മികവുറ്റ നിരവധി പുസ്തകങ്ങള്‍ തീര്‍ഥാടകര്‍ക്ക് ലഭ്യമാക്കുന്ന സന്നിധാനത്തെ ദേവസ്വം ബുക് സ്റ്റാളുകളില്‍ തിരക്കേറുന്നു. ദേവസ്വം ബോര്‍ഡിന്റെയും സ്വകാര്യ പ്രസാധകരുടെയും നിരവധി മികവുറ്റ പുസ്തകങ്ങള്‍ ന്യായ വിലയ്ക്ക് ഇവിടെ ലഭിക്കും. സന്നിധാനത്ത് വടക്കേ നടയിലാണ് 24 മണിക്കൂറും സേവനം നല്‍കുന്ന മൂന്ന് ദേവസ്വം ബുക്ക് സ്റ്റാളുകള്‍ പ്രവര്‍ത്തിക്കുന്നത്. 
 ദേവസ്വം ബോര്‍ഡ് പ്രസിദ്ധീകരിച്ചിട്ടുള്ള മൂന്നു വോള്യങ്ങളിലുള്ള തിരുവിതാംകൂറിലെ ക്ഷേത്രങ്ങള്‍ എന്ന പുസ്തകവും രാമായണവും സൂപ്പര്‍ ഹിറ്റുകളാണ്. തിരുവിതാംകൂറിലെ ക്ഷേത്രങ്ങള്‍ ഒരു വോള്യം 400 രൂപയ്ക്ക് ലഭിക്കും. രാമായണത്തിന് 180 രൂപയാണ് വില. 

അയ്യപ്പന് കാണിക്കയായി ശിങ്കാരിമേളവുമായി 17 അംഗ യുവ കലാസംഘം സന്നിധാനത്ത് എത്തി. തിരുവനന്തപുരം നെയ്യാറ്റിന്‍കര പെരുംങ്കടവിള ശ്രീബാലഭദ്ര ശിങ്കാരിമേളത്തിലെ അര്‍ജുന്റെ നേതൃത്വത്തിലുള്ള കലാകാരന്മാരാണ് ശ്രദ്ധേയ കലാപ്രകടനം നടത്തിയത്. രഞ്ജിത്ത്, ദീപു, കണ്ണന്‍, ശ്രാവണ്‍, അഭിജിത്, രാഹുല്‍, അനു പ്രസാദ്, അശ്വിന്‍, അമല്‍, കുക്കു, അനന്തു, ശരത്, നന്ദു, ജയചന്ദ്രന്‍, വിവേക്, വിനീത് തുടങ്ങിയവരാണ് സംഘത്തിലുണ്ടായിരുന്നത്. 
    

ശബരിമല: അയ്യപ്പദര്‍ശനത്തിനെത്തുന്നവര്‍ ശബരിമലയില്‍ പ്ലാസ്റ്റിക് വസ്തുക്കള്‍ കൊണ്ടു വരാതിരിക്കാന്‍ ശ്രദ്ധിക്കണമെന്ന് ക്ഷേത്രം തന്ത്രി കണ്ഠര് മഹേഷ് മോഹനര് പറഞ്ഞു. മലിനീകരണത്തിനിടയാക്കും വിധം  പ്ലാസ്റ്റിക് വസ്തുക്കള്‍ വലിച്ചെറിയുന്നത് ശബരിമലയിലെ പരിസ്ഥിതിക്ക് സാരമായ ദോഷമുണ്ടാക്കുന്നുണ്ട്. സാധാരണഗതിയില്‍ ദര്‍ശനത്തിനെത്തുന്നവര്‍ക്ക് പ്ലാസ്റ്റിക് വസ്തുക്കളുടെ ആവശ്യമില്ല. ഇരുമുടിക്കെട്ടില്‍ ഒരു തരത്തിലുള്ള പ്ലാസ്റ്റിക് ഉല്‍പ്പന്നങ്ങളും പാടില്ല.

ശബരിമല: അയ്യപ്പദര്‍ശനത്തിനെത്തുന്ന  തീര്‍ഥാടകര്‍ പമ്പയില്‍ കുളിച്ച് പഴയ വസ്ത്രം ഉപേക്ഷിക്കുന്ന രീതിക്ക് വിശ്വാസപരമായോ ആചാരപരമായോ ആയ അടിത്തറയില്ലെന്ന് ക്ഷേത്രം തന്ത്രി കണ്ഠര് മഹേഷ് മോഹനര് പറഞ്ഞു. സന്നിധാനത്ത് സംസാരിക്കുകയായിരുന്നു അദ്ദേഹം. ഇക്കാര്യത്തില്‍ മുമ്പ് ചിലര്‍ ചെയ്തത് ദുരാചാരം പോലെ പലരും ആവര്‍ത്തിക്കുകയാണ.് ഇത് തുടരാതിരിക്കാന്‍ തീര്‍ഥാടകര്‍ ശ്രദ്ധിക്കണം.

കേരളത്തിന്റെ തനതായ ബാങ്ക് എന്ന സ്വപ്നം സാക്ഷാത്കരിക്കുമെന്ന്  സഹകരണ മന്ത്രി കടകംപള്ളി സുരേന്ദ്രന്‍. വല്ലം ജംഗ്ഷനില്‍ ഒക്കല്‍ സര്‍വീസ് സഹകരണബാങ്കിന്റെ വല്ലം ബ്രാഞ്ച് ഉദ്ഘാടനം ചെയ്യുകയായിരുന്നു അദ്ദേഹം. നിര്‍ദിഷ്ട കേരള ബാങ്കിന്റെ  ഘടകങ്ങള്‍ ആയിരിക്കും സംസ്ഥാന ബാങ്കും പ്രാഥമിക സഹകരണ സംഘങ്ങളും. കേരളത്തിന്റെ തനതായ ബാങ്ക് രൂപീകരിക്കുന്നതിലൂടെ പ്രാഥമിക സഹകരണ സംഘങ്ങള്‍ക്ക് കൂടുതല്‍ ശക്തി പകരാനാവും. കേരള ബാങ്ക് വരുമ്പോള്‍ ജില്ലാ ബാങ്കുകളുടെ ഭരണസമിതി മാത്രമേ ഇല്ലാതാവുകയുള്ളൂ.  നൂതന സാങ്കേതിക വിദ്യയിലധിഷ്ഠിതമായ സേവനങ്ങള്‍ കേരള ബാങ്ക് വഴി ഇടപാടുകാര്‍ക്ക് നല്‍കും.

സംസ്ഥാനത്തെ സ്വകാര്യ ആശുപത്രികള്‍, ഡിസ്‌പെന്‍സറികള്‍, ഫാര്‍മസികള്‍, സ്‌കാനിംഗ് സെന്ററുകള്‍, എക്‌സ്‌റേ യൂണിറ്റുകള്‍, ബന്ധപ്പെട്ട മറ്റു സ്ഥാപനങ്ങള്‍ എന്നിവയിലെ ജീവനക്കാര്‍ക്കുള്ള കുറഞ്ഞ വേതനം സംബന്ധിച്ച് സര്‍ക്കാര്‍ പ്രാഥമിക വിജ്ഞാപനമായി.

കേരള സംസ്ഥാന പട്ടികജാതി പട്ടികവര്‍ഗ്ഗ വികസന കോര്‍പ്പറേഷന്‍, ദേശീയ പട്ടികജാതി ധനകാര്യ വികസന കോര്‍പ്പറേഷന്റെ സാമ്പത്തിക സഹായത്തോടെ നടപ്പാക്കുന്ന പരമാവധി 3.70 ലക്ഷം രൂപ പദ്ധതി തുകയുള്ള ഓട്ടോ ടാക്‌സി പദ്ധതിക്കു കീഴില്‍ വായ്പ അനുവദിക്കുന്നതിന് കേരളത്തിലെ എല്ലാ ജില്ലകളിലേയും പട്ടികജാതിയില്‍പ്പെട്ട തൊഴില്‍രഹിതരായ യുവതീ യുവാക്കളില്‍ നിന്നും അപേക്ഷ ക്ഷണിച്ചു.

ദേശീയ പ്രസ്ഥാനത്തില്‍ നായകത്വം വഹിച്ച് കേരളത്തിന്റെ വീരപുത്രന്‍ എന്നറിയപ്പെട്ട മുഹമ്മദ് അബ്ദുള്‍ റഹ്മാന്‍ സാഹിബിനെക്കുറിച്ച് സി-ഡിറ്റ് തയ്യാറാക്കിയ 'ഞാന്‍ മുഹമ്മദ് അബ്ദുള്‍ റഹ്മാന്‍' എന്ന ഡോക്യുമെന്ററിയുടെ പ്രകാശനം നവംബര്‍ 21 ചൊവ്വാഴ്ച നാല് മണിക്ക് സെക്രട്ടേറിയറ്റിലെ മുഖ്യമന്ത്രിയുടെ കോണ്‍ഫറന്‍സ് ഹാളില്‍ മുഖ്യമന്ത്രി പിണറായി വിജയന്‍ നിര്‍വഹിക്കും. ടൂറിസം വകുപ്പിനു കീഴിലുള്ള മുസിരിസ് പദ്ധതിയുടെ ആഭിമുഖ്യത്തില്‍ സാഹിബിന്റെ ജന്മഗൃഹമായ കൊടുങ്ങല്ലൂര്‍ കറുകപ്പാടത്ത് സജ്ജീകരിക്കുന്ന മ്യൂസിയത്തില്‍ പ്രദര്‍ശിപ്പിക്കുന്നതിനായി തയ്യാറാക്കിയതാണ് ഡോക്യുമെന്ററി. സംവിധായകന്‍ കെ. മോഹന്‍കുമാറാണ്.

തിരുവിതാംകൂര്‍ ദേവസ്വം ബോര്‍ഡിലെ പാര്‍ട്ട് ടൈം ശാന്തി തസ്തികയിലേയ്ക്ക് ആഗസ്റ്റ് 23 ന് നിലവില്‍ വന്ന റാങ്ക് ലിസ്റ്റില്‍ നിന്നും 80 ഉദ്യോഗാര്‍ത്ഥികളെ കൂടി നിയമനത്തിനായി ശുപാര്‍ശ ചെയ്തു. നിലവിലുള്ള സംവരണ വ്യവസ്ഥയനുസരിച്ച് നിയമനത്തിനായി ശുപാര്‍ശ ചെയ്തതില്‍ 54 പേര്‍ മെറിറ്റടിസ്ഥാനത്തിലും 26 പേര്‍ സംവരണാടിസ്ഥാനത്തിലും ഉള്‍പ്പെട്ടിട്ടുണ്ട്. ഈഴവ വിഭാഗത്തില്‍ നിന്നും ഒമ്പത് പേരും, പട്ടികജാതിക്കാരില്‍ നിന്നും ആറു പേരും മറ്റു പിന്നാക്ക വിഭാഗങ്ങളില്‍ നിന്ന് അഞ്ച് പേരും വിശ്വകര്‍മ്മ, ധീവര വിഭാഗങ്ങളില്‍ നിന്നും രണ്ടുപേര്‍ വീതവും സംവരണാടിസ്ഥാനത്തില്‍ നിയമനത്തിന് ശുപാര്‍ശ ചെയ്യപ്പെട്ടിട്ടുണ്ട്.

ലോവര്‍ പ്രൈമറി വിഭാഗം, അപ്പര്‍ പ്രൈമറി വിഭാഗം, ഹൈസ്‌കൂള്‍ വിഭാഗം, (ഭാഷാ-യു.പി തലം വരെ/സ്‌പെഷ്യല്‍ വിഷയങ്ങള്‍ - ഹൈസ്‌കൂള്‍ തലം വരെ) അധ്യാപക യോഗ്യതാ പരീക്ഷ (കെ-ടെറ്റ്) ന് വേണ്ടിയുള്ള വിജ്ഞാപനം പ്രസിദ്ധീകരിച്ചു. കാറ്റഗറി I & II പരീക്ഷകള്‍ ഡിസംബര്‍ 28 നും കാറ്റഗറി III & IV പരീക്ഷകള്‍ ഡിസംബര്‍ 30 നും കേരളത്തിലെ വിവിധ സെന്ററുകളില്‍ നടക്കും. കെ-ടെറ്റ് ഡിസംബര്‍ 2017 ല്‍ പങ്കെടുക്കുന്നതിനുള്ള ഓണ്‍ലൈന്‍ അപേക്ഷയും, ഫീസും www.keralapareekshabhavan.in വെബ്‌സൈറ്റ് / ktet.kerala.gov.in വെബ്‌പോര്‍ട്ടല്‍ എന്നിവ വഴി നവംബര്‍ 20 മുതല്‍ ഡിസംബര്‍ മൂന്ന് വരെ സമര്‍പ്പിക്കാം.