ആശുപത്രി പരിസരം ശുചീകരിച്ച സന്നദ്ധപ്രവർത്തകരെ അനുമോദിച്ചു

ആലപ്പുഴ : അരുക്കുറ്റി സർക്കാർ ആശുപത്രിയുടെ പരിസരം ശുചീകരിച്ച സന്നദ്ധ പ്രവർത്തകരെ അനുമോദിച്ചു. തൈക്കാട്ടുശ്ശേരി ബ്ലോക്ക് പഞ്ചായത്തിന്റെ നേതൃത്വത്തിൽ അരൂക്കുറ്റി പഞ്ചായത്തിൽ സംഘടിപ്പിച്ച ചടങ്ങ് എ.എം ആരിഫ് എം.പി ഉദ്ഘാടനം ചെയ്തു. അരുക്കുറ്റി ആശുപത്രി പരിസരത്ത് വ്യായാമ കേന്ദ്രങ്ങൾ, വായനശാല എന്നിവ നിർമിക്കുമെന്നും ഇതിനായി കൊച്ചിൻ ഷിപ്പിയാഡിന്റെ സി എസ് ആർ ഫണ്ട് ഉപയോഗിക്കുമെന്നും എ. എം ആരിഫ് എംപി പറഞ്ഞു.

പ്രകൃതി സൗഹൃദകുട്ടായ്മ എന്ന സംഘടന അരൂക്കുറ്റി ആശുപത്രിയിലെ ആറേക്കറോളം വരുന്ന കാടു കയറിയ പ്രദേശങ്ങൾ വെട്ടി തെളിച്ച് സഞ്ചാര യോഗ്യമാക്കുകയായിരുന്നു. പ്രകൃതി കുട്ടായ്മയുടെ പ്രസിഡന്റ് സരിത രാജേഷ് , സെക്രട്ടറി കെ. റ്റി ജയദേവൻ ഉൾപ്പെടെ ഇരുപതോളം പേരെയാണ് എം.പി അനുമോദിച്ചത്.

ചടങ്ങിൽ തൈക്കാട്ടുശ്ശേരി ബ്ലോക്ക് പഞ്ചായത്ത് പ്രസിഡന്റ് പി.എം പ്രമോദ് അദ്ധ്യക്ഷനായി. അരൂക്കുറ്റി ഗ്രാമപഞ്ചായത്ത് പ്രസിഡന്റ് അഷറഫ് വെള്ളേഴത്ത്, ബ്ലോക്ക് പഞ്ചായത്ത് സ്റ്റാന്റിങ്ങ് കമ്മറ്റി ചെയർമാൻ എൻ.കെ ജനാർദ്ദനൻ, രാജേഷ്‌ വിവേകാനന്ദ , പഞ്ചായത്ത് അംഗങ്ങളായ ശാരി, വിദ്യ, ചേർത്തല സാന്ത്വനം പെയിൻ ആന്റ് പാലിയേറ്റിവ് ചെയർമാൻ കെ രാജപ്പൻ നായർ, മെഡിക്കൽ ഓഫിസർ സേതുരാജ് എന്നിവർ സംസാരിച്ചു