കണ്ണൂര്‍ സബ് ട്രഷറിയില്‍ നിന്നും ട്രഷറി അക്കൗണ്ടുകള്‍, മണിയോര്‍ഡര്‍ എന്നിവ മുഖേന പെന്‍ഷന്‍ കൈപ്പറ്റുന്ന ഈ വര്‍ഷം ഇതു വരെയായി മസ്റ്ററിംഗ് നടത്താത്ത എല്ലാ പെന്‍ഷന്‍കാരും ഡിസംബര്‍ 31 ന് മുമ്പ് നേരിട്ടോ ലൈഫ് സര്‍ട്ടിഫിക്കറ്റ് സമര്‍പ്പിച്ചോ മസ്റ്ററിംഗ് നടത്തേണ്ടതാണ്.  അല്ലാത്തപക്ഷം 2018 ജനുവരി ഒന്ന് മുതലുള്ള പെന്‍ഷന്‍ താല്‍ക്കാലികമായി തടഞ്ഞുവെക്കുന്നതാെണന്ന് കണ്ണൂര്‍ സബ് ട്രഷറി ഓഫീസര്‍ അറിയിച്ചു.
പി എന്‍ സി/4599/2017

 മലയാളം ഔദേ്യാഗിക ഭാഷാ വാരാചരണത്തോടനുബന്ധിച്ച് സംസ്ഥാന പുരാരേഖാ വകുപ്പ് ഡിസംബര്‍ 5, 6 തീയതികളില്‍ കണ്ണൂര്‍ ടി  ടി ഐ(മെന്‍) ല്‍ ചരിത്രരേഖാ പ്രദര്‍ശനവും ഭാഷാ സെമിനാറും സംഘടിപ്പിക്കുന്നു.  നാളെ (ഡിസം.5) രാവിലെ 10 മണിക്ക് പുരാരേഖാ-പുരാവസ്തു-മ്യൂസിയം-തുറമുഖ വകുപ്പ് മന്ത്രി രാമചന്ദ്രന്‍ കടന്നപ്പളളി പ്രദര്‍ശനം ഉദ്ഘാടനം നിര്‍വഹിക്കും.  ഭാഷാ സെമിനാറില്‍ മലയാള ഭാഷയുടെ ചരിത്രവും വികാസവും എന്ന വിഷയത്തില്‍ നീലേശ്വരം നഗരസഭ ചെയര്‍മാന്‍ പ്രൊഫ.കെ.പി ജയരാജ് വിഷയം അവതരിപ്പിക്കും.  സംസ്ഥാന പുരാവസ്തു വകുപ്പ് ഡയറക്ടര്‍ ജെ രജികുമാര്‍ മോഡറേറ്റര്‍ ആയിരിക്കും. 

സംസ്ഥാന പിന്നോക്ക വികസന കോര്‍പ്പറേഷന്‍ ജില്ലാ ഓഫീസ് ദേശീയ പിന്നോക്ക വിഭാഗ ധനകാര്യ വികസന കോര്‍പ്പറേഷന്റെ ധനസഹായത്തോടെ പിന്നോക്ക വിഭാഗങ്ങള്‍ക്കായി  ഏകദിന ബോധവല്‍ക്കരണ ക്യാമ്പ് നടത്തുന്നു.  എല്ലാ വിഷയങ്ങള്‍ക്കും എ പ്ലസ് നേടിയ പ്ലസ്ടു വിദ്യാര്‍ത്ഥികള്‍ക്കുളള സ്‌കോളര്‍ഷിപ്പ് വിതരണവും ചടങ്ങില്‍ നടക്കും.  ഡിസംബര്‍ 5 രാവിലെ 11 മണിക്ക് കണ്ണൂര്‍ വ്യാപാരഭവനില്‍ ജില്ലാ പഞ്ചായത്ത് പ്രസിഡണ്ട് കെ വി സുമേഷിന്റെ അധ്യക്ഷതയില്‍ തുറമുഖ വകുപ്പ് മന്ത്രി രാമചന്ദ്രന്‍ കടന്നപ്പളളി ഉദ്ഘാടനം നിര്‍വഹിക്കും.

 കണ്ണൂര്‍ എസ് എസ് എ യുടെ ആഭിമുഖ്യത്തില്‍ ഒന്നിച്ചൊന്നായ് എന്ന പേരില്‍ ലോകഭിന്നശേഷി ദിനത്തിന്റെ ജില്ലാതല ഉദ്ഘാടനം കണ്ണൂര്‍ നോര്‍ത്ത് ബി ആര്‍ സിയില്‍  നടത്തി. എല്‍ പി, യു പി വിഭാഗം കുട്ടികള്‍ക്ക് ചിത്രരചന, കലാ-കായിക പരിപാടികള്‍, അമ്മമാര്‍ക്കും കുട്ടികള്‍ക്കുമുളള മത്സരങ്ങള്‍, ബോധവല്‍ക്കരണ ക്ലാസുകള്‍ എന്നിവ സംഘടിപ്പിച്ചു. കണ്ണൂര്‍ കോര്‍പറേഷന്‍ വിദ്യാഭ്യാസ സ്റ്റാന്‍ഡിങ്ങ് കമ്മിറ്റി ചെയര്‍പേഴ്‌സണ്‍ ഷാഹിന മൊയ്തീന്‍ ഉദ്ഘാടനം ചെയ്തു. കണ്ണൂര്‍ നോര്‍ത്ത് എ ഇ ഒ കെ വി സുരേന്ദ്രന്‍ അധ്യക്ഷത വഹിച്ചു.  കണ്ണൂര്‍ നോര്‍ത്ത് ബി പി ഒ കൃഷ്ണന്‍ കുറിയ സ്വാഗതം പറഞ്ഞു.

    രണ്ടാം ലോകമഹായുദ്ധ സേനാനികള്‍ക്കും വിധവകള്‍ക്കുമുള്ള പ്രതിമാസ സാമ്പത്തിക സഹായം തുടര്‍ന്ന് ലഭിക്കുന്നതിന് ഈ മാസം 31ന് മുമ്പ് ലൈഫ് സര്‍ട്ടിഫിക്കറ്റ് ജില്ലാ സൈനിക ക്ഷേമ ഓഫീസില്‍ ലഭ്യമാക്കണം. ലൈഫ് സര്‍ട്ടിഫിക്കറ്റ് ലഭ്യമാക്കാത്തവര്‍ക്ക് സാമ്പത്തിക സഹായം തുടര്‍ന്ന് ലഭിക്കില്ല. കൂടുതല്‍ വിവരങ്ങള്‍ക്ക് ഫോണ്‍: 0468 2222104.                                                   (പിഎന്‍പി 3649/17)

കണ്ണൂര്‍ ആസ്ഥാനമായ 122 ാം ഇന്‍ഫന്‍ട്രി ബറ്റാലിയന്‍ പ്രാദേശിക സേനയിലേക്ക് യുവാക്കളെ തെരഞ്ഞെടുക്കുന്നു.  18 നും 42 നും ഇടയില്‍ പ്രായമുള്ളവര്‍ക്കായി ഡിസംബര്‍ 11, 12 തീയതികളിലാണ് തെരഞ്ഞെടുപ്പ്.  11 ന് കേരളം, തമിഴ്‌നാട്, കര്‍ണ്ണാടക, ആന്ധ്രപ്രദേശ്, തെലുങ്കാന സംസ്ഥാനക്കാര്‍ക്കും 12 ന് മഹാരാഷ്ട്ര, രാജസ്ഥാന്‍, ഗുജറാത്ത് കേന്ദ്രഭരണ പ്രദേശങ്ങളായ ദാദര്‍ നാഗര്‍ ഹവേലി, ഗോവ ദാമന്‍ & ഡ്യൂ ലക്ഷദ്വീപ്,  പുതുച്ചേരി തുടങ്ങിയ സംസ്ഥാനത്ത് നിന്നുള്ളവര്‍ക്കും കണ്ണൂര്‍ കോട്ട മൈതാനിയില്‍ കായികക്ഷമതാ പരീക്ഷ നടക്കും.

കളക്ടറേറ്റ് മിനി കോണ്‍ഫറന്‍സ് ഹാളില്‍   പോലീസ് കംപ്ലയിന്റ് അതോറിറ്റി ചെയര്‍മാന്‍ റിട്ട. ജഡ്ജ് കെ വി  ഗോപിക്കുട്ടന്‍ നടത്തിയ  സിറ്റിംഗില്‍ 24 കേസുകള്‍ പരിഗണിച്ചു. ഇതില്‍ രണ്ടെണ്ണം  തീര്‍പ്പാക്കി. സീനിയര്‍ സൂപ്രണ്ട് വി സൂര്യനാരായണന്‍, ഡിവൈഎസ് പി (അഡ്മിനിസ്‌ട്രേഷന്‍) നന്ദകുമാരന്‍പിള്ള തുടങ്ങിയവര്‍ പങ്കെടുത്തു.
 

കേരള ലോകായുക്ത ഈ മാസം  കണ്ണൂര്‍, തലശ്ശേരി, കോഴിക്കോട്   എന്നിവിടങ്ങളില്‍ ക്യാമ്പ് സിറ്റിംഗ് നടത്തും. ഈ മാസം 11 ന് കണ്ണൂര്‍ ടൗണ്‍ കോ-ഓപ്പറേറ്റീവ്  ബാങ്കില്‍  ഉപലോകായുക്ത ജസ്റ്റിസ്  എ കെ ബഷീറും (സിംഗിള്‍ ബെഞ്ച്) 12 നും 13 നും  തലശ്ശേരി ഗവ. റസ്റ്റ് ഹൗസ് കോണ്‍ഫറന്‍സ് ഹാളില്‍  ലോകായുക്ത ജസ്റ്റിസ് പയസ് പി കുര്യാക്കോസ്, ഉപലോകായുക്ത ജസ്റ്റിസ്  എ കെ ബഷീര്‍ (ഡിവിഷന്‍ ബെഞ്ച്) എന്നിവരുമാണ് സിറ്റിംഗ് നടത്തുന്നത്.  ഈ ദിവസങ്ങളില്‍ പുതിയ പരാതികള്‍ സ്വീകരിക്കും.
 

ലോകമണ്ണ്ദിനമായ (ഡിസം.5) ഇന്ന് മണ്ണ് പര്യവേക്ഷണ മണ്ണ്‌സംരക്ഷണ വകുപ്പും  കാര്‍ഷികവികസന കര്‍ഷകക്ഷേമവകുപ്പും സംയുക്തമായി ജില്ലയില്‍ വിവിധ പരിപാടികള്‍ സംഘടിപ്പിക്കും.  ലോക മണ്ണ്ദിനാഘോഷത്തിന്റെ  ജില്ലാതല ആഘോഷം ഇന്ന് (5) രാവിലെ  10 ന് കാഞ്ഞങ്ങാട് കിഴക്കുംകര ഐശ്വര്യ ഓഡിറ്റോറിയത്തില്‍ കെ കുഞ്ഞിരാമന്‍ എംഎല്‍എ ഉദ്ഘാടനം ചെയ്യും.  അജാനൂര്‍ ഗ്രാമപഞ്ചായത്ത് പ്രസിഡന്റ് പി ദാമോദരന്‍ അധ്യക്ഷത വഹിക്കും.  ജില്ലാ മണ്ണ്‌സംരക്ഷണ ഓഫീസര്‍  വി എം അശോക് കുമാര്‍ വിഷയാവതരണം നടത്തും.