നിയമസഭ പൊതു തിരഞ്ഞെടുത്തിനോടനുബന്ധിച്ച് ജില്ലയിലെ 13 നിയോജക മണ്ഡലങ്ങളിലേക്കും വോട്ടെടുപ്പിനായി ഉപയോഗിക്കുന്ന ഇലക്ട്രോണിക് വോട്ടിംഗ് മെഷീനുകളുടെ കമ്മീഷനിങ് (20% കൺട്രോൾ യൂണിറ്റ്, 20% ബാലറ്റ് യൂണിറ്റ്, 30% വി.വി പാറ്റ് റിസർവ് ഉൾപ്പെടെ) വിവിധ കമ്മീഷനിങ് സെന്ററുകളിൽ വെച്ച് പൂർത്തിയായെന്ന് ജില്ല തിരഞ്ഞെടുപ്പ് ഉദ്യോഗസ്ഥയും ജില്ലാ കളക്ടറുമായ ശിഖ സുരേന്ദ്രൻ അറിയിച്ചു. വരണാധികാരികളുടെയും, ഭാരത് ഇലക്ട്രോണിക്സ് ലിമിറ്റഡിലെ എൻജിനീയറിങ്ങ്മാരുടെയും നേതൃത്വത്തിലും സ്ഥാനാർത്ഥികളുടെയും അവരുടെ പ്രതിനിധികളുടെയും സാന്നിധ്യത്തിലുമാണ് കമ്മീഷനിങ്ങ് നടത്തിയത്.

ജില്ലാ ഇലക്ഷൻ ടീമിന്റെയും സ്വീപ് തൃശൂരിന്റെയും നേതൃത്വത്തിൽ ജില്ലയിൽ നൂറ് വയസ്സിനു മുകളിൽ പ്രായമുള്ള സമ്മതിദായകരെ ആദരിച്ചു. വോട്ടർ ബോധവത്കരണ പ്രവർത്തനങ്ങളുടെ ഭാഗമായി സംഘടിപ്പിച്ച ചടങ്ങിൽ സ്വീപ് നോഡൽ ഓഫീസറും അസിസ്റ്റന്റ് കളക്ടറുമായ സ്വാതി മോഹൻ റാത്തോഡ് പൊന്നാടയണിയിച്ച് ആദരിച്ചു.

വെളിയന്നൂർ സ്വദേശിനി കല്യാണി പി വി, പെരിങ്ങാവ് സ്വദേശിനി റോസി വർഗീസ് എന്നിവരെയാണ് ചടങ്ങിൽ ആദരിച്ചത്. അസിസ്റ്റന്റ് നോഡൽ ഓഫീസർ ബിനി സെബാസ്റ്റ്യനും സ്വീപ് ടീമംഗങ്ങളും ചടങ്ങിൽ പങ്കെടുത്തു.

തെരഞ്ഞെടുപ്പിനോടനുബന്ധിച്ച് നിശ്ശബ്ദ പ്രചാരണ കാലയളവിൽ വോട്ടർമാരെ സ്വാധീനിക്കുന്ന തരത്തിലുള്ള പ്രചാരണങ്ങൾക്ക് വിലക്കേർപ്പെടുത്തി തിരഞ്ഞെടുപ്പ് കമ്മീഷൻ. ജനപ്രതിനിധ്യ നിയമം 1951ലെ വകുപ്പ് 126(1)(ബി) പ്രകാരം പോളിംഗ് അവസാനിക്കുന്നതിന് മുമ്പുള്ള 48 മണിക്കൂർ സമയത്ത് ടെലിവിഷൻ, റേഡിയോ, കേബിൾ നെറ്റ്‌വർക്കുകൾ തുടങ്ങി ഏതെങ്കിലും മാധ്യമങ്ങളിലൂടെ ഇത്തരത്തിലുള്ള ഉള്ളടക്കങ്ങൾ പ്രചരിപ്പിക്കുന്നത് അനുവദനീയമല്ലെന്ന് കമ്മീഷൻ അറിയിച്ചു. അഭിപ്രായ സർവേകൾ പ്രദർശിപ്പിക്കുന്നതിനും വിലക്കുണ്ട്. ഏപ്രിൽ ഏഴിന് വൈകിട്ട് ആറ് മുതൽ ഏപ്രിൽ ഒൻപതിന് വൈകിട്ട് ആറ് വരെയാണ് നിയന്ത്രണം. 

 നിയമസഭാ പൊതുതിരഞ്ഞെടുപ്പിനോടനുബന്ധിച്ച് വോട്ടെടുപ്പ് ദിനമായ ഏപ്രിൽ 9 ന് ജില്ലയിലെ സർക്കാർ സ്ഥാപനങ്ങൾക്കും വിദ്യാഭ്യാസ സ്ഥാപനങ്ങൾക്കും നെഗോഷ്യബിൾ ഇൻസ്ട്രുമെന്റ് ആക്ട് പ്രകാരം പ്രവർത്തിക്കുന്ന സ്ഥാപനങ്ങൾക്കും പൊതു അവധി പ്രഖ്യാപിച്ചു.

 പോളിംഗ് സാമഗ്രികളുടെ സ്വീകരണ വിതരണ സെന്ററുകളായും പോളിംഗ് സ്റ്റേഷനുകളായും നിശ്ചയിച്ചിട്ടുള്ള വിദ്യാഭ്യാസ സ്ഥാപനങ്ങൾക്ക് ഏപ്രിൽ എട്ടിനും വോട്ടെണ്ണൽ കേന്ദ്രങ്ങളായി നിശ്ചയിച്ചിട്ടുള്ള വിദ്യാഭ്യാസ സ്ഥാപനങ്ങൾക്ക് വോട്ടെണ്ണൽ ദിനമായ മെയ് നാലിനും അവധി പ്രഖ്യാപിച്ച് ജില്ലാ ഓഫീസറും ജില്ലാ കലക്ടറുമായ ശിഖ സുരേന്ദ്രൻ ഉത്തരവിറക്കി.

 തലപ്പിള്ളി താലൂക്ക് ദേശമംഗലം - പല്ലൂർ ഗ്രൂപ്പ് വില്ലേജിലെ വില്ലേജ് ഓഫീസറായ എസ്. ശ്രീരാജിനെ അനധികൃതമായി ജോലിയിൽ ഹാജരാകാത്തതിനാൽ ജില്ലാ കളക്ടർ ശിഖ സുരേന്ദ്രൻ അന്വേഷണവിധേയമായി സസ്പെൻഡ് ചെയ്തു.

 തൃശ്ശൂർ നിയോജക മണ്ഡലത്തിൽ പോളിംഗ് ഉദ്യോഗസ്ഥരായി നിയമിക്കപ്പെട്ടവർക്കുള്ള പരിശീലന ക്ലാസ് ഏപ്രിൽ 6 രാവിലെ 9ന് തൃശ്ശൂർ ടൗൺഹാളിൽ നടക്കും. മുൻ പരിശീലന ക്ലാസ്സിൽ പങ്കെടുക്കാത്തവർക്കും ഈ ക്ലാസ് പ്രയോജനപ്പെടുത്താമെന്ന് തൃശ്ശൂർ നിയോജകമണ്ഡലം വരണാധികാരി അറിയിച്ചു.

നിയമസഭ തിരഞ്ഞെടുപ്പിന് നിയോഗിച്ച പോളിങ്ങ് ഉദ്യോഗസ്ഥരുടെ രണ്ടാംഘട്ട പരിശീലനം പൂര്‍ത്തിയായി. കോന്നി എന്‍ എസ് എസ് കോളജ്, അടൂര്‍ സര്‍ക്കാര്‍ എച്ച്.എസ്.എസ്, പത്തനംതിട്ട കാതോലിക്കേറ്റ് കോളജ്, തിരുവല്ല സെന്റ് മേരീസ് കോളജ് ഫോര്‍ വിമന്‍സ്, റാന്നി സെന്റ് തോമസ് കോളജ് എന്നീ കേന്ദ്രങ്ങളിലായിരുന്നു മൂന്നു ദിവസത്തെ പരിശീലനം.

ജില്ലയിലെ വിവിധ നിയോജകമണ്ഡലങ്ങളില്‍ ഇലക്ട്രോണിക് വോട്ടിങ് യന്ത്രങ്ങളുടെ (ഇ വി എം) കമ്മീഷനിങ് പൂര്‍ത്തിയായി. ഏപ്രില്‍ രണ്ട്, മൂന്ന് തീയതികളിലായി ആറന്മുള, റാന്നി, കോന്നി, അടൂര്‍ മണ്ഡലങ്ങളില്‍ കമ്മീഷനിങ് നടത്തി. തിരുവല്ലയില്‍ ഏപ്രില്‍ ഒന്ന്, രണ്ട് തീയതികളില്‍ പൂര്‍ത്തിയാക്കി. അതാത് വരണാധികാരികളുടെ മേല്‍നോട്ടത്തില്‍ സ്ഥാനാര്‍ഥികളുടെ പേര്, ചിഹ്നം, ഫോട്ടോ എന്നിവ ഇലക്ട്രോണിക് വോട്ടിങ് യന്ത്രത്തില്‍ രേഖപ്പെടുത്തുന്ന ജോലിയാണ് വോട്ടിങ് യന്ത്രങ്ങളുടെ കമ്മീഷനിങ്ങില്‍ നടക്കുന്നത്.

തിരഞ്ഞെടുപ്പിന് തലേന്നും വോട്ടെടുപ്പ് ദിവസവും ദിനപത്രങ്ങള്‍ അടക്കമുള്ള അച്ചടിമാധ്യമങ്ങളില്‍ നല്‍കുന്ന തിരഞ്ഞെടുപ്പ് പരസ്യങ്ങള്‍ക്ക് ജില്ലാതല മീഡിയ മോണിറ്ററിങ് ആന്‍ഡ് മീഡിയ സര്‍ട്ടിഫിക്കേഷന്‍ കമ്മിറ്റിയുടെ (എം.സി.എം.സി) മുന്‍കൂര്‍ അനുമതി നിര്‍ബന്ധമാണെന്ന് തിരഞ്ഞെടുപ്പ് കമ്മീഷന്‍ അറിയിച്ചു. വോട്ടെടുപ്പ് ദിവസമായ ഏപ്രില്‍ ഒമ്പതിനും തലേദിവസമായ ഏപ്രില്‍ എട്ടിനും പത്രങ്ങളില്‍ പരസ്യം നല്‍കാന്‍ ഉദ്ദേശിക്കുന്ന സ്ഥാനാര്‍ഥികളും വ്യക്തികളും കമ്മിറ്റിയുടെ അംഗീകാരം വാങ്ങിയിരിക്കണം. പരസ്യം നല്‍കാന്‍ നിശ്ചയിച്ച തീയതിക്ക് രണ്ട് ദിവസം മുമ്പെങ്കിലും അപേക്ഷ സമര്‍പ്പിക്കണം.