ഏപ്രിൽ 9-ന് നടക്കാനിരിക്കുന്ന  നിയമസഭാ തിരഞ്ഞെടുപ്പിൽ ഭിന്നശേഷിക്കാർക്കും മുതിർന്ന പൗരന്മാർക്കും ആവശ്യമായ പ്രത്യേക സഹായങ്ങൾ ഉറപ്പാക്കാൻ തിരഞ്ഞെടുപ്പ് കമ്മീഷൻ.

വോട്ട് ചെയ്യാൻ പോകുമ്പോൾ വീൽചെയർ, പോളിങ് സ്റ്റേഷനിലേക്കുള്ള വാഹന സൗകര്യം തുടങ്ങിയവ ആവശ്യമുള്ളവർക്ക് ഇനി ഇസിഐ നെറ്റ് (ECINET) ആപ്പ് വഴി അപേക്ഷിക്കാം.

ഗൂഗിൾ പ്ലേ സ്റ്റോറിൽ നിന്നോ ആപ്പിൾ ആപ്പ് സ്റ്റോറിൽ നിന്നോ ഇസിഐ നെറ്റ് ആപ്പ് ഡൗൺലോഡ് ചെയ്ത് ഇൻസ്റ്റാൾ ചെയ്തതിനു ശേഷം രജിസ്റ്റർ ചെയ്യുക. ലോഗിൻ ചെയ്ത ശേഷം ദിവ്യാംഗ് അഥവ സക്ഷം എന്ന വിഭാഗത്തിൽ ക്ലിക്ക്  ചെയ്ത് , വോട്ടർ  ഐ.ഡി നൽകി ആവശ്യമുള്ള സേവനം ആവശ്യപ്പെടുക. 

പോസ്റ്റല്‍ വോട്ടിനായി ഫോറം 12 ല്‍ ഇന്ന് (ഏപ്രില്‍ രണ്ട്) കൂടി അപേക്ഷ സമര്‍പ്പിക്കാം. കലക്ടറേറ്റിലെ ജില്ലാതല ക്ലിയറന്‍സ് സെന്റര്‍ (ഡി എല്‍ സി സി), വരണാധികാരികളുടെയോ ഉപവരണാധികാരികളുടെയോ ഓഫീസുകള്‍, പരിശീലന കേന്ദ്രങ്ങളിലെ ഫെസിലിറ്റേഷന്‍ സെന്ററുകള്‍ എന്നിവിടങ്ങളില്‍ അപേക്ഷകള്‍ സമര്‍പ്പിക്കാം. അപേക്ഷയോടൊപ്പം ഡ്യൂട്ടി സര്‍ട്ടിഫിക്കറ്റിന്റെയും വോട്ടര്‍ ഐ ഡി കാര്‍ഡിന്റെയും പകര്‍പ്പുകള്‍ നിര്‍ബന്ധമായും ഉള്ളടക്കം ചെയ്യേണ്ടതാണെന്ന് ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കലക്ടര്‍ അറിയിച്ചു.
 

നിയമസഭാ തിരഞ്ഞെടുപ്പ് പോളിംഗ് ജോലിക്കായി നിയോഗിക്കപ്പെട്ട ഉദ്യോഗസ്ഥരുടെ രണ്ടാംഘട്ട പരിശീലനം പൊതുഅവധി ദിവസമായ ഇന്നും (ഏപ്രില്‍ രണ്ട്) നടക്കുമെന്നും നിയോഗിക്കപ്പെട്ട ഉദ്യോഗസ്ഥര്‍ നിര്‍ബന്ധമായും പങ്കെടുക്കണമെന്നും ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കലക്ടര്‍ അറിയിച്ചു. പരിശീലനത്തില്‍ പങ്കെടുക്കാത്ത ഉദ്യോഗസ്ഥര്‍ക്കെതിരെ കര്‍ശന നടപടി സ്വീകരിക്കുമെന്നും മുന്നറിയിപ്പ് നല്‍കി.

നിയമസഭാ തിരഞ്ഞെടുപ്പുമായി ബന്ധപ്പെട്ട് കേന്ദ്ര ചിലവ് നിരീക്ഷകര്‍  ഏപ്രില്‍ രണ്ടിന് രാവിലെ 10  മുതല്‍ 11 വരെ കൊല്ലം റസ്റ്റ്ഹൗസിലെ റൂം നമ്പര്‍ 11 ല്‍ മണ്ഡലങ്ങളുമായി ബന്ധപ്പെട്ട പൊതുജനങ്ങളുടെ പരാതികള്‍ സ്വീകരിക്കും. കരുനാഗപ്പള്ളി, ചവറ, കുന്നത്തൂര്‍ മണ്ഡലങ്ങളിലെ പരാതികള്‍ നിരീക്ഷകയായ ജ്യോത്സനാദേവിയും (ഫോണ്‍: 8137933725) കുണ്ടറ, കൊല്ലം, ഇരവിപുരം, ചാത്തന്നൂര്‍ മണ്ഡലങ്ങളിലെ പരാതികള്‍ നിരീക്ഷകയായ അനുരാധയും (ഫോണ്‍: 8137084725) സ്വീകരിക്കും.
 

   തിരഞ്ഞെടുപ്പ്   പെരുമാറ്റചട്ടം ലംഘിച്ച് ജില്ലയിലെ വിവിധ ഇടങ്ങളില്‍ സ്ഥാപിച്ച അനധികൃത പ്രചാരണസാമഗ്രികള്‍ നീക്കംചെയ്യുന്നത് കൂടുതല്‍ ഊര്‍ജിതമാക്കിയെന്ന് ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കലക്ടര്‍ എന്‍. ദേവിദാസ്. ആന്റി ഡിഫേസ്മെന്റ് സ്‌ക്വാഡുകള്‍ 25263 പ്രചാരണ സാമഗ്രികള്‍ നീക്കം ചെയ്തു.

നിയമസഭ തിരഞ്ഞെടുപ്പുമായി ബന്ധപ്പെട്ട് 85ന് മുകളില്‍ പ്രായമുള്ളവര്‍ക്കും ഭിന്നശേഷിക്കാര്‍ക്കും വീട്ടില്‍നിന്ന് വോട്ട് ചെയ്യാന്‍ അവസരം നല്‍കുന്ന ഹോം വോട്ടിങ് സംവിധാനത്തിന് ജില്ലയില്‍ തുടക്കമായി. വീടുകളില്‍ വോട്ട് ചെയ്യാന്‍ താല്‍പര്യമറിയിച്ച 85 വയസ്സ് പിന്നിട്ട 12,260 പേരും ഭിന്നശേഷിക്കാരായ 6,788 പേരുമാണ് ജില്ലയില്‍ ഈ സംവിധാനം ഉപയോഗപ്പെടുത്തുക.

ഒരാള്‍പോലും വോട്ടുചെയ്യാതിരിക്കരുതെന്ന സന്ദേശവുമായി അഷ്ടമുടികായലിലൂടെ  സ്വീപിന്റെ പ്രചാരണം. ജനാധിപത്യ കായല്‍റാലി സംഘടിപ്പിച്ചാണ് ബോധവത്കരണം നടത്തിയത്. കൊല്ലം ബോട്ടുജെട്ടിയില്‍ ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കലക്ടര്‍ എന്‍. ദേവിദാസ് ഫ്‌ളാഗ്ഓഫ് നിര്‍വഹിച്ചു. വോട്ടെണ്ണമാണ് ഉയര്‍ന്ന ജനാധിപത്യബോധത്തിന്റെ അടയാളപ്പെടുത്തലെന്ന് ഓര്‍മിപ്പിച്ചു.

നിയമസഭാ തിരഞ്ഞെടുപ്പില്‍ പങ്കാളിത്തം വര്‍ധിപ്പിക്കുന്നതിനുള്ള പ്രചാരണ പരിപാടികള്‍ക്ക് നേതൃത്വം നല്‍കാന്‍ റസിഡന്റ്‌സ് അസോസിയേഷനുകളും കുടുംബശ്രീ യൂണിറ്റുകളും. കഴിഞ്ഞ തിരഞ്ഞെടുപ്പുകളില്‍ കുറഞ്ഞ പോളിങ് ശതമാനം രേഖപ്പെടുത്തിയ കോഴിക്കോട് നോര്‍ത്ത്, സൗത്ത് മണ്ഡലങ്ങളില്‍ പോളിങ് മെച്ചപ്പെടുത്താന്‍ ജില്ലാ ഭരണകൂടവും നഗരസഭയും സംയുക്തമായി കുടുംബശ്രീയുടെയും റസിഡന്റ്‌സ് അസോസിയേഷനുകളുടെയും യോഗം സംഘടിപ്പിച്ചു. ജില്ലാ കലക്ടര്‍ സ്‌നേഹില്‍ കുമാര്‍ സിങ് ഉദ്ഘാടനം ചെയ്തു.