സര്‍വ ശിക്ഷാ അഭിയാന്‍ നടപ്പാക്കുന്ന ഒന്നാം ക്ലാസ് ഒന്നാംതരം വായനക്കാര്‍ എന്ന പദ്ധതിയോട് ചേര്‍ന്ന് വള്ളിക്കോട് പഞ്ചായത്തിലെ വയലാ വടക്ക് ഗവണ്‍മെന്റ് എല്‍പി സ്‌കൂളില്‍ പിടിഎയുടെ ആഭിമുഖ്യത്തചന്റ പുസ്തക ശേഖരണം ആരംഭിച്ചു. പരിപാടിയുടെ    ഉദ്ഘാടനം കോന്നി ബ്ലോക്ക് പഞ്ചായത്ത് വൈസ്പ്രസിഡന്റ് റോസമ്മ ബാബുജി നിര്‍വഹിച്ചു.

ജില്ലാ പഞ്ചായത്തിന്റെ 2016-17 വാര്‍ഷിക പദ്ധതിയില്‍ ഉള്‍പ്പെടുത്തി 13 ലക്ഷം രൂപ ചെലവഴിച്ച് കോയിപ്രം ഗവണ്‍മെന്റ് ഹയര്‍ സെക്കന്‍ഡറി സ്‌കൂളില്‍ നിര്‍മിച്ച അഞ്ച് സ്മാര്‍ട്ട് ക്ലാസ് റൂമുകളുടെ ഉദ്ഘാടനം ജില്ലാ പഞ്ചായത്ത് പ്രസിഡന്റ് അന്നപൂര്‍ണാദേവി നിര്‍വഹിച്ചു.

ശബരിമല തീര്‍ഥാടനത്തോടനുബന്ധിച്ച് സന്നിധാനം, പമ്പ, നിലയ്ക്കല്‍, ഔട്ട്‌സൈഡ് പമ്പ എന്നിവിടങ്ങളിലെ കടകളില്‍ ജോലിക്കെത്തുന്നവര്‍ക്ക് തിരിച്ചറിയല്‍ കാര്‍ഡ്, പോലീസ് ക്ലിയറന്‍സ് സര്‍ട്ടിഫിക്കറ്റ് എന്നിവ നിര്‍ബന്ധമാക്കി ജില്ലാ കളക്ടര്‍ ഉത്തരവായി. 

(പിഎന്‍പി 2979/17)

ശബരിമല തീര്‍ഥാടനത്തോടനുബന്ധിച്ച് നിലയ്ക്കല്‍ മുതല്‍ സന്നിധാനം വരെയുള്ള സ്ഥലങ്ങളില്‍ മാംസഭക്ഷണം പാകം ചെയ്യുന്നതും വിതരണം ചെയ്യുന്നതും കൈവശം വയ്ക്കുന്നതും ഉപയോഗിക്കുന്നതും നിരോധിച്ച് ജില്ലാ കളക്ടര്‍  ഉത്തരവായി.

തീര്‍ഥാടന കാലയളവില്‍ നിലയ്ക്കല്‍, ളാഹ തുടങ്ങിയ സ്ഥലങ്ങളില്‍ മാംസഭക്ഷണം വില്‍പ്പന നടത്തുന്നത് തീര്‍ഥാടകര്‍ക്ക് ബുദ്ധിമുട്ടുണ്ടാക്കുമെന്ന പോലീസ് റിപ്പോര്‍ട്ടിന്റെ അടിസ്ഥാനത്തിലാണ് കേരള പോലീസ് നിയമപ്രകാരം നിരോധന ഉത്തരവ് പുറപ്പെടുവിച്ചിട്ടുള്ളത്. 

(പിഎന്‍പി 2978/17)

ജില്ലാ ഹോമിയോ മെഡിക്കല്‍ ഓഫീസിന്റെ കീഴില്‍ കുറ്റൂര്‍ ഹോമിയോ ഡിസ്‌പെന്‍സറിയില്‍ പ്രവര്‍ത്തനം ആരംഭിക്കുന്ന മെഡിക്കല്‍ സ്റ്റോറിലേക്ക് ദിവസ വേതനാടിസ്ഥാനത്തില്‍ സ്‌റ്റോര്‍ കീപ്പര്‍/ഫാര്‍മസിസ്റ്റ് , സ്റ്റോര്‍ അസിസ്റ്റന്റ് ഒഴിവുകളുണ്ട്. സ്റ്റോര്‍ കീപ്പര്‍ക്ക് എസ്എസ്എല്‍സിയും എന്‍സിപി/സിസിപിയാണ് യോഗ്യത.

കൊറ്റനാട് ഗവണ്‍മെന്റ് ഹോമിയോ ആശുപത്രിയിലേക്ക് ദിവസ വേതനാടിസ്ഥാനത്തില്‍ അറ്റന്‍ഡര്‍, യോഗ ട്രെയിനര്‍ എന്നിവരെയും പന്തളം ഹോമിയോ ഡിസ്‌പെന്‍സറിയിലേക്ക് ഡിറ്റിപി ഓപ്പറേറ്ററേയും ആവശ്യമുണ്ട്. അറ്റന്‍ഡര്‍ തസ്തികയിലേക്കുള്ള യോഗ്യത  എസ്എസ്എല്‍സിയും സര്‍ക്കാര്‍/സ്വകാര്യ സ്ഥാപനങ്ങളില്‍ ഹോമിയോ മരുന്ന് കൈകാര്യം ചെയ്തതിലുള്ള മൂന്ന് വര്‍ഷത്തെ പ്രവൃത്തിപരിചയവുമാണ്.

ഖാദി ഗ്രാമവ്യവസായ ബോര്‍ഡിന്റെ ആഭിമുഖ്യത്തില്‍ റാന്നി താലൂക്കിലെ ഗ്രാമപഞ്ചായത്തുകളിലുള്ള തേനീച്ച കര്‍ഷകര്‍ക്ക് പരിശീലനം നല്‍കുന്നു.

താത്പര്യമുള്ള കര്‍ഷകര്‍   ഇലന്തൂരിലുള്ള ജില്ലാ ഖാദി ഗ്രാമവ്യവസായ ഓഫീസില്‍ അപേക്ഷ സമര്‍പ്പിക്കണം. ഫോണ്‍ 0468 2362070.                                                                

(പിഎന്‍പി 2975/17)

ഉള്‍നാടന്‍ മത്സ്യോത്പാദന വര്‍ദ്ധനവിനായി ഫിഷറീസ് വകുപ്പ് നടപ്പാക്കുന്ന പദ്ധതിയുടെ ഭാഗമായി പമ്പാ നദിയില്‍ റാന്നി പഞ്ചായത്തിലെ പെരുമ്പുഴ കടവില്‍ മത്സ്യകുഞ്ഞുങ്ങളെ നിക്ഷേപിച്ചു.

രാജു എബ്രഹാം എംഎല്‍എ പരിപാടി ഉദ്ഘാടനം ചെയ്തു. റാന്നി ഗ്രാമപഞ്ചായത്ത് പ്രസിഡന്റ് ശശികല രാജശേഖരന്‍, ജില്ലാ പഞ്ചായത്തംഗം സൂസന്‍ അലക്‌സ്, ആരോഗ്യ വിദ്യാഭ്യാസ സ്ഥിരം സമിതി അധ്യക്ഷ സുമ വിജയകുമാര്‍, ഫിഷറീസ് അസിസ്റ്റന്റ് ഡയറക്ടര്‍ ടി.സജി തുടങ്ങിയവര്‍ പങ്കെടുത്തു. നാടന്‍ മത്സ്യഇനങ്ങളായ കല്ലേമുട്ടി, മഞ്ഞക്കൂരി എന്നിവയാണ് നിക്ഷേപിച്ചത്.                  

(പിഎന്‍പി 2974/17)

പട്ടികജാതി കടാശ്വാസ പദ്ധതി പ്രകാരം ജില്ലയിലെ 95 സഹകരണ സംഘങ്ങളില്‍ നിന്നും വായ്പ എടുത്ത 1955 ഗുണഭോക്താക്കള്‍ക്ക് കടാശ്വാസം അനുവദിക്കുന്നതിനായി സര്‍ക്കാര്‍ 1.46 കോടി രൂപ അനുവദിച്ചു. 2010 മാര്‍ച്ചിന് മുമ്പ് തിരിച്ചടവ് കാലാവധി കഴിഞ്ഞതും 2015 ആഗസ്റ്റ് 31ന് വായ്പ തിരിച്ചടച്ച് കടം അവസാനിപ്പിച്ച വായ്പകളുടെ ആനുകൂല്യമാണ് അനുവദിച്ചിട്ടുള്ളത്.

ആനുകൂല്യം ലഭിച്ചവരുടെ പേരും തുകയും ബന്ധപ്പെട്ട സഹകരണ ബാങ്കുകളില്‍ പരിശോധനയ്ക്കായി പ്രസിദ്ധീകരിക്കുമെന്ന് സഹകരണ ജോയിന്റ് രജിസ്ട്രാര്‍ അറിയിച്ചു.                   

(പിഎന്‍പി 2973/17)

ജില്ലാ ഭരണകൂടത്തിന്റെയും ജില്ലാ ഇന്‍ഫര്‍മേഷന്‍ ഓഫീസിന്റെയും ആഭിമുഖ്യത്തില്‍ നടത്തിയ ഔദ്യോഗിക ഭാഷാ വാരാചരണത്തിന്റെ സമാപനം ഇന്ന് (ഏഴിന്) രാവിലെ 10ന്   കളക്ടറേറ്റ് കോണ്‍ഫറന്‍സ് ഹാളില്‍ ജില്ലാ കളക്ടര്‍ ആര്‍. ഗിരിജ ഉദ്ഘാടനം ചെയ്യും. വാരാചരണത്തോട് അനുബന്ധിച്ച് സര്‍ക്കാര്‍ ഉദ്യോഗസ്ഥര്‍ക്കുവേണ്ടി നടത്തിയ മലയാളം കേട്ടെഴുത്ത്,   ഫയല്‍ എഴുത്ത്, കവിതാലാപനം, ഹയര്‍ സെക്കന്‍ഡറി വിദ്യാര്‍ഥികളുടെ വാര്‍ത്താവതരണം എന്നീ മത്സരങ്ങളിലെ വിജയികള്‍ക്ക് ജില്ലാ കളക്ടര്‍ സര്‍ട്ടിഫിക്കറ്റ് വിതരണം ചെയ്യും.