സംസ്ഥാനത്തെ സ്വീപ്പിംഗ് ആന്‍ഡ് ക്ലീനിംഗ് മേഖലയിലെ തൊഴിലാളികളുടെ മിനിമം വേതനം പുതുക്കി നിശ്ചയിക്കുന്നതിനുള്ള ഉപസമിതിയുടെ തെളിവെടുപ്പ് യോഗം ഇന്ന്(21) രാവിലെ 10.30-ന് കോഴിക്കോട് ഗാന്ധി റോഡിലെ ജില്ലാ വ്യവസായ കേന്ദ്രത്തിന് സമീപമുള്ള കെഎസ്‌ഐഎയുടെ ഗോള്‍ഡന്‍ ജൂബിലി ഹാളില്‍ നടത്തും. കാസര്‍കോട്, കണ്ണൂര്‍, കോഴിക്കോട്, മലപ്പുറം, വയനാട്, ജില്ലകളില്‍ നിന്നുള്ള ബന്ധപ്പെട്ട തൊഴിലാളി/തൊഴിലുടമാ പ്രതിനിധികള്‍ ഉള്‍പ്പെടെയുള്ളവര്‍ പങ്കെടുക്കണമെന്ന് സമിതി സെക്രട്ടറി അറിയിച്ചു.

കേരള കൈത്തറി ഉല്പങ്ങളുടെ പ്രചരണാര്‍ത്ഥം കൈത്തറി & ടെക്സ്റ്റയില്‍സ് ഡയറക്ടറേറ്റും, ജില്ലാ വ്യവസായകേന്ദ്രം കാസര്‍കോടും ചേര്‍ന്ന് ജില്ലയിലെ എല്‍.പി, യു.പി, ഹൈസ്‌ക്കൂള്‍ വിദ്യാര്‍ത്ഥികള്‍ക്കായി ജില്ലാതല ചിത്രരചനാ മത്സരം നടത്തും.   കാഞ്ഞങ്ങാട് മഹാകവി പി. സ്മാരക ഹാളില്‍ ഈ മാസം 25ന് രാവിലെ 10 ന് നടത്തുന്ന മത്സരത്തില്‍ പ്രവേശനം സൗജന്യമാണ്. മത്സരവിജയികള്‍ക്ക് ക്യാഷ്‌പ്രൈസും, സര്‍ട്ടിഫിക്കറ്റും നല്‍കും.

    മീസില്‍സ്-റൂബല്ല പ്രതിരോധ കുത്തിവയ്പ് ഈ മാസം 25 വരെ നീട്ടിയതിനാല്‍ ഒന്‍പതു മാസം മുതല്‍ 15 വയസുവരെയുള്ള എല്ലാ കുട്ടികള്‍ക്കും അടുത്തുള്ള പ്രാഥമികാരോഗ്യ കേന്ദ്രങ്ങളില്‍ നിന്നോ സര്‍ക്കാര്‍ ആശുപത്രികളില്‍ നിന്നോ കുത്തിവയ്പ് എടുക്കണമെന്ന് ജില്ലാ മെഡിക്കല്‍ ഓഫീസര്‍ അറിയിച്ചു.ജില്ലയില്‍ മൂളിയാര്‍(61 ശതമാനം), കുമ്പള(74 ശതമാനം) മംഗല്‍പാടി(60 ശതമാനം) എന്നീ ബ്ലോക്കുകളിലാണ് ഇനിയും കുത്തിവയ്പ് എടുക്കാത്ത കുട്ടികള്‍ കൂടുതല്‍ ഉള്ളത്. 

    സംസ്ഥാന വനിതാ കമ്മീഷന്റെ കാസര്‍കോട് ജില്ലയിലെ മെഗാ അദാലത്ത് ഈ മാസം 23 ന് രാവിലെ 10.30 ന് കളക്ടറേറ്റ് കോണ്‍ഫറന്‍സ് ഹാളില്‍ നടക്കും.

    ജില്ലാകളക്ടറുടെ നേതൃത്വത്തില്‍  മഞ്ചേശ്വരം താലൂക്കിലെ   പരാതിപരിഹാര അദാലത്ത്  ഈ മാസം  30 ന്  മഞ്ചേശ്വരം മേഴ്‌സി കണ്‍വന്‍ഷന്‍ ഹാളില്‍ നടത്തും. അദാലത്തിലേക്ക്  ലൈഫ് മിഷന്‍ പദ്ധതി, ചികിത്സ ധനസഹായം, റേഷന്‍ കാര്‍ഡ്, എല്‍ ആര്‍ എം കേസുമായി  ബന്ധപ്പെട്ട പരാതി ഒഴികെ  നാളെ (22) വരെ മഞ്ചേശ്വരം  താലൂക്ക് പരിധിയില്‍പെട്ട വില്ലേജ് ഓഫീസുകളിലും   മഞ്ചേശ്വരം താലൂക്ക് ഓഫീസിലും പരാതി സ്വീകരിക്കും.

സാമൂഹ്യനീതി വകുപ്പ് ജില്ലാ ചൈല്‍ഡ് പ്രൊട്ടക്ഷന്‍ യൂണിറ്റിന്റെയും കേരള സംസ്ഥാന ബാലാവകാശ സംരക്ഷണ കമ്മീഷന്റെയും 'കയ്‌റോസ്' സദ്ധസംഘടനയുടെയും ആഭിമുഖ്യത്തില്‍ ബാലാവകാശവാരാചരണത്തിന്റെ സമാപന സമ്മേളനം തൃച്ചംബരം സെന്റ് പോള്‍സ് ഇംഗ്ലീഷ് മീഡിയം സ്‌കൂളില്‍ നടത്തി. ചൈല്‍ഡ് വെല്‍ഫയര്‍ കമ്മിറ്റി ചെയര്‍പേഴ്‌സന്‍ മാത്യു.ടി.എ ഉദ്ഘാടനം ചെയ്തു. സ്‌കൂള്‍ മാനേജര്‍ റവ.ഫാ ജേക്കബ് ജോസ് അധ്യക്ഷത വഹിച്ചു. 

ദേശീയ വികലാംഗ പുനരധിവാസ പദ്ധതി: മുച്ചക്ര വാഹനങ്ങളും ഉപകരണങ്ങളും വിതരണം ചെയ്തു 

   ജില്ലയിലെ എല്ലാ ശിശുസംരക്ഷണ അനാഥാലയങ്ങളും നവംബര്‍ 30 നകം രജിസ്റ്റര്‍ ചെയ്യണമെന്ന് ജില്ലാ കളക്ടര്‍ ഡോ. കെ. വാസുകി അറിയിച്ചു.  പൂജപ്പുരയിലെ ജില്ലാ ശിശു സംരക്ഷണ യൂണിറ്റിലാണ് അപേക്ഷ സമര്‍പ്പിക്കേണ്ടത്.  രജിസ്റ്റര്‍ ചെയ്യാത്ത സ്ഥാപനങ്ങള്‍ക്കെതിരെ ജുവനൈല്‍ ജസ്റ്റിസ് നിയമ പ്രകാരം നടപടി സ്വീകരിക്കുമെന്നും കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന ശിശു സംരക്ഷണ സ്ഥാപനങ്ങളുടെ ജില്ലാതല അവലോകന യോഗത്തില്‍ അവര്‍ അറിയിച്ചു.  ഒരു വര്‍ഷം വരെ തടവോ ഒരു ലക്ഷം രൂപ പിഴയോ രണ്ടും കൂടിയോ ശിക്ഷയായി നല്‍കാന്‍ നിയമം നിഷ്‌കര്‍ഷിക്കുന്നുണ്ട്.