വോട്ട് ചെയ്യാൻ താല്പര്യമുള്ള എല്ലാവർക്കും അതിനുള്ള അവസരം ഒരുക്കുക എന്നതാണ് ജില്ലാ ഭരണകൂടത്തിന്റെ ലക്ഷ്യമെന്ന് ജില്ലാ കളക്ടർ ജി പ്രിയങ്ക. വരുന്ന നിയമസഭാ തിരഞ്ഞെടുപ്പിൽ എല്ലാ ജനവിഭാഗങ്ങളുടെയും പങ്കാളിത്തം ഉറപ്പു വരുത്തുന്നതിന് വേണ്ടി ജില്ലാ ഭരണകൂടം നടത്തുന്ന ഒരുക്കങ്ങളുടെ അവലോകന യോഗത്തിൽ സംസാരിക്കുകയായിരുന്നു ജില്ലാ കളക്ടർ. 

തൃക്കാക്കര നിയോജക മണ്ഡലത്തിലെ തിരഞ്ഞെടുപ്പ് ജോലികൾക്കായി നിയോഗിക്കപ്പെട്ടിട്ടുള്ള വിവിധ വിഭാഗം ഉദ്യോഗസ്ഥർക്ക് പോസ്റ്റൽ വോട്ട് രേഖപ്പെടുത്തുന്നതിനുള്ള ഫെസിലിറ്റേഷൻ സെന്ററുകൾ ഇന്ന് (ഏപ്രിൽ 1 ) മുതൽ പ്രവർത്തനമാരംഭിക്കും.
​അവശ്യ സർവീസ് വിഭാഗത്തിൽപ്പെട്ട ഉദ്യോഗസ്ഥർക്ക് (AVES) കാക്കനാട് എം.എ. അബൂബക്കർ മെമ്മോറിയൽ എൽ.പി. സ്കൂളിലെ പോസ്റ്റൽ വോട്ടിങ് സെന്ററിൽ (PVC) വോട്ട് രേഖപ്പെടുത്താം. 

നിയമസഭാ തിരഞ്ഞെടുപ്പ് നടക്കുന്ന ഏപ്രിൽ 9-ന് സമ്മതിദായകർക്ക് പോളിങ് ബൂത്തുകളിലെത്താൻ സൗജന്യ യാത്രയൊരുക്കി ഊബർ ഇന്ത്യ. ഊബർ ആപ്പിലെ കാർ, ഓട്ടോ, ബൈക്ക് എന്നീ വിഭാഗങ്ങളിൽ ഈ സൗജന്യ സേവനം ലഭ്യമാകും. വോട്ടർമാരെ പിക്ക് ചെയ്യുന്ന സ്ഥലത്തുനിന്നും രണ്ട് കിലോമീറ്റർ വരെയുള്ള യാത്രകൾ പൂർണ്ണമായും സൗജന്യമായിരിക്കും. രണ്ട് കിലോമീറ്ററിന് ശേഷമുള്ള യാത്രക്ക് ഊബർ നിശ്ചയിച്ചിട്ടുള്ള തുക നൽകണം.

 എല്ലാ പോളിങ് ബൂത്തുകളുടെയും ലൊക്കേഷനുകൾ ആപ്പിൽ ലഭ്യമാക്കിയിട്ടുണ്ട്. മുതിർന്ന പൗരന്മാർക്കും ശാരീരിക ബുദ്ധിമുട്ടുള്ളവർക്കും ഉൾപ്പെടെ എല്ലാ വോട്ടർമാർക്കും ഈ സേവനം പ്രയോജനപ്പെടുത്താം. 

ഏപ്രിൽ 9-ന് നടക്കാനിരിക്കുന്ന  നിയമസഭാ തിരഞ്ഞെടുപ്പിൽ ഭിന്നശേഷിക്കാർക്കും മുതിർന്ന പൗരന്മാർക്കും ആവശ്യമായ പ്രത്യേക സഹായങ്ങൾ ഉറപ്പാക്കാൻ തിരഞ്ഞെടുപ്പ് കമ്മീഷൻ.

വോട്ട് ചെയ്യാൻ പോകുമ്പോൾ വീൽചെയർ, പോളിങ് സ്റ്റേഷനിലേക്കുള്ള വാഹന സൗകര്യം തുടങ്ങിയവ ആവശ്യമുള്ളവർക്ക് ഇനി ഇസിഐ നെറ്റ് (ECINET) ആപ്പ് വഴി അപേക്ഷിക്കാം.

ഗൂഗിൾ പ്ലേ സ്റ്റോറിൽ നിന്നോ ആപ്പിൾ ആപ്പ് സ്റ്റോറിൽ നിന്നോ ഇസിഐ നെറ്റ് ആപ്പ് ഡൗൺലോഡ് ചെയ്ത് ഇൻസ്റ്റാൾ ചെയ്തതിനു ശേഷം രജിസ്റ്റർ ചെയ്യുക. ലോഗിൻ ചെയ്ത ശേഷം ദിവ്യാംഗ് അഥവ സക്ഷം എന്ന വിഭാഗത്തിൽ ക്ലിക്ക്  ചെയ്ത് , വോട്ടർ  ഐ.ഡി നൽകി ആവശ്യമുള്ള സേവനം ആവശ്യപ്പെടുക. 

പോസ്റ്റല്‍ വോട്ടിനായി ഫോറം 12 ല്‍ ഇന്ന് (ഏപ്രില്‍ രണ്ട്) കൂടി അപേക്ഷ സമര്‍പ്പിക്കാം. കലക്ടറേറ്റിലെ ജില്ലാതല ക്ലിയറന്‍സ് സെന്റര്‍ (ഡി എല്‍ സി സി), വരണാധികാരികളുടെയോ ഉപവരണാധികാരികളുടെയോ ഓഫീസുകള്‍, പരിശീലന കേന്ദ്രങ്ങളിലെ ഫെസിലിറ്റേഷന്‍ സെന്ററുകള്‍ എന്നിവിടങ്ങളില്‍ അപേക്ഷകള്‍ സമര്‍പ്പിക്കാം. അപേക്ഷയോടൊപ്പം ഡ്യൂട്ടി സര്‍ട്ടിഫിക്കറ്റിന്റെയും വോട്ടര്‍ ഐ ഡി കാര്‍ഡിന്റെയും പകര്‍പ്പുകള്‍ നിര്‍ബന്ധമായും ഉള്ളടക്കം ചെയ്യേണ്ടതാണെന്ന് ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കലക്ടര്‍ അറിയിച്ചു.
 

നിയമസഭാ തിരഞ്ഞെടുപ്പ് പോളിംഗ് ജോലിക്കായി നിയോഗിക്കപ്പെട്ട ഉദ്യോഗസ്ഥരുടെ രണ്ടാംഘട്ട പരിശീലനം പൊതുഅവധി ദിവസമായ ഇന്നും (ഏപ്രില്‍ രണ്ട്) നടക്കുമെന്നും നിയോഗിക്കപ്പെട്ട ഉദ്യോഗസ്ഥര്‍ നിര്‍ബന്ധമായും പങ്കെടുക്കണമെന്നും ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കലക്ടര്‍ അറിയിച്ചു. പരിശീലനത്തില്‍ പങ്കെടുക്കാത്ത ഉദ്യോഗസ്ഥര്‍ക്കെതിരെ കര്‍ശന നടപടി സ്വീകരിക്കുമെന്നും മുന്നറിയിപ്പ് നല്‍കി.

നിയമസഭാ തിരഞ്ഞെടുപ്പുമായി ബന്ധപ്പെട്ട് കേന്ദ്ര ചിലവ് നിരീക്ഷകര്‍  ഏപ്രില്‍ രണ്ടിന് രാവിലെ 10  മുതല്‍ 11 വരെ കൊല്ലം റസ്റ്റ്ഹൗസിലെ റൂം നമ്പര്‍ 11 ല്‍ മണ്ഡലങ്ങളുമായി ബന്ധപ്പെട്ട പൊതുജനങ്ങളുടെ പരാതികള്‍ സ്വീകരിക്കും. കരുനാഗപ്പള്ളി, ചവറ, കുന്നത്തൂര്‍ മണ്ഡലങ്ങളിലെ പരാതികള്‍ നിരീക്ഷകയായ ജ്യോത്സനാദേവിയും (ഫോണ്‍: 8137933725) കുണ്ടറ, കൊല്ലം, ഇരവിപുരം, ചാത്തന്നൂര്‍ മണ്ഡലങ്ങളിലെ പരാതികള്‍ നിരീക്ഷകയായ അനുരാധയും (ഫോണ്‍: 8137084725) സ്വീകരിക്കും.
 

   തിരഞ്ഞെടുപ്പ്   പെരുമാറ്റചട്ടം ലംഘിച്ച് ജില്ലയിലെ വിവിധ ഇടങ്ങളില്‍ സ്ഥാപിച്ച അനധികൃത പ്രചാരണസാമഗ്രികള്‍ നീക്കംചെയ്യുന്നത് കൂടുതല്‍ ഊര്‍ജിതമാക്കിയെന്ന് ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കലക്ടര്‍ എന്‍. ദേവിദാസ്. ആന്റി ഡിഫേസ്മെന്റ് സ്‌ക്വാഡുകള്‍ 25263 പ്രചാരണ സാമഗ്രികള്‍ നീക്കം ചെയ്തു.

നിയമസഭ തിരഞ്ഞെടുപ്പുമായി ബന്ധപ്പെട്ട് 85ന് മുകളില്‍ പ്രായമുള്ളവര്‍ക്കും ഭിന്നശേഷിക്കാര്‍ക്കും വീട്ടില്‍നിന്ന് വോട്ട് ചെയ്യാന്‍ അവസരം നല്‍കുന്ന ഹോം വോട്ടിങ് സംവിധാനത്തിന് ജില്ലയില്‍ തുടക്കമായി. വീടുകളില്‍ വോട്ട് ചെയ്യാന്‍ താല്‍പര്യമറിയിച്ച 85 വയസ്സ് പിന്നിട്ട 12,260 പേരും ഭിന്നശേഷിക്കാരായ 6,788 പേരുമാണ് ജില്ലയില്‍ ഈ സംവിധാനം ഉപയോഗപ്പെടുത്തുക.