോഗിക്കുന്നത്. സന്നിധാനത്തെ വലിയ നടപ്പന്തല്‍, ആഴിയുടെ പരിസരം, മാളികപ്പുറം, പാണ്ടിത്താവളം, വലിയ നടപ്പന്തലിനു സമീപം കെഎസ്ഇബി പരിസരം എന്നിവിടങ്ങളിലെ പൊടി ഇന്നലെ കഴുകി നീക്കം ചെയ്തു. 

കണ്ണമ്പ്ര ഗ്രാമപഞ്ചായത്തില്‍ 500 ഏക്കര്‍ സ്ഥലത്ത്  വ്യാവസായിക പാര്‍ക്കും അഞ്ചര ഏക്കര്‍ സ്ഥലത്ത്  ക്രാഫ്റ്റ് വില്ലേജും നിര്‍മിക്കുമെന്ന് പിന്നാക്കക്ഷേമ-നിയമ-സാംസ്കാരിക വകുപ്പ് മന്ത്രി എ. കെ. ബാലന്‍ പറഞ്ഞു. തരൂര്‍ നിയോജകമണ്ഡലത്തില്‍ അടുത്ത സാമ്പത്തികവര്‍ഷം ബജറ്റിലുള്‍പ്പെടുത്തി നടപ്പിലാക്കേണ്ട പദ്ധതികളെക്കുറിച്ച് ചര്‍ച്ച ചെയ്യുന്നതിന് പെരിങ്ങോട്ടുകുറിശ്ശി ഗ്രാമപഞ്ചായത്ത് ഹാളില്‍ ചേര്‍ന്ന ജനപ്രതിനിധി-ഉദ്യോഗസ്ഥസംഗമം ഉദ്ഘാടനം ചെയ്തു സംസാരിക്കുകയായിരുന്നു മന്ത്രി. രണ്ടായിരം കോടി ചെലവ് പ്രതീക്ഷിക്കുന്ന വ്യാവസായിക പാര്‍ക്കിനായുള്ള ഭൂമി ഏറ്റെടുക്കുന്നതിന് സര്‍വെ നടപടികള്‍ പുരോഗമിക്കുകയാണ്.

ഭാരതത്തിന്‍റെ പ്രഥമ പ്രധാനമന്ത്രി പണ്ഡിറ്റ് ജവഹര്‍ലാല്‍ നെഹ്റു ഉറച്ച മതനിരപേക്ഷവാദിയും ജീവിതത്തില്‍ ഉടനീളം അടിയുറച്ച ശാസ്ത്രചിന്തയും യുക്തി ബോധവും പുലര്‍ത്തിയിരുന്ന വ്യക്തിയുമായിരുന്നുവെന്ന് എം.ബി രാജേഷ് എം.പി പറഞ്ഞു.  നെഹ്റു യുവകേന്ദ്ര സ്ഥാപക ദിനാഘോഷം ജില്ലാ കലക്ടറേറ്റ് സമ്മേളന ഹാളില്‍ നിര്‍വഹിച്ച് സംസാരിക്കുകയായിരുന്നു അദ്ദേഹം. രാഷ്ട്രീയപരമായും പ്രത്യയശാസ്ത്രപരമായും താന്‍ എതിര്‍ക്കുന്ന ഒരു വ്യക്തിയാണ് ജവഹര്‍ലാല്‍ നെഹ്റുവെങ്കിലും  ഓര്‍മ്മിക്കപ്പെടേണ്ടതായി അദ്ദേഹത്തിന്‍റെ പ്രവര്‍ത്തനങ്ങള്‍ ഒട്ടേറെയുണ്ടെന്ന് എം.പി പറഞ്ഞു.

ജില്ലാ ശിശുക്ഷേമ സമിതിയുടെ ആഭിമുഖ്യത്തില്‍ ശിശുദിനത്തോടനുബന്ധിച്ച്  നടന്ന ശിശുദിനറാലി മോയന്‍ എല്‍.പി.സ്കൂള്‍ മൈതാനത്ത് നിന്ന് പുറപ്പെട്ടു. കുട്ടികളുടെ പ്രധാനമന്ത്രിയായി തിരഞ്ഞെടുക്കപ്പെട്ട സാന്‍ജോ ബിനോയിയും പ്രസിഡന്‍റായി തിരഞ്ഞെടുക്കപ്പെട്ട ആര്‍.അഹല്യയും റാലി നയിച്ചു.

ജില്ലാ പഞ്ചായത്തും ജില്ലാ യുവജനക്ഷേമ ബോര്‍ഡും ചേര്‍ന്ന് കുഴല്‍മന്ദത്ത് 11 മുതല്‍ നടത്തിയ ജില്ലാ കേരളോത്സവത്തില്‍ 210 പോയന്‍റോടെ പാലക്കാട് ബ്ലോക്ക് പഞ്ചായത്ത് വിജയികളായി. 209 പോയന്‍റ് നേടിയ മണ്ണാര്‍ക്കാട് ബ്ലോക്ക് പഞ്ചായത്താണ് രണ്ടാമത്. മണ്ണാര്‍ക്കാട് ബ്ലോക്ക് പഞ്ചായത്തിലെ സി.ആര്‍. രാജീവ് കലാപ്രതിഭയും രഞ്ജിതാ സി. ഗോപന്‍ കലാതിലകവുമായി. പാലക്കാട് ബ്ലോക്ക് പഞ്ചായത്തിലെ രാഹുല്‍ മികച്ച പുരുഷ കായികതാരവും കെ.ദിവ്യ വനിതാ കായികതാരവുമായി തെരഞ്ഞെടുക്കപ്പെട്ടു. 

വയനാട് റവന്യൂ ജില്ലാ കലോത്സവത്തിന്റെ നടത്തിപ്പിനായി രൂപീകരിച്ച സംഘാടക സമിതി യോഗം നവംബര്‍ 18ന് രാവിലെ 11ന് പനമരം ജി.എച്ച്.എസ്.എസില്‍ ചേരും. എല്ലാ സബ്കമ്മറ്റി കണ്‍വീനര്‍മാരും ചെയര്‍മാന്‍മാരും അംഗങ്ങളും പങ്കെടുക്കണം.

                ജില്ലാ പോലീസ് കംപ്ലയിന്റ് അതോറിറ്റി സിറ്റിംഗ് നവംബര്‍ 23ന് രാവിലെ 11ന് കളക്‌ട്രേറ്റ് മിനി കോണ്‍ഫറന്‍സ് ഹാളില്‍ നടത്തും.