സി-ഡിറ്റ് സൈബര്‍ശ്രീ സെന്‍ററില്‍ മാറ്റ്ലാബ് പരിശീലനത്തിന് പട്ടികജാതി വിഭാഗത്തി ല്‍പ്പെട്ടവരില്‍ നിന്നും  അപേക്ഷ ക്ഷണിച്ചു. ഇലക്ട്രോണിക്സ്, ഇലക്ട്രിക്കല്‍, കംപ്യൂട്ടര്‍ സയന്‍സ്, ഐ.ടി, അപ്ലൈഡ് ഇലക്ട്രോണിക്സ് എന്നിവയില്‍ എന്‍ജിനീയറിംഗ് ബിരുദം/ എം.സി.എ പാസ്സായവര്‍ക്കും കോഴ്സ് പൂര്‍ത്തീകരിച്ചവര്‍ക്കും  ബി.എസ്.സി (കംപ്യൂട്ടര്‍ സയന്‍സ്/ഇലക്ട്രോണിക്സ്) പാസായവര്‍ക്കും അപേക്ഷിക്കാം. നാല് മാസമാണ് പരിശീലന കാലയളവ്. പ്രായം 20നും 26നും മധ്യേ. പരിശീലനത്തില്‍ പങ്കെടുക്കുന്നവര്‍ക്ക് പ്രതിമാസം 5000 രൂപ സ്റ്റൈപ്പന്‍റ് ലഭിക്കും.  

ജില്ലാ ലീഗല്‍ സര്‍വീസസ് അതോറിറ്റി ഈ മാസം ഒന്‍പതിന് രാവിലെ 10  മണിക്ക് സംഘടിപ്പിക്കുന്ന നാഷണല്‍ ലോക് അദാലത്തില്‍ കാസര്‍കോട്്്, ഹോസ്ദുര്‍ഗ്ഗ് കോടതികളില്‍  നിലവിലുള്ള കേസുകളും മറ്റു പരാതികളും  വിദ്യാനഗറിലുള്ള ജില്ലാ കോടതി സമുച്ചയത്തിലും ഹൊസ്ദുര്‍ഗ് കോടതിയിലും പരിഗണിക്കുന്നതും തീര്‍പ്പാക്കുന്നതുമാണ്.   ഈ അദാലത്തില്‍ ബാങ്ക് കേസുകള്‍,  ക്രിമിനല്‍ കേസുകള്‍,  ചെക്ക് കേസുകള്‍,  റവന്യൂ കേസുകള്‍,  മറ്റ് സിവില്‍ കേസുകള്‍ എന്നിവ പരിഗണിക്കും.
 

കൊച്ചി: കണയന്നൂര്‍ താലൂക്ക് വികസന സമിതിയുടെ ഡിസംബര്‍ മാസത്തെ യോഗം കണയന്നൂര്‍ താലൂക്ക് ഓഫീസില്‍ ഇടപ്പളളി ബ്ലോക്ക് പഞ്ചായത്ത് പ്രസിഡന്റ് എം.ആര്‍.ആന്റണിയുടെ അദ്ധ്യക്ഷതയില്‍ ചേര്‍ന്നു. വിവിധ രാഷ്ട്രീയ കക്ഷികളുടെ പ്രിതിനിധികള്‍, വിവിധ വകുപ്പുകളുടെ താലൂക്കുതല മേധാവികള്‍ എന്നിവര്‍ യോഗത്തില്‍ പങ്കെടുത്തു. അടുത്ത യോഗം 2018 ജനുവരി ആറിന് രാവിലെ 11-ന് കണയന്നൂര്‍ താലൂക്ക് ഓഫീസില്‍ ചേരും. എല്ലാ വകുപ്പു മേധാവികളും യോഗത്തില്‍ പങ്കെടുക്കണമെന്ന് തഹസില്‍ദാര്‍ അറിയിച്ചു.

കാക്കനാട്: ഓഖി ചുഴലിക്കാറ്റിനെ തുടര്‍ന്ന് കടലില്‍ അകപ്പെട്ട മത്സ്യത്തൊഴിലാളികളെയും മത്സ്യബന്ധന ബോട്ടുകളെയും കണ്ടെത്തുന്നതിനുള്ള ജോയിന്റ് ഓപ്പറേഷന്‍ സെന്ററിന്റെ ഭാഗമായുള്ള പ്രത്യേക രക്ഷാപ്രവര്‍ത്തന സംഘത്തിന് കൊച്ചി കേന്ദ്രീകരിച്ച് സംസ്ഥാനതല കണ്‍ട്രോള്‍ റൂം പ്രവര്‍ത്തനമാരംഭിച്ചു. ഹെല്‍പ്പ് ലൈന്‍ നമ്പര്‍: 7902200300, 7902200400, 0484 2423513. കണ്‍ട്രോള്‍ റൂമില്‍ നിന്ന് സംസ്ഥാനത്തിനകത്തും പുറത്തുമുള്ളവര്‍ക്ക് വിവരങ്ങള്‍ അറിയാം.

   കാഞ്ഞങ്ങാട് ബ്ലോക്ക് ക്ഷീരകര്‍ഷക സംഗമവും പുല്ലൂര്‍ ക്ഷീരോല്പാദക സഹകരണ സംഘം കെട്ടിടോദ്ഘാടനവും നാളെ(8) രാവിലെ 11.30ന് ക്ഷീരവികസന-മൃഗസംരക്ഷണവകുപ്പ് മന്ത്രി അഡ്വ.കെ.രാജു  നിര്‍വഹിക്കും. ക്ഷീരോല്പാദക സഹകരണ സംഘം പരിസരത്ത് നടക്കുന്ന ചടങ്ങില്‍ കെ.കുഞ്ഞിരാമന്‍ എംഎല്‍എ അധ്യക്ഷത വഹിക്കും.