തദ്ദേശ വോട്ടെണ്ണല്‍: രാവിലെ 8ന് ആരംഭിക്കും,

ആദ്യം എണ്ണുക പോസ്റ്റല്‍ ബാലറ്റ്,

ആലപ്പുഴ: തദ്ദേശ സ്വയംഭരണ സ്ഥാപനങ്ങളിലേക്ക് നടന്ന തിരഞ്ഞെടുപ്പിന്റെ വോട്ടെണ്ണൽ ഡിസംബർ 16 ന് രാവിലെ 8 മണിമുതല്‍ ആരംഭിക്കും. വോട്ടെണ്ണൽ കേന്ദ്രങ്ങൾ ആയി നിശ്ചയിച്ചിട്ടുള്ളത് ത്രിതല പഞ്ചായത്തുകളെ സംബന്ധിച്ച് ബ്ലോക്ക് തലത്തിലുള്ള വിതരണ സ്വീകരണ കേന്ദ്രങ്ങളും മുനിസിപ്പാലിറ്റി യില്‍ അതത് സ്ഥാപനങ്ങളുടെ വിതരണ സ്വീകരണകേന്ദ്രങ്ങളുമാണ്. ബ്ലോക്ക് തലത്തിൽ ഉള്ള വോട്ടെണ്ണൽ കേന്ദ്രങ്ങളിലെ അടിസ്ഥാനസൗകര്യങ്ങൾ അതാത് ബ്ലോക്ക് പഞ്ചായത്ത് സെക്രട്ടറിമാരും മുനിസിപ്പാലിറ്റി സംബന്ധിച്ച് അതത് സെക്രട്ടറിമാരും ഏർപ്പാടുകൾ വരുത്തണമെന്ന് വോട്ടെണ്ണല്‍ സംബന്ധിച്ച് സംസ്ഥാന തിരഞ്ഞെടുപ്പ് കമ്മീഷന്‍ പുറപ്പെടുവിച്ച മാര്‍ഗ്ഗ നിര്‍ദ്ദേശങ്ങളില്‍ വ്യക്തമാക്കി. വോട്ടെണ്ണൽ പുരോഗതി അപ്പോൾ തന്നെ കമ്മീഷനെയും മീഡിയ സെൻററുകളെയും പൊതുജനങ്ങളെയും അറിയിക്കുന്നതിനായി ട്രെൻഡ് സോഫ്റ്റ്‌വെയറിലേക്ക് സ്ഥാനാർഥികൾക്ക് ലഭിച്ച വോട്ട് വിവരം അപ്‌ലോഡ് ചെയ്യുന്നതിനായി കൗണ്ടിംഗ് സെൻററിനോട് ചേർന്ന് പ്രത്യേക സംവിധാനം സജ്ജമാക്കും.

ഓരോ ഗ്രാമ പഞ്ചായത്തിന്റെയും കൗണ്ടിംഗ് ഹാളിൽ വരണാധികാരിക്കുള്ള വേദിക്ക് സമീപം വോട്ടെണ്ണൽ, ടാബുലേഷൻ, പാക്കിങ് എന്നിവയ്ക്ക് പ്രത്യേകം പ്രത്യേകം മേശകൾ സജ്ജീകരിക്കും. ബ്ലോക്ക് തലത്തിലുള്ള വോട്ടെണ്ണൽ കേന്ദ്രങ്ങളിൽ ബ്ലോക്ക് പഞ്ചായത്ത് ഭരണാധികാരികൾക്ക് ഒരു ഹാളും ബ്ലോക്ക് പഞ്ചായത്തിൻറെ പരിധിയിൽ വരുന്ന ഗ്രാമപഞ്ചായത്തുകൾക്ക് പ്രത്യേകം പ്രത്യേകം കൗണ്ടിംഗ് ഹാളുകള്‍/ മുറികളും കഴിയുന്നതും സജ്ജീകരിക്കണം. മുനിസിപ്പാലിറ്റികളില്‍ ഓരോ വരണാധികാരി ക്കും പ്രത്യേകം പ്രത്യേകം കൗണ്ടിംഗ് ഹാൾ സജ്ജമാക്കണം.

പരമാവധി 8 പോളിങ് സ്റ്റേഷനുകൾക്ക് ഒരു കൗണ്ടിംഗ് ടേബിൾ എന്ന രീതിയിൽ വേണം കൗണ്ടിംഗ് ടേബിളുകൾ സജ്ജീകരിക്കുക. ഇത്തരത്തിൽ ഓരോ സ്ഥാപനത്തിന്റെയും ആകെ പോളിങ് സ്റ്റേഷനുകളുടെ എണ്ണത്തിന് ആനുപാതികമായി കൗണ്ടിംഗ് ടേബിളുകൾ സജ്ജീകരിക്കും. ഒരു വാർഡിലെ എല്ലാ പോളിങ് സ്റ്റേഷനുകളിലെയും വോട്ടെണ്ണൽ ഒരു ടേബിളിൽ തന്നെ ക്രമീകരിക്കും. പോസ്റ്റൽ വോട്ടുകളാണ് ആദ്യം എണ്ണുക. ഗ്രാമപഞ്ചായത്തുകളിലെയും ബ്ലോക്ക് പഞ്ചായത്തുകളിലെയും ജില്ല പഞ്ചായത്തിലെയും പോസ്റ്റൽ വോട്ടുകൾ അതാത് വരണാധികാരികള്‍ മാത്രമാണ് എണ്ണേണ്ടത്.

കൗണ്ടിംഗ് ഹാളിൽ സജ്ജീകരിച്ചിട്ടുള്ള വോട്ടെണ്ണൽ മേശകളുടെ എണ്ണം കണക്കാക്കിയാണ് കൺട്രോൾ യൂണിറ്റുകൾ സ്ട്രോങ്ങ് റൂമിൽ നിന്ന് ഏറ്റുവാങ്ങി വോട്ടെണ്ണല്‍ നടത്തുക. വോട്ടെണ്ണൽ ആരംഭിക്കുന്നത് ഒന്നാം വാർഡ് മുതൽ എന്ന ക്രമത്തിൽ ആയിരിക്കും. ഒരു വാർഡിൽ ഒന്നിലധികം ബൂത്തുകൾ ഉണ്ടെങ്കിൽ അവ ഒരു ടേബിളിൽ ആണ് എണ്ണുക.

ത്രിതല പഞ്ചായത്തുകളെ സംബന്ധിച്ച് ഓരോ ടേബിളിലും ഒരു കൗണ്ടിംഗ് സൂപ്പർവൈസർ രണ്ട് കൗണ്ടിംഗ് അസിസ്റ്റൻറ്മാർ എന്നക്രമത്തിൽ ജീവനക്കാരെ നിയമിക്കും. എന്നാല്‍ നഗരസഭകളിൽ ഒരു കൗണ്ടിംഗ് സൂപ്പർ വൈസറെയും ഒരു കൗണ്ടിംഗ് അസിസ്റ്റന്റിനെയുമാണ് നിയമിക്കുക.

കൂടാതെ ടാബുലേഷൻ,പായ്ക്കിംഗ് എന്നിവയ്ക്കും പ്രത്യേകം ജീവനക്കാരെ നിയമിക്കണം. കോവിഡ് പശ്ചാത്തലത്തിൽ പ്രത്യേക നിർദ്ദേശങ്ങൾ കർശനമായും പാലിച്ചുകൊണ്ടായിരിക്കും വോട്ട് എണ്ണല്‍ നടത്തുക.