സംസ്ഥാനത്ത് ഹയര്‍ സെക്കന്ററി വിദ്യാഭ്യാസ മേഖലയില്‍ ഒന്നും രണ്ടും വര്‍ഷ വിദ്യാര്‍ത്ഥികള്‍ക്കായി നടത്തുന്ന പാദവാര്‍ഷിക പരീക്ഷകളുടെ ഭാഗമായി ചോദ്യപേപ്പര്‍ സര്‍ക്കാര്‍ / എയ്ഡഡ് / അണ്‍ - എയ്ഡഡ് സ്‌കൂളുകള്‍ക്ക് വിതരണം ചെയ്യുന്നതിന് കുട്ടികളില്‍ നിന്ന് യാതൊരു ഫീസും ഈടാക്കരുതെന്ന് ബോര്‍ഡ് ഓഫ് ഹയര്‍ സെക്കന്‍ഡറി എക്‌സാമിനേഷന്‍സ് സെക്രട്ടറി അറിയിച്ചു.സ്‌കൂള്‍ അധികൃതര്‍ ഫീസ് ഈടാക്കിയാല്‍ വിവരം രേഖകള്‍ സഹിതം ഹയര്‍ സെക്കന്‍ഡറി വിദ്യാഭ്യാസ വകുപ്പ് പരീക്ഷ സെക്രട്ടറിക്ക് നല്‍കണം.

പി.എന്‍.എക്‌സ്.4860/17

കേരള സംസ്ഥാന വികലാംഗക്ഷേമ കോര്‍പ്പറേഷന്‍ 2017-ലെ എസ്.എസ്.എല്‍.സി, പ്ലസ് ടു പരീക്ഷകളില്‍ എല്ലാ വിഷയങ്ങള്‍ക്കും ബി ഗ്രേഡോ  മുകളിലോ ലഭിച്ച ഭിന്നശേഷിക്കാരായ വിദ്യാര്‍ത്ഥികള്‍ക്ക് 2500/- രൂപാ വീതം ക്യാഷ് അവാര്‍ഡ് നല്‍കും.  40 ശതമാനമോ അതിനു മുകളിലോ ഭിന്നശേഷിത്വം ഉള്ളവരും, വാര്‍ഷിക വരുമാനം ഒരു ലക്ഷം രൂപയില്‍ താഴെയുളളതുമായ ഭിന്നശേഷിക്കാര്‍ മാനേജിംഗ് ഡയറക്ടര്‍, കേരള സംസ്ഥാന വികലാംഗക്ഷേമ കോര്‍പ്പറേഷന്‍, പൂജപ്പുര, തിരുവനന്തപുരം എന്ന വിലാസത്തില്‍ നവംബര്‍ 31 നകം അപേക്ഷ നല്‍കണം. അപേക്ഷാ ഫോറം www.hpwc.kerala.gov.in ല്‍ ലഭ്യമാണ്. ഫോണ്‍ : 0471 - 2347768.

പി.എന്‍.എക്‌സ്.4859/17

ജോലി ഏതായാലും അതിനാവശ്യമായ സൂക്ഷ്മശേഷികള്‍ ഉദ്യോഗസ്ഥര്‍ക്ക് ഉണ്ടാകണമെന്ന് ഭരണപരിഷ്‌കാര കമ്മീഷന്‍ ചെയര്‍മാന്‍ വി.എസ്. അച്യുതാനന്ദന്‍ അഭിപ്രായപ്പെട്ടു. സംസ്ഥാനത്തെ ഉദ്യോഗസ്ഥശേഷി വികസനം സംബന്ധിച്ച് ഭരണ പരിഷ്‌കാര കമ്മീഷന്‍ സംഘടിപ്പിച്ച ശില്‍പശാലയില്‍ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം. സര്‍ക്കാരിന്റെ മുഖമായി ജനങ്ങള്‍ ഇടപെടുന്നത് ഉദ്യോഗസ്ഥന്‍മാരുമായാണ്. ജനങ്ങളുമായുള്ള ഇടപെടല്‍ ഒരു കലയാണ്. അതുകൊണ്ടുതന്നെ നമ്മുടെ ഭാഷയും ശരീരഭാഷയും പ്രധാനമാണ്. 

കേരള വാട്ടര്‍ അതോറിറ്റിയിലെ ആരോഗ്യ ഇന്‍ഷ്വറന്‍സ് പദ്ധതിയില്‍ അംഗമായിട്ടുള്ള ജീവനക്കാര്‍, പെന്‍ഷന്‍കാര്‍, അവരുടെ കുടുംബാംഗങ്ങള്‍ എന്നിവര്‍ക്കായി നാളെ (നവംബര്‍17) രാവിലെ പത്ത് മുതല്‍ ഉച്ചയ്ക്ക് ഒന്നര വരെ കേരള വാട്ടര്‍ അതോറിറ്റിയുടെ പത്തനംതിട്ട പി.എച്ച് ഡിവിഷനില്‍ സൗജന്യ മെഡിക്കല്‍ ക്യാമ്പ് സംഘടിപ്പിക്കും. ഹെല്‍ത്ത് കാര്‍ഡ് കൈപ്പറ്റാത്ത പെന്‍ഷന്‍കാര്‍ക്ക് അന്നേ ദിവസം ഹെല്‍ത്ത് കാര്‍ഡ് നല്‍കും.

വിവിധ വകുപ്പുകളിലോ വകുപ്പുകളുടെ അധികാരപരിധിയിലുള്ള സ്ഥാപനങ്ങളിലോ എം.ബി.എ യോഗ്യതയായി നിശ്ചയിക്കാന്‍ അനുയോജ്യമായ തസ്തികകള്‍ ഉണ്ടെങ്കില്‍ അവ കണ്ടെത്താനും അതിനെ അടിസ്ഥാനമാക്കി എം.ബി.എ കൂടി ഉള്‍പ്പെടുത്തി സ്‌പെഷ്യല്‍ റൂള്‍സ് ഭേദഗതി വരുത്തി വിജ്ഞാപനം പുറപ്പെടുവിക്കാനും എല്ലാ ഭരണ വകുപ്പുകള്‍ക്കും സര്‍ക്കാര്‍ നിര്‍ദേശം നല്‍കി (സര്‍ക്കുലര്‍ നമ്പര്‍ റൂള്‍സ് 1/372/2017 ഉ.ഭ.പ.വ).

പി.എന്‍.എക്‌സ്.4856/17

ആലപ്പുഴ ജില്ലയിലെ ചെങ്ങന്നൂര്‍ കുരട്ടിശ്ശേരി വില്ലേജില്‍ സ്ഥിതി ചെയ്യുന്ന മാന്നാര്‍ തൃക്കുരുട്ടി മഹാദേവര്‍ ക്ഷേത്രവും പത്തനംതിട്ട കോഴഞ്ചേരി മല്ലപ്പുഴശ്ശേരി വില്ലേജിലെ വാഴുവേലില്‍ തറവാട് വീടും കേരള പ്രാചീന സ്മാരക പുരാവസ്തു സങ്കേതങ്ങളും പുരാവശിഷ്ടങ്ങളും ആക്ടിന്റെ (1968) പരിധിയില്‍ പെടുത്തി സംരക്ഷിത സ്മാരകങ്ങളായി സര്‍ക്കാര്‍ പ്രഖ്യാപിച്ചു.

പി.എന്‍.എക്‌സ്.4855/17

കോഴിക്കോട് ജില്ലയില്‍ കേരളാ സ്റ്റേറ്റ് സിവില്‍ സപ്ലൈസ് കോര്‍പ്പറേഷന്‍ ലിമിറ്റഡില്‍ അസിസ്റ്റന്റ് സെയില്‍സ്മാന്‍ (കാറ്റഗറി നമ്പര്‍ 222/2015) സാധ്യതാപട്ടികയിലുള്‍പ്പെട്ട ഉദ്യോഗാര്‍ത്ഥികളുടെ വണ്‍ടൈം വെരിഫിക്കേഷന് (OTV) 2017 നവംബര്‍ 15, 16, 17, 20, 21, 22, 23, 24, 27, 28, 30, ഡിസംബര്‍ 1, 4, 5 തീയതികളില്‍ കോഴിക്കോട് സിവില്‍ സ്റ്റേഷനിലുള്ള ജില്ലാ പി.എസ്.സി ഓഫീസില്‍ നടത്തും. സാധ്യതാപട്ടികയിലുള്‍പ്പെട്ട ഉദ്യോഗാര്‍ത്ഥികള്‍ പ്രൊഫൈലില്‍ അപ് ലോഡ് ചെയ്ത അസ്സല്‍ സര്‍ട്ടിഫിക്കറ്റുകള്‍ സഹിതം വെരിഫിക്കേഷന്‍ ദിവസം രാവിലെ 10.15 ന് കേരള പി.എസ്.സി.യുടെ കോഴിക്കോട് ജില്ലാ ഓഫീസില്‍ നേരിട്ട് ഹാജരാകണം.

തിരുവനന്തപുരം ഗവ. ആയുര്‍വേദ കോളേജില്‍ ഒ.പി. നമ്പര്‍ ഒന്നില്‍ ഗവേഷണാടിസ്ഥാനത്തില്‍ ചൊവ്വ, വെള്ളി, ശനി ദിവസങ്ങളില്‍ രാവിലെ 8.00 മുതല്‍ ഉച്ചയ്ക്ക് 12.30 വരെ വെള്ളപ്പാണ്ടിനുള്ള ചികിത്സ ലഭ്യമാണ്.

പി.എന്‍.എക്‌സ്.4853/17

ശ്വാസകോശ സംബന്ധമായ അസുഖങ്ങള്‍ പരിശോധിക്കുന്നതിനും ചികിത്‌സിക്കുന്നതിനും കുടുംബാരോഗ്യ കേന്ദ്രങ്ങളില്‍ സൗകര്യമൊരുക്കുമെന്ന് ആരോഗ്യ മന്ത്രി കെ. കെ. ശൈലജ ടീച്ചര്‍ പറഞ്ഞു. മ്യൂസിയം വളപ്പില്‍ സംഘടിപ്പിച്ച ലോക സി.ഒ.പി.ഡി ദിനാചരണം ഉദ്ഘാടനം ചെയ്യുകയായിരുന്നു മന്ത്രി. സബ്‌സെന്റര്‍ തലത്തില്‍ തന്നെ പരിശോധന നടത്തുന്നതിന് ആവശ്യമായ പരിശീലനം ജീവനക്കാര്‍ക്ക് നല്‍കുന്നുണ്ട്. ശ്വാസകോശം സംബന്ധിച്ച അസുഖങ്ങളുടെ പ്രാഥമിക പരിശോധനയും ചികിത്‌സയും നടത്തുന്നതിനായുള്ള സ്വാസ് പദ്ധതി സംസ്ഥാനത്തെ എല്ലാ ജില്ലാ ആശുപത്രികളിലും ആരംഭിച്ചിട്ടുണ്ട്. 

    ശബരിമല തീര്‍ഥാടനവുമായി ബന്ധപ്പെട്ട് പമ്പയില്‍ മില്‍മയുടെ സ്റ്റാള്‍ സജ്ജീകരിക്കുന്നതിനുള്ള നടപടികള്‍ പൂര്‍ത്തിയായതായി ക്ഷീരവികസന വകുപ്പ് ഡെപ്യൂട്ടി ഡയറക്ടര്‍ അറിയിച്ചു. തീര്‍ഥാടന കാലയളവില്‍ ക്ഷീരസഹകരണ സംഘങ്ങളില്‍ സംഭരിക്കുന്നതും വില്‍പ്പന നടത്തുന്നതുമായ പാലിന്‍റെ ഗുണനിലവാരം ഉറപ്പാക്കുന്നതിനുള്ള നടപടികള്‍ സ്വീകരിച്ചിട്ടുണ്ട്. തീര്‍ഥാടന പാതയിലെ വ്യാപാര സ്ഥാപനങ്ങളില്‍ വില്‍പ്പന നടത്തുന്ന പാലിന്‍റെ സാമ്പിള്‍ ശേഖരിച്ച് ക്ഷീരവികസന വകുപ്പ് ക്വാളിറ്റി കണ്‍ട്രോള്‍ ലാബില്‍ പരിശോധന നടത്തുമെന്നും ഡെപ്യൂട്ടി ഡയറക്ടര്‍ അറിയിച്ചു.                                (12/17)